Marketing
Maškarano Valentinovo
Naizgled nespojivo, ali eto, kako nisu svi mogli poć odjedanput, mojoj Vinkici se spojilo Valentinovo sa Maškarama.
Ne znan je li ovega bilo pri, ali onome ko se sitija ovo napravit, svaka čast! 
Jema glavu za u Ligu naroda! More bit da je kome i puno sedandesetipet kun za oti izlet, nikome nije laka, ali kad san vidija onu pustu dičicu, ciku, veselje, smekšalo bi se i Bračko Srce, a di neće ovo moje. I od Zakonite, naravno, da ja sad ne ispadnen Autokrata. 
Već san napisa da je mojoj Principessi ovo čista trica:
Prvi izlet brez mame & tate!
Prva vožnja vlakon!
Prve maškare!
Eto, jedva je dočekala. 
A malo je falilo da ne pođe ... cilu noć je kašjala, i jutros je kašjala. Napeto. 
Pa mirenje fibre. Nima! Jupiiiii! 
Je da i dalje kašje, ali eto, barenko smo se odlučili da more poć. 
Da prostite, ovo pričan iz druge ruke, jerbo san ja iša na posal, a Zakonita i Teta Nada su je pripremale i maškaravale.
Plač, suze i itanje po podu su bile prve Vinkicine reakcije na kostim. 
A lipo ga je sama izabrala! Ženska posla! Ali, kako je dite naviklo stalno nosit gaće (za sjevernjake hlače) tako je njoj suknjica, koja je dil kostima, bila malo teža za prihvatit. I to još onako iza sna, dokle je samo jedno oko bilo otvoreno.
Ali prvi pogled u ogledalo je doveja stvari na svoje misto, osmjeh od uva do uva i sve je bilo u redu. 
Jedino je još malo tribalo prigovarat okolo pituravanja po faci, ali i tot je pogled u ogledalo sredija stvar ...
... osin ča kašje i dalje ... Grrrrrr!
I tako su ti one mene dočekale na podan skal, kad san doletija da je pribacin na zborno misto. A veselja!
A tek ono ča san vidija u vrtiću ...
... velika zbirka najraznorazniji princezica, vražićaka, indijanki, gusara, betmena, supermena, kauboja, indijanaca i svega ostaloga ča je maman i tatan moglo past napamet.
Ča ono reklamiradu na televiziji, prve tri godine i tako to ...
... Ja mislin da će Vinka ovo pamtit malo duže. I neka. Stvarno su najslađi sad, kad su sitni ... a do skule, puberteta i prvi izlazak vanka jema vrimena ... da i mama i tata malo očvrsnu.
A sad u nove pobjede ... maškare, one prave, velike, su prid vratima, prognoza govori da će bit lipo vrime, nadan se da će ovi put i pogodit, jerbo mi se baš i ne ponavlja lanjsko iskustvo kad san, a nisan bija jedini, okisa DO MUDANAT i dobro san osta zdrav poslin tega ...
Zdravi mi i veseli, 
a bogami i debeli 
bili ... 
Post je objavljen 14.02.2007. u 10:06 sati.