Kak smo se 49-te doselili u Maksimirsko naselje je naša kuća bila med prvim napravlena. Do kraja ih je tu bilo devet kak naša, ali su leta prolazila dok se sve nisu završile. Mi klinci smo tak imali dugo vremena zanimaciju. Bili su tu čuvari, al smo i mi navek znali jel čuvar tu il negde drugde. Gda ga ni bilo, zgrada bi bila naša.
Smo se brzo navčili gde su opasnosti za pentranje. Je tu bilo i zanimlivih situacija, a kak danes vidim i fajn opasnih. Kad bi se čuvar pojavil nastal bi stampedo. Je neko tak mogel i nastradat, al niš to ni bilo važno kak pobegnuti čuvaru. Če bi koga vlovil bi mu grdo bilo. Z njim bi prešel k njemu doma, a onda bi posle tatek posla imal, a dete bi moralo, kakti, nekaj navčit. Smo tak klinci, malo po malo, tehnologije gradnje apsolvirali.
Meni nekak ni jasno bilo kak te cigle tak čvrsto duga leta stojiju i čvrste zide delaju. Mora biti, da je taj mort, kaj se med cigle meče, jako čvrsti kad se osuši i se drži skup z cigli.
Jemput sam se tak pentral kak se prozor delel na jedne zgrade. Ni bilo visoko. Bi rekli visoko prizemle. Sam jenom rukom se prijel za jenu ciglu, kaj je van virela i najmput; ode cigla, ode ruka, ode bracek. Kresnul sam na leđa na hrpu ciglih dol pred prozorom. Sam se štel dignuti i kak malo sam mogel, al zraka nis mogel zeti. Nejde, pa nejde. Kaj sad sam si vu tom kratkom vremenu mislil? Nikaj, kaj to je to. Je mi interesantno, sad da se setim, kak dete vu takve opasnosti, gda bez zraka ostane, reagira. Ni ostalo nek čekati, da zrak morti počne vu mene iti. Pri tom sam celo vreme po malo probal zraka zeti. I je počelo, al po malo. Onda sam na dugačko i polako zraka si zel i sve se nastavilo dalje normalno dogajati.
Je morti vu mene već bilo iskustva, kaj sam dost problemih kak mali imal i živ ostal. Navek nekak sve zijde.
Je kraj svake zgrade bilo mesto za morta mešati, a nekak vu sredine med zgradih su bile velke jame za vapno gasiti. Kak je nas malih puno bilo, nas je i svagdi bilo. Se sečam igranja na jamama za vapno gasiti. Bilo ih je tri, al je samo jena imala puno vapna. Je bilo skroz belo i mekano. Se na vrhu i kora naredila. Su radniki navek imali nekaj vapna rezerve, kaj bi morati delati mogli. Prek zime, kad se obično ni gradilo, je na te grabe se i vode nakupilo, pa se i led napravil. Mi dečurlija bi se po tom ledu sklizali. Tak sam jemput propal vu vapno, al na sreču samo do kolena. Sam baš lepo zgledal, onak skroz z belim dokolenkama, kakti. Ni bilo niš opasno, kaj je vapno već zgašeno bilo.
Da ne pripovedam o fosnami, klamfami, lojtrami. Su bile tu i radničke drvenjare vu kojima su alata držali. Mi klinci nismo ni mislili vu njih ulaziti. Samo smo se igrali. Znali smo se tu i tam igrati z smolom. To je posebno interesantno bilo po letu, kad je bilo toplo i smola mekana. Sam tu navčil kak se teško smola skida z ruk. Z odela, nikak. Mi je nekak fino mirišala.
Gda bi se temelji delali za novu zgradu, nis blizu išel. Sam dobro znal kaj znači past vu tu grabu, de su žice od železa.
Po malo nas je vu naselju sve više bilo. Kad su novi došli sam točno znal kak je, to gde su došli, nekak zgledalo, kad se gradilo, i si mislil, kak oni to neznaju. Kak je nekaj, kaj je negda bilo onak, je sad ovak. Je to nekom postalo sveto mesto živlenja. A mi deca smo sve manje imali mesta za igru. Polako smo prelazili na livade, a i loptih je nekak sve više bilo.
Kaj još da velim. Je puno raznih igrih bilo, al igračkih skor niš. Smo igre delali skup. Ni nam trebalo niš, nek smo samo jeni druge trebali. Je prijatel zlata vreden bil. Ma kakvog zlata? Kaj bi mi z zlatom? Je bil vrednejši.
Bum Vam za sada tolko spripovedal. Naj ostavim i za posle. Puno nebi bilo dobro, kaj se puno na kolima vozi.
Sve Vas puno pozdravla i voli Vaš Mladen
Post je objavljen 30.10.2005. u 17:48 sati.