Kak je vreme prolazilo i zanimacije nas klincih su se menjale. Dolazilo je vreme nogometnih lopti. Su te lopte prava stvar bile, kaj je samo jedna bila dost, da nas se puno igra. Jen sam z loptom, ni niš biti bilo. Je takav moral tražiti pajdaše za igru. Krpenjače su nestale. Nisu bile tak dobre, kaj nisu odskakivale, a se dogodilo da se pokoja rasfuflala. Su bile najviše od starih krpih v čarapama napravlene.
U ta vremena, uznapredovalih pedesetih, je već i prometa pomalo bilo, al se još moglo na cesti španati nogač. Bi se obično rasporedili na dve strane. Su birali dva najjača. Se meni obično događalo, da bi zadnji ostal pri biranju. Sam se i na to navikel. Važno je bilo za loptom bežati.
Tu na cesti pred kućom, gde su se dve ulice sastajale, je bilo dost mesta za igru na dva mala. Retki auti su nam na kratko tekmu prekidali. Lopte su bile najviše gumene, a nedugo posle i plastične. Se tu i tam dogodilo da bi koja pukla i s njom se više niš ni moglo, nek je kak običnu bezveznu gumu napucavati po cesti.
Veči dečki su igrali prave tekme med temeljih zgradi, kaj se još nisu dalje gradile. Su dugo vremena bili temelji za dve zgrade, a med njima baš lepi prostor za igranje nogometa. Su tu dečki prave tekme delali, a mi klinci, a i poneko veći, bi sedeli na temeljima i gledali. Je to bila kak nekakva tribina. Su tu znale igrati reprezentacije Naselja, Ravnic i Kolonije. Se sećam, da je tu glavni bil Šerif.
Tak sam ja jenoga dana dobil svoju prvu balku. Znam da sam med zadnjimi bil, al sad je balka moja. Je to prejaka lopta bila za na čošku ceste igrati. Z njom bi trebalo iti na veće livade. Odjemput su me vidli i oni kaj su me u ekipe metali zato kaj sam tam bil. Kad sam prvi put z njom zišel van pred kuću, ju je jen tak žvegnul, da je zletela susedima kroz prozor v kuhinju. Kaj sad? Ni važno gdo ju je, nek kaj je moja. Mi odmah bilo jasno, da sam ja kriv.
Susedi su vrnuli mami loptu, a ja sam dobil špotancije i više nis smel pred kućom z balkom se igrati. Tak sam i prijatelima rekel. Pa gde onda da igramo?
Se jen odmah setil, da bi trebalo iti na neko nogometno igrališće. Veli: 'Idemo na dinamov pomoćnjak.' 'Ja i moja balka na dinamov pomoćnjak?', Mi to nekak zgledalo preveć. Ja i Dinamo? No, kak je on rekel se i delalo.
Smo išli tam. Z Naselja prek Kolonije i tu smo. Sve je to tu kraj škole. Smo ušli uz milicijsku stanicu, kaj je tu put bil. Tam je trava super. I krenemo mi naganjati balku po toj lepoj travi. Ni dugo trajalo. Došel je čuvar (su ga zvali oružar), kaj je doma na Koloniji i zeme on nam loptu. 'Tu se nesme igrati.', je rekel i loptu nam odnesel. Pak problem: 'Kaj sad?'
Je prešlo nekolko dana dok lopta ni došla natrag. Znači, dinamov pomočnjak ni OK.
Tam med temeljih je najčešće neko već igral od većih.
Tak smo se jemput pred kućom samo lagano dodavali i balka polako na cestu i ide veliki sudac, kaj ide prosuditi celoga problema. Kamion, velki teretni. Gledamo ga kak ide on, ide lopta. Prvi kotači su ju štrajfali, al zadnji dupli ne. Je zašla praf med dva dupla. Čulo se samo dost jako: 'Buuuum!'.
Nekak bi se to možda i moglo dobro zvleči, da je samo šlauf nadrapal, nek je i koža pukla. Je bila sastavlena od puno peterokutih, kaj su neki čak se i sad podrapali. Nigdar više to ni bila ona prava balka. Je mama kože krpala. Sam gumu nekak gumilezungom lepil, al je to ipak bil pomalo krumpir od lopte.
Je kratko trajalo, al je dost poučno bilo. Če snage imate, a zgubite nekaj, je moći nekaj nafčiti. Je balka ipak samo lopta. Vrabec po njoj, jer nigdo od nas ni pred kamiona zletel. Bogu fala. Osim toga nis ja neki nogometaš bil i me lopta baš i ne htela. Je puno put bežala od mene.
Sam se još dugo igral z malim loptama na čošku ceste i bil nekak sve bolji. Valda zato kaj sam sve veći bil, a mali su došli kak mali. Oni su bili kak ja negda. Puno sam igral u dvoje ševe i glavanoge. Ševa se igrala na dva mala, tak da svaki sme samo jemput puknuti, a glavanoga tak da se počne z glavom, kaj golovi nisu daleko i se puca glavom na gol, a se posle more i s nogom po jemput, kak i ševa.
I tak po malo je druženje z loptom došlo do toga da me jen prijatel nagovoril, da idemo se u dinamove supiće prijaviti. I opet Dinamo i ja. Bute vidli, kak je to zišlo.
Sve Vas lepo pozdravla i voli Vaš Mladen
Post je objavljen 02.11.2005. u 11:11 sati.