Marketing
Moja prva guskica!
Ne bi sad o tome da ka zensko to i triba dobit 
ali taki je kod nas običaj, mislin u Kaštilima, da žensko dite za Uskrs dobije guskicu oli pletenicu, a muško dite dobije kolač.
I tako smo se svi lipo sredili. Vinka je dan pri sa menon odila po butigan izabrat novi hula-hop. Već san reka, ka pravo žensko, nima šanse da uizabere u prvu butigu ... I tako se lipo obukla, i suknjicu, za divno čudo, čak jon je i Zakonita priznala da je bolje u suknjici vengo u rebatinkice, pa smo se tako lipo opremljeni i spremljeni uputili u bake u Kaštila.
Tamo je Vinkica dobila svoju prvu, recimo, pletenicu. I guštala je ka prasica. Još je dobila i veeeeeeliko kinder jaje,
ča je njon bilo draže nego ona guskica, ali običaji su običaji. Idemo dalje, Uskrs je proša, a sutra triba opet poć radit.
Kako ko, rekla koka. Dunkve, Baka-Servis mora koji dan na bolovanje, otvorila je Kavu na bubriziman, pa je dotur jema bit taka čako ča nije smija, i rezultat tega je da se dva dana tresla i ona i posteja u fibri, doveli smo to nikako u red, ali sad triba poć na kanal koji dan da je privižitaju kako triba. I tako ja sad, formalno, radi matere triban poć na bolovanje. Jerbo nije pametno da Zakonita, glede statusa, to koristi, a ja ću već nikako refat. I odradit.
Idemo dalje. Danas ćemo malo propuvat Punta po autoputu, barenko u povratku, i prošetat ako nas posluži vrime. Po Šibeniku. Zdravi i veseli bili, i još botu, Sretan Uskrs!
Post je objavljen 17.04.2006. u 09:31 sati.