Pregled posta

Pa, kaj to ni čudno?

Svega je za videti v životu. I to je tak normalno. Svaki dan vidimo svega i će se niš bitno ne menja je sve normalno. Z vremena na vreme čujemo kak tu i tam postoji neko čudo. Se ljudi tomu čudiju. Tak je to z piramidami kaj su ih stari Egipčani delali, pa i one od Indijancih. V novije vreme se pripoveda i o nekim bosanskim piramidami, al koliko mi zgledi, ih nisu Bosanci delali. Oni ih buju samo pronašli. Čudo. I tak se setim kak sam po letu, kad sam bil tam v dolini Plive, videl špic-brege i se čudil kaj su kak neke piramide, a nis još zaprav ni zapazil, da baš vu ova vremena, pronalaziju te piramide. Nisam čul za ove tu uz Plivu, al meni su zgledele kak da su to baš. Sad se sećam i Pelistera v Makedoniji, gde sam negda vu vojske bil. Je taj isto kak velka piramida. Na sve strane same piramide.
Su ljudi vekima tu živeli i sve je bilo normalno, al odjemput, kak su se neki pametnjakovići zmislili to o piramidami, je to čudo postalo. A piramide? Pa valda ih je neko zidal. Čitavoga brega? Pa valda; zakaj ne. Je zapraf samo pitanje z kakvoga kamenja. Če zidaju s malima, ni neki problem, samo kaj se moraju puno sprešetavati. Ak ziđeju z velkima, je već frka. Ni lahko velko kamenje nositi vu brega. Da meni veliju, da napravim piramidu z velikm kamenjem, bi, al bi mi puno više vremena trebalo. Prvo bi nametal kamenja vu ravninu, kaj bi ih bilo za celo dno, a onda bi nasipal zemlje okolo i to tak, da se nebi ni osetil uspon. Onda bi novo kamenje metal, kak drugi red. Trebal bi ih malo manje. Posle bi nasipaval zemlju tak, da obadva prva reda zatrpam, a moral bi i malo dalje nasipati da se nebi osetil velki uspon. I sve bi tak delal do zadnjega kamena na vrhu. Kad bi sve tak lepo napravil, bi sve onda odtrpal i bi ostala samo piramida.
Kad si tak razmišlam, vidim da bi mogel to delati i sa dost manje nasipavanja zemlje. Bi samo delal nasip il dva na daljinu, a po njima bi pelal kamenje na gornje nivoe. Na kraju bi samo te nasipe maknul.
Sad sam se zmislil, da bi se moglo skopati velku rupu i to veću nek kaj bi piramida bila. Onda bi kotrljal nutra kamenje i dol ga samo poravnaval s zemljom i tak red po red. Na kraju bi trebalo samo raspelati suvišnu zemlju na daljinu, da nebi zgledalo kak je piramida v rupi.
Morti i od vas neko zna još nekakvi način za piramidu napraviti. Jelda da ni neki problem? Treba samo malo više delati. Mi pada ideja na pamet, da bi i mi u Hrvatskoj napravili koju. Zakaj nebi i mi imali svoje piramide i to čak i da je saziđemo. Buju nas pamtili tisućama godina. Onda naši potomci nebuju imali problema dokazivati kak dugo su tu. Da su naši kralji piramide zidali, a ne se samo tukli, nebi sad morali dokazivati, da smo tu od sedmoga stoleća.
Sad je valda jasno da piramida i ni baš neko čudo. Samo treba malo više rintati dok se ju napravi.
Kaj se čudih tiče je tak i z onim velkim i dugačkim zidom kaj su ga Kinezi zgradili. Njima ni problem niš dokazivati. Imaju zid i sve je jasno.
Znate, nekaj je čudo sve dok se misli kak se to nemre. Bi tak na primer čudo bilo, če bi Štef za gemišt rekel: 'Fala nebi.' Čudih je zapraf puno kakti moguće biti, al se retko događaju. Baš zato su to čuda. A da bi čudo bilo, je treba se i dogoditi il napraviti. Kakvo je to čudo kaj se nigdar ne dogodi?
Onda se ja pitam, če se nekaj dogodi, da to i ni čudo, zato kaj se je i dogodilo. Je morti čudo, kaj to ljudi ne razmeju. I tak mi sve više zgledi kak je čudo ljudska bedastoća. Su zapraf bedaki originalni, a to već je nekaj. Tu i tam se za badaka veli čudak. To pak znači, da čuda postojiju dok je bedakof. No, ni baš tak, kaj baš i ne mora čovek bedak biti da nekaj ne razme. Smo tak napravleni, da dost toga nemremo videti, a ni osetiti. Tak ima raznih zračenjih koje ne osetimo. Svetlosna zračenja su nam ok i prek njih gledimo i vidimo. Tak mislimo da znamo kaj je to tu. Se veli: 'Pa sam videl.' Ja se pak pitam: 'A, kaj to?'.
I sam počel z čudima, a bi se sad pital nekaj najjednostavnijega. Kaj je to živlenje? Se to retki pitaju, a kad ih se to pita, bi lahko odgovorili: 'Bedak jeden, pa kaj ne vidiš.' I onda si ja mislim: 'Kak je njemu lepo, a meni to kak pravo čudo zgledi.'
Prijateli dragi, najte se preveč čuditi, kaj čudih morti ni ni. Morti mi to sve skup ne razmemo. Smo tak napravleni. Al ja nekak mira nemam i se stalno nekaj pitam. Pa, se čak i pitam: 'Pa, zakaj se to pitam?' I tak vreme ide, a ja gruntam. Se kakti z čudima zanimam. Pa, kaj to ni čudno?
Dragi moji sve vas srdačno pozdravla i voli vaš Mladen ...

Post je objavljen 08.11.2006. u 14:17 sati.