Ima bit da malo ko špara, pogotovo ako je podstanar! Parin imberlana. Kako moš šparat a u podstanare bit?! Je lipi moj svitu, štedin! Sad kad bi tribala guštat i činit raspašoj, kupit novu limuzinu ufatili me morbini o'štednje. Dug na tekućen računu naresta je ka kit. Takoc san se sitila prošlu šetimanu ić prošetat isprid Parka, ono kad su stigli Amerikani, piloti! ;) Šuškalo se po Splitu da su oni ka hodajući bankomati i da su sponzoruše, olitiga kurbetine u iligali, išle napunit žepe. Žali bože kako je ote Amerikance bilo vidit isprid 'otela. Nešto izdrpano, nešesno. Oboj meni! Brzo su me prošle nečastive misli o „dodatnoj zaradi“ ;)U 'otelu doznajen da in otkazuju masažu da su prebukirani, jerbo ko će stavljat ruke na onakvu crnu kožu. Thja, otkad su nan postali mrski amerikanski dolori?!! A ima naš svit neki poseban dišpet, pa makar crkli od gladi!!! U novinaman san pročitala da su ostavili pusto dolori (brojidu ih na milijune?) u Split i okolicu, ma se pitan di? Ka da imamo ponudit kakavu zabavu. Bilo mi je lipo vidit da su barenko opiturali ono pinku ograde u Đi Bi koleđu (Centar Juraj Bonaći). To je ustanova za ovu jadnu dicu ča su se rodila išenpjana, bože me prosti. Lipa gesta, pa san se brzo ugrizla za jezik ča san ih sudila po šestu i veštitu. A napravili su i barufe pa gradu. Ono nisu navikli na našu pivu i vino. Brzo bi oni napravili Teksas od našega bidnega kolafjaka grada.
Nego, ja san počela o štednji. E štedin. Za po stare dane... En te robijo! ;)
Post je objavljen 22.05.2006. u 09:26 sati.