Mislija san da neću nikad napisat ovakvi post, ali nikad ne reci nikad! Znalo se dogodit da se razboli jedno od nas, diko i dvoje, ali nikad svo troje. Da san jema mašku u kući, i ona bi se siguro razbolila. Doduše, Zakonitoj je prilada u stanju odlaska, ali zato cipa po meni i maloj Vinkici. Lako za me, ali muka mi je nju gledat. Kašje gore nego ujac Silve, sa dugogodišnjin pušačkin stažon, a i ja jon ne ostajen dužan. Nisan ovako riplja ni kad san bija u najjačoj pušačkoj formi od cca 3 crvene kutije Onoga ča neću njanci napisat kako se zove. Eto, jutros san bija u likara, mala gre u dvi i po ure, više trošimo na medicinu vengo na spizu :-(
Vinka je grintava; čas bi gledala Teletabise; čas Micumacu. A nan se okriće želudac od jednoga i drugoga :-( Naučija san i više napamet! bar da se oće navuć na koji drugi crtani, da nas sve spasi, ali svi pokušaji dosad su bili bezuspješni ... a Bog mi je svidok da san prova sa svin vrstan crtani.
Evo, sad san udunija DVD player, da moredu Tabisi poć spavat, da malo domoru, jerbo ako vako nastavi, ni ovi player neće dočekat duboku starost, ka ni njegov prethodnik. Unutra stoji samo DVD sa svi šest Teletabisi u DivX formatu i ne izlazi vanka. Ajme!! A mi jemamo šanse pogledat koji film samo kad ona spava, a onda smo ionako krepani sami od sebe i od svoji pidaija ... Eto, ličimo se u očekivanju Dana M, tj. 29. 12. ove godine u 20:00 :-) Sretna van Sveta Luce, Sveti Nikola i svi znani i neznani sveci koji jema fala bogu puno u ovome misecu ... nadan se da ću ove godine uspit napisat još koje slovo ...
Post je objavljen 13.12.2005. u 12:14 sati.