Pregled posta

Kak sam sebi ne delati štetu

Idem polahko z noge na nogu. Zbirem svega vu glave. Znam da tam je svet kak ga jedinog videti morem. Znam da hodim tu de hodim i da vidim kaj videti morem. I tak vu nekom miru, kaj kakti to znam, hodim.
Je lepo tak korake osetit. Idu lepo polako, jen po jen. Se slika, kaj ju gledim, polahko menja. Misel se šeta z jene na drugu sliku. Je to slika koju gledim i neke slike, kaj su tu od prije. Ima tu i nečeg kaj ni slika, kaj je kak nekaj kak nikaj, a nekak po tomu se more sve promenit. Kaj da nekaj dojde od nikam i se stanje promeni. Si tak mislim i gledim, kaj bi to moglo bit. Je kaj nikaj, a nekaj napravi. Bi čovek rekel da to nemre bit, al ne bi ja to tak rekel. Pa nis neko kaj sve more. Če bi prihvatil, da to nemre bit, a se mi dogaja, bi v apsurdu mogel počet bežati od ničega. Ono bežati mislim onak kak da to nebi bilo, a je. Tak puno ljudi ponori. Veliju da im se nekaj dogaja, kaj ne razmeju. Neki veliju da ih zli duhi proganjaju. Neki veliju da oni sreče nemaju i da se baš njim dogaja sve kaj ni dobro. I tak vu tom uverenju se po malo pripremaju za sve kaj ni dobro. Gda se čovek priprema mu to lakše i dojde. Priprema je kakti otvaranje lese. Još bi samo vanjkušeka za sve kaj ni dobro pripremit trebali. Se to tak samo zmišla.
Ja to tak nebi delal. Zakaj da mislim da sve mogu, kad ne mogu. Če to priznam mi bu lakše videti kolko morem, a onda morti lakše i malo bolje vidim zakaj je nekaj baš tak kak je. Ne moram baš sve videti onak kak je, kaj to ni nemrem, al je već puno videti da ne vidim. Sam deci puno put pripovedal kak se more znanje skuplati, gda sam ih učil kamenčiće slagati v igri go. Kad znate da neznate, onda znate nekaj kaj je. To je pravi točan prvi korak da krenete na put učenja i znanja. Ak mislite da znate i ne razmišlate o mogućnosti, da morti niste v pravu, ste si kulise deli i to na slike kaj velite da tak je. Pojma nemate kaj je iza nje. Ja za sebe nekak s ponosom znam reči, da sam bedak. Da, zapraf, al taj bedak nije stal na tomu. Se menja. Nisam zaprel nikakve lese. Ne držim kulise. Pušćam da črez mene projde svakaj, al pazim da me ne potrga. Nekak sam odgovoran za ovoga 'bedaka'. Kak da smo dva v jednom. 'Bedak' sam, a onaj drugi o njemu brine, al ni on ni niš pametnejši. Koraki ideju polahko, noga pred nogu i se pitam: 'Gdo sam?'.
Je misel promenila se. Je krv v žilih išla. Su milijarde stanica hrane dobile. Je bubreg polako mical z krvi nekaj kaj tam više nebi trebalo biti. Je tak narihtan. Vu jetri se delala kemija, kaj je treba dati, da bi se nekaj za nekaj napravilo. Srčeko neumorno dela, kaj motor kaj krv pumpa, da bi sve kaj treba pelala tam gde se to čeka. Mišići se skuplaju, da bi se telo micalo. Sve je to nekak složeno črez milione leta. Se potvrđivalo i doguralo do tu. Je ostalo samo to kaj je moglo. Divim se svemu tomu.

Štel bi suda dati, al kak da sudim milionima letima. A sve je to tu vu meni tak kaj se zapraf kakti pripremalo, da bi bilo. Su svi ti geni nastali črez sva ta leta, malo po malo, kak korak po korak. Onda se opet pitam: 'Pa zakaj da sad sudim, kaj da sam pamet celoga sveta pobral?'
Zmislil sam da nismo napravleni da bi sve znali. A kaj zaprav znanje je? Da se vrnem malo natrag. Sam rekel da znati, da neznate, je početek za nova znanja. Pitam se, jel znanje je to kaj velimo da znamo, i onda spripovedamo kak bi to bilo. Morti smo to od nekud kak rečima pobrali i v memorije deli. Kad negdo pita to onda zrecitiramo. Tak kakti znanje v nama čuči i čeka. Zapraf to vredi, ak z tim znamo nekaj dobroga delati. I v tom gombanju z mislih bi pošteno bilo reči: 'Kaj je to dobro?'. Morti to zgleda kak premetanje v glavi, pa kaj zide, zide. Nebi ja to rekel. Gda velimo da je nekaj nekaj, treba tomu dati mesta v nami. Z tim bi trebalo nekaj delati. Če nekaj imate treba znati kaj to je. Treba imati nekog odnosa k tomu. Po tom odnosu se v nami, z nami, v svetu ravna.
Kaj sam svega po malo dotakel, bi se moglo prejti malo gledeti kaj i kak delamo z tim.
Da bi nekaj delali obično donesemo odluke o tomu. Ima i toga kaj se i bez odluk dela. Se kakti samo dogodi. Pri odlukih imamo nekaj kaj zovemo kriteriji. Oni kakti delaju nas takvima kakvi jesmo. Se veli da smo karakteri. Su to kakti proverene šprance po koji radimo i odluke donosimo. Bi mogel tu svakaj spripovedati, kaj je ljudih jako puno. Štel bi se malo više dotaknuti onoga kaj se veli da je dobro, kaj to je jako važno za odluke o tomu kaj bumo delali.
Čovek ni samo za danas i zutra. Nije ni od jučer. Pa zakaj to velim? Je puno onoga kaj delamo samo od jučer i samo za danas il morti tu i tam za zutra. Neke se odluke donosiju i za dula vremena. I svagde, tam na kraju, kaj ta odluka dela, je nekaj dobroga. Puno ljudi još misliju finoga. Je zapraf razlika med dobro i fino. Na primer je fino pojesti celu čokoladu, al dobro je podeliti je z prijateli. Gda se malo bolj zamislimo morti napravimo i promenu v sebi, pa nam i se i ono fino počne menjati prema dobro. Al kak to ide? Bute pojeli tak jenu čokoladu, pak i drugi put i drugu i ko zna kolko, al bute malo po malo ostali sami. I ni to samo z čokoladi. Negdo nigdar to ne vidi. Si ja mislim da je taj siroti, kaj ne vidi lepote živlenja. Tak malo po malo se vidi da se prave vrednosti najdeju tam vani. Je lepo biti med sretnimi prijateli. I ni to zato kaj buju oni vama nekaj dali, nek bute mogli njih morti još sretnijim delati. Sretan prijatel, kak del celine, je sreča.
Korak pred korak ide polako, se misel kreće. Vu glave se polako dogajaju lepe misli. Kak da ste svi tu, kaj vas znam i neznam. Pušćam svoje telo naj dela, kaj znam i verujem da je napravleno črez milione leta, da spelava to kaj najbolj dobro je. Z svoji misli, onak vu znanju, kaj morti je kulisa, bi mogel samo štete narediti. Verujem da je onaj kaj je svo to vreme skrbel i delal to kaj je napravleno, dobrog posla napravil. Sigurno bolega nek kaj bi ja z svojo pameti naredil. Sam po tom praf bedak. Al, zapraf i nis če pušćam Njemu da napravi to kaj treba. Ja sam puno razmišlal i nekak došel drauf, da sam tu da volim. Ak volim se v meni dogaja nekaj jako lepo, nekaj kaj da živlenju za praf i ne samo v meni, nek v svem kaj je tu.
Najte sebi štetu delati prijateli dragi. Volite, pa i ak vas nigdo ne voli. Bute vidli da se to, da vas nigdo ne voli, vam samo pričinavle. Ja sam pronašel, da ljubav je nekaj najvredneše na svetu. Tu nis mislil, da drugim date sve kaj hoćeju. I nije to ono kaj negdo hoće, neg puno više. Gda znate kaj je ljubav, dajte i drugima da to osetiju. Sam već rekel da sam bedak i to znam, pa nem sad o ljubavi gruntal. Taki bedak nis. To se ne grunta. Čovek koji voli je na putu dobra. V njem su tokovi i razvoji kaj potvrdivaju života. Bi zapraf bilo bedasto, da je smisel živlenja vu tom da se dokazuje sebe kak smisel. Pa sam samo del, vu tomu kaj je.
Prijateli dragi, sam pak zvrtel neke misli. Su tu i najlepše misli za vas. Ne zato da bi meni bolje bilo, nek zato da vi budete sretni, kaj smo svi samo del onoga po čemu zapraf jesmo.
Sve vas pozdravla i puno voli Vaš Mladen

P.S. Sam mislil da bi pisal o koncentraciji i miru v duši, al i to je to. Zavisi s kog vugla gledate.

Post je objavljen 06.11.2005. u 21:41 sati.