Marketing
Fali mi Reč...
Nejdem puno put v Zagorje. Med huste, prek bregov, do starega trnaca. Imele su ga več zdavna pogoutnule. Repice, črlenčice, hruške... Ne, to se čuje kak da bi rekel Kristijanovič, Brezovački, seminari5sti. Ni več stare fele sadja. Akacija, bezga i gužvinje. Kipec i prilika zdehnutog, vmrlog. Sela, živlenja, cesarščine. Ali, iste tak i jedne, jedine, Reči. Reči na zdehnutju «zadnjega odjela intenzivne» za šteru je Bračak – Walter Reed. Flašu z jestvinom prek šlaufeka natače ji Vitez, okoli njega v belih kutah Histrioni, Spravišče snaži postelju, a Bartolić i Jembrih balzameraju. Kaj spasiju, kaj se spasiti more.
Bu se zbrala klientela i ovoga leta na Opatovini. Došla bu napajat oči na šteroj Juliji ili Ofeliji i blejati kak baš i ne razme Reč. Ali, Reč ju itak ne zanima preveč. Kaj bokci znaju... – to im je preveč barokno. Glamour se denes šika. Zvuna lijepe on, cocktail vu se, a Balogu i pajdašiji gemišt.
Duge nisem bil v Zagorju. Zapekel sem se v korekturi štokavštine. Cmizdrim i vmiram. Jafčem kak stara baba šteri se sin negde v Galiciji raspelisnul, a tega rata su več si pozabili, a ona još čeka i slini.
Sedim v stolcu i gledim Sv. Jurja na Bregu. V pameti mi Krleža. Zdignul je Reči spomenika. Zapekel je tristo let vu jenoga granita i ostavil nam Balade (duh cimpresa). I tak si tugu lečim, ponavljajuči Planetarion. Kak da bi vmerlog još jemput strelil! Z obernutim kepenjkom delam, a pod tim ogertačem Reč cvili.
Nema me v Zagorju. Več sam skorem i pozabil kak Loborec veli mli(j)eke. Jeno malo, kak špena j, zapičeno med i i e. Čuješ, ne veliš. Ne veliš, a vdehneš.
Brišeju li Petrovčani i denes obloke sekirami, a ljudje gostjem daju kruha i luka, pak ječte kaj vas volja? Ne verjem, duge me ni bile, a zaprav ne znam.
Fali mi Reč...
Husta - šuma
Trnac- dvorište
Pogoutnuti - progutati
Repice, črlenčice – vrsta jabuka
Kristijanovič, Ignac
Brezovački, Tituš
Sadje - voće
Fela - vrsta
Akacija - bagrem
Bezga - bazga
Gužvinje – šipražj, zemlja obarsla korovom, slakom
Kipec - slika
Cesarščina - carevina
Šteri - koji
Jestvina - hrana
Šlaufek – malo crijevo
Spravišče – Kajkavsko spravišče
Preveč - previše
Šika - dolikuje
Cmizdrim - plačem
Vmiram - umirem
Jafčem - jaučem
Raspelisnul – nešto poput razletjeti
Pozabiti - zaboraviti
Cimpres - čempres
Planetariom – jedna od balada iz Balada Petrice Kerempuha
Streliti - upucati
Kepenjek - ogrtač
Ogertač - ogrtač
Špena – kao igla
Vdehnuti - udahnuti
Oblok – prozor
Post je objavljen 20.01.2006. u 22:23 sati.