Evala dobri judi, evo nisan pisa dosta jer bija san pod nekon amo reć gripon, ma mala stvar, glupost!!
E pa mi palo na pamet da nepišen nešto o toj gripi!!
E judi moji ja van nisan kontra gripe, ćim ona počme aračit, čovik jema di poć, moreš cili dan izgubit po vižitan obilazeći prijateje i znance, i kad dođeš u vižitu imaš barem ko o ćemu govorit! Tristo puti je bolje, i veselije u kući sa gripon nego u kući bez gripe!!!
Lipo dođeš u vižitu, i odma s vrat vićeš 'DI JE BOLESNIK', 'KAKO NAŠ BOLESNIK'?!!!
Jema li čovik samo dvi unca fibre, odma postane osjetljiv, i da je najtrvđi odma postane mek!
Drago mu je ća si doša, ća se brineš za njega, i ćin te ćuje na vrata, vas se razmekša i samo ća ne zajeca!! A i ukućanima je drago ća si doša, jel , i njima je puna pipa bolesnika, jer svaki bolesnik kad zaleže, odma postane inzvicijan;;uvik nešto oće, uvik oće da se neko vrti oko njega, e pokrij ga, e koja je ura, e jema li ća slatkoga; i ukućani željni arije, štufi bolesnika zafalidu Bogu ća si doša, i sad kad si ti doša, oni moredu izać vanka!!
Iznesu prid tebe sve ća jemadu u kuću, i vino i rakiju i spizu, samo ti lipo stoj i ćini društvo bolesniku!
A jeste li opazili da ćim je bolesnik u kuću, odman je kuća puna blagoslova, svašta se u noj najde i za ist i za pit, je je , a još je bolje ako bolesnik jema veliku fibru;; 39 joli 40, onda bolesnika moraš ostavit na miru, jer onda bolesniku sve smeta, duvan nesmiš pušit, i lipo pustiš da on leži, a ti greš u kužinu sa ukućanima na spizu i ćakulu; lipo sidite, idete, pijete, ćakulate, i još zatvorite vrata da nećujete kad bolesnik zove!!
Tako da svi jedva ćekaju da se neko malo razboli i da krenu u vižitu se naist i napit.....
Ludi grade
Post je objavljen 18.02.2007. u 19:11 sati.