Pregled posta

Sveopći preserans (dio treći)

Blair

A niki dan se našli naš i njijov, jelte - prvi ćovik. I grlu se i jubu njizi dva, ovi njemun: Ivo darling, a ovi njemun na mućo lingveški ingleški: Toni maj darling-darling.
I gledan ja nji´ gledan i sve men niko milinje vata, sve min lajbek daće od ponosa puknit ili šta bi baba Ika rekla sve men nešta podna sise stišće.
Gledan vamo onega Blera u crno jadan sav problidija, sav se on zakukajo, fali mun vitamina-blitve-janjetine šta li?! A kraj njega naš Ivo sav on propupajo sav se on raširija i sav u bilo ki mlada ili drug Tito na Galeba, pa sve na njemun od zdravja puca samo mun buketić fali ili jabuka u justa. Vamo Bler ki srdela, a naš Ivo ki zubatac. Vamo Bler dva klempava uva – a naš Ivo dva podbratka! Eto van Inglezice sad na - ća je muškić mediteranjinjo, padajte u afan od tolike lipote!
I sve se mislin đaba Ingleskoj Bler ma mi jemamo DrIvu mućos kilos!
A puno je toga lipega Bler našemun Mućos Kilosu obeća! Puno! I Vropu i jare i pare, a ja mun sve virujen slipo. Ja mun sve slipo virujen ka i svakomen Inglezu prija njega ča je ovin prostoriman haraćija, baš ka i onomen lord Owenu iliti po naški Ovnu ča je i Rvacku i Bosnu dilija pa u Beograd trća Slobodanu daprostite u gujicu uskakat, a danas drugi misto njega za otu istu stvar u Haagu na ćućavac ćući. Eto tako ja Bleru ka i otem ovnu slipo virujen, pogotovo okad je dušu proda onen Amerićkon Kravuboju, jer samo slipac mere tako nešta ućinit. Samo slipac i naš Mućos Kilos ča sad misto Blera u Beograd iđe. E, a di će Inglez u gono taknit ka´ kolonija mere misto njega.
I evo i jopet me ono neko milinje vata, božemili sve nešta ka da ću povratit.

Kukavice

A baš bi bilo lipo da lord Ovan u Rvacku jopet svrati, ka slućajno bi ga smistili u Biljane Donje, među onezin lokalne ´junaćine´. Tamo bi ositija punu rvacku gostojubivost - kamen u glavu, nogu u prkno. I nije da ne bi zaslužija, za razliku od one sirotinje ča je na rvacku sramotu stradala. Ali neka Ovna tamo di je, ja bi malo o ovin našin ´rvatinaman´. Lako ti je na sirotinji dolezin glumit ´eroja, ić po mraku u tuđe dvorište kamenovat tuđu kuću. Nego aj´ ti brajo u Beograd usrid bila dana - pa tamo baci kamen ako imaš muda! Ali nemaš ne boj se, smećadi jedna kukavićka! Sve min se ćini da njijova hrabrost iz prkna viri. A bogamin i pamet.
Meni je žaj - da radi takih iscidaka naš Stipe nemere Pricidnika Istoćnog ljubezno prcat, jerbo mu ovi uvik mere nabijat ovaka sranja na nos. Kukavice zatucane kamenobacaćke sve bin ja nji u Bejrut il´ Bagdad. Nek´ biraju.

Libanon

A u Bejrut bi in bilo tako lipo. Ka i doma. Dovojno krvoloćnih budaletina, ka šta su i sami, da te kinje, bonbaju i pošaju u tripićkematerine. I sve pod Bušovin blagoslovon. A to je velika stvar, imat njegov blagoslov. Kuš bojeg dokaza od Izraela! Moš´cili svit jebat u zdrav mozak da nisi agresor nego žrtva i da ne bonbaš susida nego mu šaješ jubićice, samo je susid ka malo glupast pa misto cvića umislija bonbe. I dotur Buš će to potvrdit nevirovatnon tezon da nije Izrael taj koji tuće Libanon nego - da triba reć Siriji da reće Iranu da reće Hezboli da pristanu radit ta sranja i da na kraju krajeva po njegovon mišljenju Iran triba satrat sa zemjon.
A bože moj zašto bi jednostavno – kad mere komplicirano?! A marioneta Bler će nato kimat glavon. A Vropa će okrićat glavu. A G8 će češat muda. A UN će plakat. A Papa će molit za mir. A Libanonci će i daje ginut. Lipo borami.
I di nan je spas? U jubavi lipi moji, u jubavi! Onako kako se volu Ivo i Tony, kako se volu Buš i Iran, kako se volu Izrael i Palestina, kako se volu rvacka nogometna liga i nogomet, kako se volu Marković i zdrav razum, kako se volu Grašo i Danijela!

Velike jubavi?

A kad malo boje promislin, ma ča ta mala uopće radi s oton umišljenon velićinon? Mislin na Danijelu i otoga Grašu. Ona mu bidna i pere i pegla i kuva i sprema i još uz to i piva i pruža seskualne usluge i na stole se penje i govori da ga voli i nema šta bidna ne ćini od sebe. A on neće ni da je zagrli ili božesaćuvaj prizna, da ga morebit Rvacka ili kogod ne vidi. Danijela moja – pa ča će ti taki beskićmenjak?! Aj ti to meni reci. Umislija da je ćunka. I da mere boje. I nogiraj to mala, nije taki vridan silnih godina. Znaš šta velu – treća sreća. Aj budi pametna i sritno.

Post je objavljen 26.07.2006. u 22:42 sati.