Sedim si i razmišlam. Svega u te glave ima. Svakaj se premeće, kak da je zapraf. Sve kaj osetim tam je i tam ostane. Tam negde v dubini, kaj zajti bi van moglo, gdo zna kad.
Leta su fajn prešla i svega se zgodilo. Je bilo lepih, a grdih cajtih. Mi sve to leti kroz glavu kak mlazni avion. Ne stignem niš pošteno z toga napravit. Se samo zmišlam i kak da je bilo si mislim. A ja kak da samo sedim i gledim. Kam? Kak v neku dubinu, tam, nigdi. Gda me vidiju si misliju: 'Glečte jadnoga čoveka kak se zamislil.'
Sede lasi, već zgužvana faca, zubi već potrti, grintavo se drži, al još se neda. Ide. Škripi, al ide. Kam? Pa, v budućnost, kam bi drugde?
Kak da je tek počel, kaj zapraf niš još ni ni napravil poštenoga. Sve kaj je mislil da dela, se ni napravilo. Nekaj se raspalo, a nekaj još se treba delati, a nekaj se samo mislilo. Se čuti je kak negdo nekaj je napravil, kak negdo nekaj ima, kak negdo je vreden i skrben i sve tak. Lepo, bog i bogmeš. A ja, kak da sam tek na početku. No, dobro, kaj je, je. Nemre bit da niš ni bilo i da se niš ni napravilo. Nekaj ipak je ostalo i iza mene.
Četri komada dece. I su svi nekak, da velim, OK. Lepo mi se toga zmisliti. Rasteju. Bogu fala. Nis od onih kaj bi im nekaj ostavil. Nemam kaj. Otkupljivam stan, al sam zapraf proleter. Ovi mladi ne razmeju kaj je to. To su oni kaj niš nemaju, neg ruke za delati i kaj moreju ponuditi samo svoju radnu snagu i ak bog da znanje. Pri meni ni to više ni nekaj, kaj sam pred peniziju. Stana otkuplivam i to bu još oko 12 let trajalo.
Slušam kak neki pripovedaju o gruntima, zemli, šumi, nofcima, biznisima... Mene je to sve štrajfalo. Bil sam, kak danas veliju, komunjara. Sam to gledal kak poštenje, pa su me i pajdaši po tomu prešli. Si je svaki znal, kaj zapraf vredi. Ni mi žal. Naj im bu. Ja sam mislil o drugim vrednotama. Ja imam ono kaj v ruku se prijeti nemre. Kaj ne pripada nikomu. Imam toga tolko da navek to mogu deliti okolo, al puno njih to ne vidi.
Gledim okolo. Tičice, kukci, pužeki, gliste, mravi, svega na sve strane. Sve nekam ide, sve nekaj dela, živi. Kad zidem vjutro van, za na posel iti, su mi prvi susreti s kosima. Su v parima. Tak jučer vidim jenoga kosa bez kosice. Ga gledim, kaj polako idem, i ga onak pitam: 'Di ti je ona?'. Je onak nekak, ne baš veselo, skakutal i pogledaval se okolo. Je kak čovek. Sam mu sve dobro zaželel i prešel dalje. Vidim uz živicu trage pužih i jenoga zdroblenoga. Ga je po noći morti neko nagazil. Kak je njemu pak strašno bilo. Valjda je kratko trajalo, bogek moj. Zsušena glista, valda još od čera. Kaj ja tu morem? Sam puno put tak glistu z puta maknul, kaj sam videl da ni dobro tud iti. Ovoj je prekesno. Blesavo je gledim i si mislim, kaj zapraf život je?
Tu jen od domaćih cuckih se leno vleće. Bi na cestu štel. Ga gledim, a on i mene. Velim mu: 'Nejdi na cestu, te bu auto.' Ak me ko videl si mislil: 'Gle bedaka kak z cuckom razgovara.' Kak da me razme, me gledi, al ipak ide na cestu. Si svoje grunta. Vidi i on da ide auto i se vugne na pločnik k meni. Pa ni nor da ga auto blebne. Kak idem na onu jako prometnu Zagreb – Sisak, a dripec se nakanil ne od mene maknuti, se mu okrenem i mu direkt v lice velim: ' Ajde doma, te bu tam na onoj cesti auto drapil.' Malo naheri glavu i kak da čeka kaj bum mu još rekel. Tak se gledimo, pak si mislim da me valda razmel i se okrenem i pem dalje. Par korakih i se okrenem natrag, a on opet za menom. 'V autobusa nebuš mogel, a ak ostaneš na stanici, ko zna kaj bu?' Moram ga nekak poterati doma, makar ni neznam čiji je zapraf. Pokažem mu z rukom prema natrag i opet mu velim, kratko, kak da ga špotam: 'Doma!'. Ma figu. Bu on mene slušal. Si mogu samo misliti. Sad se ja z bogekom spominjam o tomu i kakti da bu to, kak treba, biti. Naj cucku samo niš grdoga nebu. Sam skrenul na stanicu, a on gledi aute kak juriju. Ja onak z stanice, bogeka molim, da bu kak smo se dogovorili. Si mislim kak siroti niš ne razme i kak buju samo najemput gume zaškripele.
Gledim i sebi verovati nemrem kaj vidim. Je cucek gledil aute i kad je bilo za prejti je lepo prešel prek. Si je točno zračunal gde i kad treba. I ni to samo sad. V Gorici je puno cuckih. Stalno prelaziju prek ceste. Neki dojdeju do semafora i čekaju, da čovek ide prek, pa uz njega. Nema veze kaj ga ne poznaju. Drugi pak gledaju kad autih ni. Retko kad kojega auto pokupi. To je tak z onima lutalicama.
I tak se ja družim sa svima njima. Ih gledim kak sebi ravne. Neznam ni jednog cucka da grunta ima. Penezih pogotovu. Ste vidli kojeg, da je z penezima v dućan išel. Ma znam ja one kaj v gupcu doma gazdi novine nosiju. To je čist nekaj drugo. Bi rekel, da taj cucek zaprav razme i poštiva gazdu. Si cucki ipak med sebom reda delaju, na neki svoj način. Oni muški na svaki čošek nogu digneju. Oni to tak.
Gledim ja sve to i nekak kak da razmem da sam v svemu tome i ja, al ne kak neko kaj je neko, nek kak da sam po svemu tome. Su i svi ti tičeki i svi puži i svi mravlji, gliste, cucki i gdo sve ne, kak del mog živlenja. Nikaj nije moje, kak nekaj gde sam vlasnik, nek sve je to kak del mog živlenja. Gledim i osećam kak sve to se menja i jeno drugom nekaj znači. Kaj bi tu nekaj trebalo moje biti? Pa, sem tu, a kaj više treba.
I tak si razmišlam o nekih stvari, kaj počneju se v glave vrteti, a čist na drugo zajde. Baš kak i v ove priče, kaj sam je tu del. Tak to ide. Živ sam čovek, gruntam, gledim....
Prijateli dragi i vi ste tak del mog živlenja. Vas najlepše pozdravla i voli Vaš Mladen i poglečte koji put cucke. Oni vas glediju i čekaju kaj bute .. :)
Post je objavljen 16.10.2006. u 15:14 sati.