Pregled posta

Napokon nova frizura!

Rekla bi, oču reć napisala bi, moja Vinkica, da je kojin slučajen molat da dođe do kompjutera. Eto, i meni se čini da smo jon mogli malo skratit kosu i koji misec ranije. Mea culpa! Sad ovako pari ka nika mala gospojica, a i ne triba micat kosu kad kažije rečine. Čista ženska posla. Kad je došla doma iz frizeraja, svaka dva minuta je bila isprid ogledala.


Sve jon je to sad novo i zanimljivo. Ka i Strikanova torta. Dunkve, Vinki ne vridi torta ako nima svičice. I kome bija da bija rođendan, ona triba puvat svičice. Tako se i za ovu prekrasnu tortu od marcipana, nima veze ča na njon piše "sretno mladenci" morala nač na brzinu jedna svičica da Njezino Veličanstvo jema u što puvat. Da van je bilo vidit kojon su brzinon baba i dida zunzili po kući tražeć malu šteriku. A da san i ja ča zamolija da mi nađu, poslali bi me neču van reč di. I onda če mi oni prvi reč da smo razvicijali mlaju, da skačen ka oparen kad počme plakat ...
E, i skoro da san zaboravija: danas je prvi put užgala šunferine. Sama! Ničin izazvana! Osidija san i ovo malo ča mi je bilo ostalo "ne-sidih" vlasi na glavi ... prošlo mi je stopedesetiosan filmov kroz glavu. Brrrrrrrrrrrrrr! Stresa san se i pri samoj pomisli ča bi moglo bit da je bila sama doma. A onda je palo cijepljenje! Pa ne smiš, pa to je grubo, pa mogla si se zapalit, bla, bla, truć, truć, po ure u komadu. I sve ona uredno klima svojon malon glavicon. Jo da mi je bilo znat ča se je u tome momentu zbivalo unutra. U njezinoj glavici
Eto, sad je stvarno dosta, moran poć leć. Pukle su mi već dvi štikadente za pridržavanje očnih kapaka a i vidite sami koja je ura. Umete me ovo kad Zakonita radi pozapodne, pa je mala, po zapovidnoj odgovornosti, kod mene. Pa se ne more nikako dospit sve napravit ... pa se mora radit do sitni uri, ka ča i morete vidit ... i kako bi ono pivala Nadalina "vaja poč leč", barenko ovo par uri do izlaska sunca. I novoga dana.

Post je objavljen 29.09.2006. u 03:31 sati.