Negdje oko Dana mrtvih, u gluvo doba noći baba i dida čekaju u zasjedi… Baba: Pst, pst.. Tonko.. Tonko moj, ajmo ća! Bižmo ća odavlen! Dida: Luce muč´i drž´stražu! Baba: Ma Tonko moj mene je straj! Ča radimo odeka?! Ča normelan čovik jema radit na grobju nanoć ka se i mrci dižu?!? Puj, puj, puj a gospemojasakloni!! Dida: Zato sen i doša. A tebe ako te straj, a ti pripali joške jedan lumin i stoj kuco, moga bi nas ćut! Baba: Ma ko bi nas moga ćut? Dida: Ko, ko, ko!!! Kokodakalo! Ma ča ko – On! On! Jel njega ćekan il´ne ćekan?! On! ON bi nas moga ćut! Baba: On? A ča će ti on? Dida: Nešta bi ga pita. Baba: Pita? Nešta bi ga pita? Gospemoja! A ča će ti unda oti kolac? Ča si njega ponija? Dida: Ne znan ja ča je ko pod pločon.
Baba: Ma tis´poludije! A gospemoja totelno je on poludije! TOTELNO je on poludije!! Da nešta bi on Njega pita! Da kolac! A judi moji totelno je on pronšvika! TOTELNO!!! A ča bi ti nesritnjak jean Njega pita? Aj, ča bi TI jema pitat NJEGA, aj sa rec´!?! Dida: Da ča bi jema!?! Ma Luce ti jopet ne ranzumiš njanci ništa, jelda je?! Ti i jopet ne prantiš dnevno-pulitićke dongađaje! Ti i jopet ne znaješ ča je sa aktuelno i puno bitnjo! Baba: Ma ča? Kake to veze jema saičin i kake to veze jema sa grobjen? I ča ti jemaš nešta Njega pitat? Dida: Čukundid! Baba: A??? DIJE??? DIJE!!!??? MRTAC! MRTAC!! MRTAAAAC!!! GOSPESAKLONI PUJ PUJ PUJ BIŽ ĆA MRTAC BIŽ ĆA – POD ZEMJU JE TEBI MISTO!!! OGOSPEMOJAPOMAGAJ NAPAJA NAS MRTAC!!! AJUJUJUJUUUUUUU…. Dida: Ma Luce muč´raga izila! Ča se denreš nije se usta čukundid vengo ja teb´velin – moj čukundid! Moj čukundid – otemen b´ja njega jema nešta pitat! Baba: Čukundid!?! Ma kaki sad čukundid??? Moja prambaba!!! Etot´na sad!!! Ma očemen ti Tonko moj!? Ča On jema sa tvojizin čukundidon?! Dida: E pa moj čukundid je bija – ajduk! Baba: E, pa ča? Bila je i moja prambaba! Dida: Luce tvoja prambaba nije bila ajduk ona je samo jemala brčine. A moj čukundid je bija pravi ajduk i to ajduč´na ča je po Bosni i zemji Ercegovoj Turčina gonjeza!!! Jesi čula sa!?! On ti je Turčina po Bosni i po zemji Ercegovoj gorizin-dolizin po šumaman gonjeza i tamon se ajdučija!
I sa ja Ovega jeman pitat slideće - bi li On mega, kako je i drugaziman bija dava i´sigurava i stanj i sve - i momen čukundidu dat´munitet i drugakočivi ´dentitet!!! A khm, jel´.. nit´stanjčić neb´bija viška... Baba: ´Munitet i drugakočivi´dentitet??? Dida: E. Drugakočivi´dentitet. Baba: Pa ča će mrcu dentjera?!? Dida: Ma Luce nije dentjera vengo ´dentitet, DENTITET ´raga izila!! Oto ti je kad je ćovik niki vrag učinija pa se sakrija pa je unda oti ćovik ćovik, ma jopet viške nije ćovik - vengo niki drugakočivi ćovik, jes´razumila sa?! Baba: Pa ča će tvojezin čukundidu drugakočivi ´dentitet??? Ča je un sakrivija??? Dida: A da ča će mun! A jes´i ti Luce naivnja! Bit´ajduk, gonjezat Turčina po Bosni i zemji Ercegovoj, a nemat´munitet- a di to jema!?!
Baba: Pa ča unda jemaš mrca pitat?? Ča ne pitaš ove joške žive? Ove njegovezin ča su prija svemun svidočili, a sa svidoče ku.cu i peredu masne in ruke od pečene janjetine? Ča nji´ne pitaš ča otvaraju ceste na tuđen gumnu na tuđoj zemji– sa našin parama? Ča nisi nji´pita??? Dida: Luce, nji´niman ča pitat jerbo njiman ti je sve - Ravno. Baba: Ravno? Pičkaliinmaterina! Neka, neka - al´zaklela se zemja Raju, da se tajne sve saznaju - to in ja obećavan!!! Dida: Je, zaklela se, zaklela, ma se ode zaklela Raj-iću. Baba: Tonko moj? Dida: E? Baba: A da je metin i zera kapule? A?