Marketing
Jesan jedva čeka ... i napokon dočeka!
A ča si to dočeka, je li sad ćeš se opet opravdavat ča nisi ni beside napisa deset dan ... rečete mi vi. A ča ću van poč govorit, kad, je li, sve znate! Vi ste pametan svit, pa me razumite iz prve :-) Čeka san i dočeka prvi vikend kakobogzapovida, da mogu obuč kratke rukave i učinit đir sa mojon Vinkon po selu. Ionako me dopadne tek nedijon, oli u najboji slučaj još i subota. To mi je tako sad okad je počela Zakonita radit, pa je mala deboto u babe Slobodne ka u internatu. Po cili dan, skoro. Jedino pozapodne je ukredemo malo, ako je lipo vrime, pa se diko sa njon zaletimo. Ali kako to najčešće nije bija slučaj ovi dan, mala je bila deboto ka u kućni pritvor, tija san reč ka u Guantanamo, ali bi se moga Kastro najidit :-) Za Buša više manje. Eto, toliko smo se našetali da je iza podne, kad je došla u babe Vinke u Kaštila na obid, sama krenila u posteju da jon se spava. Kamo sriće i više ovakovi dan. Boje bi bilo, i za mene i za Vinku. Vinka bi bila manje grintava, a ja bi kala barenko koji dek. Malo. ali čovika veseli ...
Post je objavljen 26.03.2006. u 16:48 sati.