Jedva čekan subotu ujutro. A zašto? E, znan ča ćete reć ... da se mogu izležavat u posteji dokle me voja. Čisto sumjan (vidi post «digi se tata») da će mi to mali terorista dopustit, ali nema veze ... jedva čekan subotu, jerbo je onda mala moja CILI DAN. Zakonita radi ujutro, a pozapodne nas ionako potira vanka, da ona more ča učinit po kući.
Biće skakanja po kući, ako bude grubo vrime, ili šetanja vanka ako se ukaže sunce. Nismo već dvi nedije izašli vanka kako bog zapovida, ča radi vrimena, ča radi Vinkine prilade, pa se nadan da ćemo ovi put bit pošteđeni. Sve ćemo obaigrat okolo, a ako vrime dopusti, mogla bi mala ovi vikend jemat PREMIJERU. Ča sad, pitate se vi, oli se i glumit uvatila? Nije, nije :-) vengo bi mogli poć na Šoltu. Evo, mala će skoro uvatit dvi godine, a još nije bila obać Gornje Selo. Da vidi odakle su Garbinovi. Uvik govorin da smo mi šoltanski vlaji, pa mi niko ne viruje. A od Gornjega sela do mora jema na bilo koju stranu barenko po ure usiljenoga marša do mora. I onda jesmo li Vlaji ili nismo? Makar i šoltanski :-)
A i familija, oni ča ne gredu svako malo na kraj, me je udušila da kad ću je više dovest. Eto, ako bog da zdravlja i lipoga vrimena, eto nas ovu nediju ...
Post je objavljen 16.03.2006. u 14:06 sati.