Marketing
Deja vu!
Ma vidi poliglotskoga naslova ... reka bi koji salamunić ča se krije meju van 
a meni je to sinoć prvo palo napamet ... opet na hitnu, opet mala Vinka jema na repertoaru ariju Rigoleto, samo ča je ovi put to sve bilo pinku lakše ... ali ono ča se reče, koga je ugrizla zmija, biži i od guščerice. Kako smo se bili pri malo više od misec dan ispekli, tako smo ovi put već na prve naznake dižgracije partili na dječju hitnu i poduzeli priko potribne korake. 
Baš se čovik uči dokle je živ. Nije bilo gužve, a i naletili smo na jednu smišnu (za sjevernjake: simpatičnu) mladu doktoricu koja nas je lipo umirila, mala nije dehidrirana, i poučila nas je kako sami, onako za prvu ruku, moremo vidit je li ili nije potribna infiuzija. Naravski, nikome ne pada napamet igrat se doktora. Mislin da smo ipak malo pristari za to ali dobro je znat, zlu ne tribalo. I kako nadoknađivat tekućinu, i sve pomalo ... lagano, smirilo nas je, a bogami i malu Vinkicu. Pa je teti doktorici pričala kako je bila na utakmici, umisto da počme glumit vatrogasnu sirenu čin vidi bilu monturu (za sjevernjake: uniformu) Bitno je da je na kraju mala ipak išla prispavat doma, i da pozapodne opet triba u svojega likara. Fibrica je malo skočila, u podne nije jemala, pozapodne ćemo vidit ...
Najbitnije je da ona nije onako lešo-lešo ka nazad misec dan, kad smo je morali ostavit u bolnici, nego da trče po kući, provaje materine postole
i viče kako će u subotu opet na utakmicu. Sva srića da je reprezantivna pauza, pa da dvi šetemane (za sjevernjake; sedmice) nima utakmic, a da ga vidin ko je neće opet odvest kad bude lipo vrime 
Kad smo već kod vrimena, pun mi je kufer ovoga ni-juga-ni-bure, sve mi se pari da ćemo opet u kratke rukave do Svi Sveti, a onda u dva dana uletit u kapote. Isto ka da je ko ukinija proliće i jesen, a ostavija samo lito i zimu. 
Stojte mi dobro, i nadan se da će slideći post bit malo svitliji i veseliji 
Post je objavljen 29.08.2006. u 13:47 sati.