Marketing
Dobar jutar!
A ča bi vi tili da van rečen ovako ujutro najranije, kad su me tek prinili iz posteje kad san se probudila. Nije to Vinka rekla, ali isto ka da i je, rekli bi naši stari da jon piše na čelu. Počela je već nova sezona komarac, ka ča se i vidi na Vinkinome licu 
Nije ovo baš ni bilo snimljeno ujutro, vengo pozapodne, kad Zakonita i ja dojdemo sa posla, ušuljamo se u kuću na prste ne bi li Njezino Visočanstvo još malo odspavalo, ali ne vridi. Mala ka da jema radare! Ili dobar njuh! Pa nas namiriše čin se pojavimo u kući. Nikad nije spavala dalje od tri i po. Da se okrenemo na glavu. Ne moreš protiv prirode i gotovo. A puno bi se puti znalo dogodit i da čin Zakonita okrene kjuč u bravi, iz sobe začuje "mama".
Danas san bija upisat malu. Ne u Torcidu, ili namo di ste vi šporkačuni mislili, nego u vrtić, olitiga jaslice, jer je još primlada za vrtlić. Lipo san prida sve dokumente, krštenice, malo nakitija molbu i sad čekaj petak.
Valjda ću bit barenko ovod bolje sriće nego u nalaženju posla za Zakonitu. Neću beštimat, sačekaću petak. 
Možda i ne bude tribalo, more bit sve u redu. Ko zna. Nedokučivi suputevi Gospodnji. Amen!
Post je objavljen 12.05.2006. u 13:16 sati.