Marketing
Update ... update ...
Danas je bilo tako lipo vrime da me je čisto straj ča će bit kad zazimi ... Bilo je pri podne barenko dvadeset stupnjev, ako ne i više. Toliko lipo da san sa Vinkicon moga komodno izać na balkon u bolnici.
A zašto bi, moliću lipo, triba izać na balkon?
E, judi moji, ipak krv nije voda ... danas van je bija aero miting ili kakosetovečzove oni par piloti i par avioni ča jemamo su se malo tumbulavali i igrali na vatalo poviše gradske luke a onda bi bilo ko će pri do Brača i do Šolte.
A kako in triba malo više mista za okrenit se, prošli bi na skoro desetak metri od našega balkona. 
A Vinka ... malo je reć da je guštala. Skakala je od sriće ... koliko mene pamćenje služi, nisan se ni ja ovako radova kad san prvi put bija vidija ovako ništo. Vinkin tata, nesuđeni pilot ... kako je to davno bilo ...
Potega san par slik ... onako iz ruke, i onda san tija Vinku malo vratit u sobu, da mogu slikavat su dvi ruke i uvatit koju "brzu" slikicu kako triba ...
Ajme greške. Plač! Suze! Gledala me posli još barenko onin pogledon tipa «kako si mi to moga napravit». Mea culpa! Svečano obečajen da ću je vodit na prvi sljedeći aeromiting, makar mora potegnit do Zadra.
A zdravlje?
A ča mislite, da nije sad kakoBogzapovida, da bi je nosija na balkon ...
Evo već dva dana nima fibru, samo malo uvečer, nisan likar, ali mi se pari da gre na bolje ... još tu i tamo zakašlje, ali to, prima onome kako je bilo početkon prošle nedije ... pari ka kalumela
. Najlakše je sad reć NE PONOVILO SE ... ali, kako su me svitovali pametniji i iskusniji od mene, ovo je dobivena bitka, ali rat tek triba dobit .. rat protiv bacili, klic, bakteriji, virusi i ostali beštij ... rat koji Vinka sama, sa svojin imuniteton mora dobit. Tata bi joj toliko volija pomoć, ali ne more.
Mogu je, na primjer, dignit iz vrtića, ali onda san samo odgodija sve za godinu dan ... od tega ne moreš uteć, samo stisnit zube i naprid. ZDRAVI mi i veseli bili ... i kamo sriće da svaki post ovako od gušta napišen 
...
P.S. Još se jedan put ispričavan ča su slike ovakve kakve su ... moglo je to ispast i puno bolje, ali ipak uzmite u obzir da san u jednoj ruci drža Vinku a u drugoj aparat 
Post je objavljen 11.12.2006. u 05:23 sati.