Marketing
Cipelice, cipelice!
Moran priznat da moja mala Vinka pomalo poprima sve normalne zenske manire. Nima veze ča je jučer lila kiša ka iz kabla, nima veze ča je tuklo jugo odavle do Otranta, kad triba poć u kupovinu, ništa jon ne smeta 
strpljivo je šetala s nan od butige do butige, jerbo ni njon nije lako nač broj od postoli, a nismo opet tili vazet nike šminkerske koje će istuć u sedmicu dan ... I tako smo našli ono ča je komodalo i nju i nas. I babu Viku koja je financijer 
Već je došlo vrime od spavanja, ali je tribalo poć pokazat postole i jednoj i drugoj babi, i teti Nadi, pa tek onda poć leć. I to, kako spava kod babe Slobodne, nije se dala prominit i obuć babi, a ni dida nije smija napravit čokolino, nego je to sve triba napravit tata, to ka ja, pod njezinin budnin okon i svako malo nije tata tako. Eto, ča ti je poć sa ženskima u kupovinu, a ča će tek bit kad nareste 
Nije još kalalo jugo, ali bar nije oblačno, ko ne viruje neka pogleda na ovi link ča san ga stavija danas, to van je mala kamerica na Institutu, ča kažije osin slike i temperaturu mora i zraka. Vridi naročito za dijasporu, da se malo glođu dok ne arivaju opet u stare kraje 
Post je objavljen 11.04.2006. u 08:41 sati.