Ne, hvala na pitanju, nije se jos zaratilo, nije niko zunzija poviše Mašograda i ita bombe, prasice i tome slično. Ne! Samo san mojoj maloj šefici mora poć izvadit krv. Ne ja, nego teta u ambulanti. Tokalo me to jerbo je Zakonita bila na poslu, a meni je ka lakše izać vengo njoj, je li. Zato i je ova slika, jerbo je ambulanta ono ča se samo kantun vidi usrid borovine. Plod Mašogradskoga samodoprinosa iz doba mraka. Odavno. Još san bija mali kad se gradilo, onda znate otkad je ...
Nego, utekli smo mi sa onoga ča san tija reć. Vinka mora vadit krv. Nije oduševljena, a bogami, nisan ni ja. I meni dođe deboto onesvist kad vidin iglu, skroz je razumin. I djelomično san se pripremija na otpor. Ali ovi napad nisan očekiva. Seli smo isprid laboratorija di se vadi krv, i sve je bilo u redu dokle se nisu otvorila vrata, i moja Vinka nije vidila tetu u biloj kecelji. E, onda je počeja koncert. Najpri se zalipila za mene ka prilipak, pa kad smo došli na red jedva san jon skinija jaketu. A teta ča vadi krv nikako jon nije mogla prstima napipat žilu za ubost. Kaže da je mala pupasta pa jon se ne vidu žile. Gle iznenađenja, da mi je znat na koga je pupasta :-)
I onda je ubolo u prstić. Ajme. Svaka suza od po deca. Da je potrajalo više, deboto bi dehidrirala. Ja mislin da će još barenko dva miseca sanjat vađenje krvi. Ali i to je gotovo. I uspili smo na vrime dobit nalaze, a ča je najbitnije od svega, krv je dobra. I ne kašlje više, tako da se more i prošetat malo vanka. Odatle i ova slika. Nedija, 6. STUDENI (ko mu je da ime :-) godine gospodnje 2005. Tata, to ka ja, u kratke rukave, Vinka ipak u dugima, ali su bili tanki da jon ne bude vruće. Lako ča se kupa Jajac, ali bilo je i normalnoga svita ča se kupa ... došlo je i meni da gren doma po mudantine.
Post je objavljen 07.11.2005. u 03:43 sati.