Marketing
PISMENOST I NEPISMENOST
Kukamo kako nan je veliki dil pučanstva NEPISMEN. A ono ka PISMEN bi tribalo značit da znadu i čitat i pisat, i da ono ča oni napišu SVAKO triba znat pročitat. 
E, ka i sve u nas, za nekoga to vridi malo više, za nekoga malo manje.
Dunkve, naši DOTURI, oliti LIKARI, kako i ko više voli zvta, znali su se pobunit kad in je skinilo ono njiovo JEDINSTVENO pravo da nosu prid imenon i prezimenon ono DR. Neka, judi su to pošteno zaslužili. Svaki fakultet je težak, ali MEDICINA posebno. 
Pusti semestri, mislin barenko oko 5 godin, redovno, pa sa moraš činit obligan da te pošaju na specijalizaciju, pa staž, pa biću dobar, pa napokon taman prid penziju dođeš do nike crkavice za otvoreit svoju ordinaciju.
Neka, judi jemadu u svojin rukan tuđi život, nije se za igrat sa njima ...
Sve mi je to jasno, samo kako se u te puste godine NE NAUČI PISAT TAKO DA I SVAKO RAZUMI.
Pa nije vrag da se u te puste semestre ne more uvalit jedan mali kolokvij brzega pisanja.
Nisan likar, ali san nikad davno (Božeoprosti, u JNA) bija telegrafista, i moga san primat 130 znakova u minuti, te i urednoi zapisat olovkon VELIKIN ŠTAMPANIN SLOVIMA tako da i iza mene more i malo dite pročitat. A ne smatran se nekin posebnin skribomanon. Tako, ako je čovik sposobhan završit medicinu, valjda je sposoban savladat i tu minornu vještinu, koja bi puno olakšala život judima koji in dopadnu u ruke. Ne daj bože zla, sve se likarije SLIČNO zovu, pa bi diko koga mogla dopast i ne daj Bože, kriva likarija.
Da se razumimo, ne mora on mene učit medicini da znan zašto je ovo ovako, a ono onako. Čovik radi svoj posal i neka.
Ali, je li mi se mora dogodit da nakon pregleda male Vinke u likara u subotu (iz Kaštili u SPLIT), pođen u apoteku dignit lijek, a ono mi iskusna apotekarica vrati ricetu sa komentaron:
«Skužajte, šjor, ali ja ovo ne mogu pročitat ...»
Žaj mi je samo ča se od grinte nisan sitija skenirat i ricetu, jerbo je ovi ka nalaz mila majka kako piše na riceti.
I tako je vaše @umorno_oko moralo na popravni, nazad u likara, vozit tri kvarta od ure, čekat ka mali mujo red, jerbo je to popodne bila dežurna, pa da mi drugi likar objasni ča piše, pa onda nazad dignit likariju u apoteku.
Post je objavljen 21.01.2007. u 16:45 sati.