Marketing
Sveopći preserans (dio deveti)
Sjeverna Koreja
A lipin mojin Amerima proradila crijevca! Proradila in probava gospemoja ki nikada prije! Eto ča nuklearni pokus u bliskon susidstvu ćini za ćovikovu probavu – ma ćuda!
Do sada in bilo lako lajat priko bare, daleko od svickih sranja i dometa svakojaki´ projektili, ma se sada i Jenki panićno češe odostraga – Sjevernokorejac mu puše za vraton. Pa velu da je to puno opasno ča je oni nestabilni Kim dobija Bonbu. Pa se mislin, a ča je glupavi Kravuboj Buš kad je iša lažiman na Irak - stabilniji? A on nima Bonbu jednu nego i prikojednu. Ili ruski međed Putin ča je ne trepnuvši okon potaraca svu onu dicu u Beslanu? Ča je i on stabilan?
Blago namin s takin miro-tvorcima. Manje miro-, više -tvorcima. Pocrkaćemo svi, ako ne od Bonbi onda od njijova - smrada.
Pinokio
A naš se zdrastveni Pinokijo sav napuva ki žaba, sav se on našepurija ki paun na fažolu ili još boje - ki krava na ditelini, a sve radi ćega? Radi neke tamo ankete! Pih!
Da po toj anketi naši judi puno volu doture i da je oto puno pošćen i dobar svit ča ne juzima mito ni kuverte (ma jok to se namin samo ćini) i da je ota anketa pokazala kako najboje zdrastvo na cilem svitu jemamo i da po otoj anketi naši bolesni samo ča se ne tuku da u bolnicu uđu – jer tako in je tamo venomenalno! Da tamo nima konrupcije, da tamo nima šporkice, da tamo nima ama tebe ničega nevajaloga – da tamo nima ama baš ništa da bi bilo išta!
Božemoj – utopija! A sritni li smo, sritne nacije Kroacije gospemoja!
I oto nema nikake veze s otin ča je anketa provođena u tin istin bolnicaman.
Ma to van je apasolutno ćisto, to van je van svaki´ sumnji, to van je..
ma kako bi to ćovik slikovito opisa - to van je ka kad kauboj prilipi rivolver na pipnićarevo ćelo i veli: Neš´ natoćit, a?
Pa ga ti ne natoći.
Fidel
Velu Videlon opsjednuti Ameri, da stari Metuzalem boluje od opake bolešćine želuca i da mu i jopet nema spasa. Ajme štaćemo sad?! Štaćemo sad jadna nan majka, štaćemo mi brez takoga mladca? To je taka šćeta! Ma tako ćudo svicko judi moji, da jedan taki vitalni mladić boluje od opaki´ bolešćina! Ma kuće na takega mladića opaka bolest, a božesaćuvaj ko je za to uopće čuja! A tek je život bija prid njim!
Samo, sve se nešta mislin - ma da je staroga ćapala i kuga i šuga i sida i trubekuloza i tićja gripa skupa sa kurjin oćima i dioptrijon minus dvanejst – kaka bi razlika bila? Umra stari od ovog ili od onog, opalila ga cigla ili preplanula Kubanka, šta je sad uopće bitno od čega će odapet?
A biće je bitno samo Jenkijima. Da mogu reć´: Zato jer je bija zloćest, zato ga je Bog uzeja prije vrimena.
Je. U stotoj.
Svi se pravu Englezi
Stižu Englezi. Tako velu.
E i?
Evo i mene.
A borati, zar ću biciklon u Veronu?!
(a sad se vi mislite kake to veze ima s ičin)
...a na Bestseleru...
Post je objavljen 11.10.2006. u 18:39 sati.