I je, da znate. Ne moreš pobignit od prirode, babina guza je babina guza ma koliko mi šutjeli o tome :-)
Mislija san da je to pluskvanperfekt olitiga prošlo svršeno vrime, kad se Vinki normalizira ciklus izbacivanja fekalija, ili da buden razumljiv, kako je počela redovito kakit, kako je počekla jist "normalnu" spizu ... ali jema bit da se neman vratila ... i sad trči okolo, sokovi, ljekovi, pišiću, kakiću ... pa ajde budi pametan. Svak ti kaže drukčije, i ja bi sad triba bit Mengele pa isprobavat na svome ditetu raznorazne teorije. Ne, hvala! Uzdamo se u prirodu, pa ćemo vidit za koji dan. Valjda će sve bit u redu, radit ćemo kako je dotorica rekla. I gotovo!
Je da i mene srce zaboli kad jon ne smin dat čikolatu, ne smin je ni ja jist isprid nje, da me ne vidi pa počne ronzat. Teško je, ali izdržat ću. Ne smi vidit čikolatu njanci na reklami!
Ali zato je uvatila pik na njoke :-)
To je na strika Nevena, ne more sve bit na babu. Jučer ja u matere jin njoke, a ona oče sest na mene, i oče kućerin. Pomalo, nabada kučerinon njon po njok, i u justa, I bogami, ne pršče i ne baca, ali kad je koji njokić iznervira pa nikako neće u kučerin, lipo se ona maši desnon rukon pa neposlušnika ručno utira u justa. Neka se zna ko je gazda! Kad smo već kod strica Nevena, išla je u njega ka da i nije bija osutan šest miseci. I još plače kad je, onakvi nikakvi posli puta, sa očima na po koplja, iša doma leć. A Vinka udri u plač. Do ponoća nije zaspala. Ovo je mašo!
Fala na pitanju, Zakonita više ne radi. Sad se svi moremo malo više naspavat, a meni ne ostaje ništa drugo vengo kampirat doli kod staroga kampanela, na Rivi. Doli, na Kampanelu, jema najviše golubi. Valjda će mi se posrićit ako me koji golub posere. Samo moran onda molit boga da ne bude gripozan. Pa da mi umisto šestice na Lotu peškan onu pernatu gripu. Eto, sa kakicon je počelo pa neka tako i završi :-)
Valjda se nisan ni ja u Onega Gori nabaciva kamenjen pa će se i mene koji put sitit.
Post je objavljen 14.11.2005. u 22:11 sati.