Marketing
Sveopći preserans (dio osmi)
Mađarska
Bog te vidija ča Mađari prašu! Ko bi reka da ´Serekeš-kerekeš´ imaju otega u sebi, a?! Ko bi reka da in je fitilj tako okraća? To popizdilo, to podivjalo, to se najelo oni gljiva ludara, a cili ti đumbus radi čega?
Jeli in morebit neko opjaćka penzijanere? Jeli in morebit branitejska populacija vrši kolektivni suicid? Jeli in morebit neko vršija pritvorbu? Jeli in morebit neko jamija ča je jamija? Ma jok! ´Serekeš-kerekeši´ uvatili Pramijera da in je laga. Jebate. A ča bi da je ukra?
I di je na kraju krajeva DrIvo i da li on ovo gleda? Dobro veliš svitu moj, di je da je- privrnija se od smija. Već dugo nije čuja bojega vica.
Žedne priko vode
A ča naša Vlada puno brine o našemun zdravju, gospemoja sve min suze od milinja na oći prštu! Kako oni brinu oćemo li mi juzet lika ovega ili onega i kako oni brinu oćemo li juzet pravega ili degenerićkega ili kakoli se već oti vrag zove! Kako oni brinu oćemo li mi znat ča je ovi a ča je oni!
Toliko je njiman do naše dobrobiti i zdravja stalo da ne štedu pare ni na reklamu ni na teluviziju, štede samo na zdrastvu a ča je to – ništa, dobro veliš svitu moj. I kad ja otu degenerićku reklamu gledan, sve min dođe naše Vlade žaj, ča se tako bidni muče da oven blentavon narodu objasnu ča je normalan lik a ča je malo manje normalan lik, i da su ka oba lika totalno potpuno konlpetno apasolutno ista, ijako je ovi normalan a ovi je isto normalan ali malo manje.
A to van je svitu moj tako jednostavno i (naravno) normalno. Gledaj vamo – to van je vako: Iđu Sujo i Mujo ulicon i obojicu ih u glavu opizde dva cripa. I oba panu na mistu mrtva (Sujo i Mujo, a ne cripovi).
E, ali nije van to poenta ča su nji dva mrtva! Poenta je da je jedan crip – crip. A drugi crip je – Tondah. Crip vrjunske kvalitete.
Lažni pokajnici
A oni Agća ča je pokojnega Papu - iša metkon pozdravjat, novemun Papi iz pržuna porućuje da u Tursku ne triba ni dolazit! Da mu je boje da se tamo ne pojavjuje i da mu je boje da ga on tamo ne vidi, jer je puno na njega zbog ovi friških izjava jidan (biće bi se i s njin iša metkon rukovat).
Sve se mislin, taki moralni autoritet, taka duhovna vertikala, taka svetost od ćovika, takav osvitlani obraz, taka bitnost - mora da će Papan baš njega slušat.
Mali crni leteći objekt
A nakon prvega ćovika turista u svemiru ča se zvajo Tito (i ko kaže da Tito nije živ?), evo namin i prve ženskinje turistice u svemiru, a ne zove se Jovanka (šćeta). Odvelo žensku gori da vidi malo svemira, malo Zemje, malo usiše, isfrega, pokupi paućinu - a bilo je i vrime!
Jer eno nije gori ni došla a odma niki vrag! Odma nešta prid prozoron, nešta – malo crno leteće! Niki vrag je, niki mali crni leteći objekt velu astronavuti. Pa ih uvatija straj da ča je sad ovo gospemoja?! Morebitno mali zeleni crni ča leti skupa s njiman iston brzinon, iston visinon, istin puten, di oni - tu i mali crni leteći, sve ih prati vrag mu sriću odnija!?
Pa neka ženskinje gori da in prozora opere.
Hjuston no problem.
(Da mali crni leteći objekt… he-he, mali crni… da… mali crni leteći… hm…) ;0)
Post je objavljen 20.09.2006. u 22:24 sati.