Sam puno put znal, kak mali, tateka spitavlati o onom kaj nis znal, a me zanimalo. Sam brzo razmel, da je bilo nekaj i prije nek sam postal. To valda ni ni nekaj posebnoga, al je sigurno važno, kaj tak se more bolše razmeti to kaj je.
Gda je tatek mali bil su bila nekak drukša vremena. Je dedek z bako bil novi vu Zagrebu. Su z Zagorja došli. Dedeka je dovlekel posel na železnici, a bakica ni niš posebnoga za delati imala. Je bila načitana i dost stranih jezikih govorila, al posel je delala gde je bilo. Čistila je i pomagala pri stanov bogatih. Su tak dedek i bakica skrbeli za familijo. Bilo ih je tri malih: tatek kaj najstarejši, teta i stric. Su tateka baka i deda, vu ono vreme kaj je dost normalno bilo, vu Zagorje dali pri jenom dedeku vu Zlatara. To ni bil tatekov dedek, nek jen deda, kaj je tateka zel sebi, da bi dete tam bilo do škole. Je bilo dobrih ljudi kaj su pomagali vu takih slučajih, kaj su sirotinja vu gradu bili.
Tatekov tatek, moj deda, je rano mrl. Ga je sušica prijela, a vu ta vremena puno je ljudi po sušici prešlo. Je bakica sama ostala z deco. Se tatek vrnul iz Zlatara i vu školu iči počel. Mi pričal kak je to zgledelo. Je bil više bos nek obut, više lačen neg sit, više gol nek oblečen. Su vu razredu z njim bila i gizdava i bogata deca. Sega je bilo, kaj je to bilo vu centru Zagreba. Moj je tatek živel vu Đorđičeve ulice. Su deca krpenjače nateravali na Zrinjevcu, pa su znali i karbitke paliti. Je Zrinjevec ne bil kak danas. Se po njem nateravalo.
Se tak tatek nekak najbole sečal kak je bilo na veronauku. To mu je ostalo zanavek. Sam videl i kasneje, kaj sam i ja narasel. Bogata i gizdava deca su navek z osmehom od velečasnoga bila primlena, a tatek je bil tu kaj usput. Je ga velečasni čak i puno put špotal, ga je znal navleči za pokenporte. Pa svi imamo lasi kraj vuha i kad te negdo tu vleče fest boli. Je tatek znal i ne ostati na veronauku. I tak gladnoga, bosoga, smrzloga još ga i na veronauku vređaju. Ni v duši mogel.
Kak je malo porasel je z dečkima svega videl i doznal. Z nekima se počel zanimati za bolji i pravedniji svet, za svet vu kojem buju svi mogli sudelovati radom u svojoj budućnosti, gde buju sva deca jenaka. To ga je oduševilo i povleklo i moj je tatek skojevec postal. Je to obiležilo celi njegov život.
Mi je znal pripovedati kak su vu Zagrebu demonstracije radili, pa kak su ih žandarmi nateravali. Je, veli, jemput tak, kaj starejši skojevec, bil z nekim kaj je dost visoko bil. Mi je pripovedal kak još ni siguren, al je morti to Tito bil.
Bil je već i za ženidbu dečko, kaj ga je mamica pronašla. Je bil, zgledi, po tom pitanju zmotan kak i ja. Je mamica bila prijateljica od tete, njegve seke. Ona je znala mi pripovedati kak je vidla zgodnog dečka i kak je počela hofirati, a je tatek, kak sam razmel, ztrokiral i je to bilo to. Su se pred rata zeli. Tatek se politike ni mogel vrgnuti. Mu jasno bilo da ovaki svet, kak je, ni dober i ga menjati treba. A je još i rat se spremal. Hitler je već počel Europu grabit. Je već i vu partiju primlen kak skojevec. Se to u ona vremena trebalo dobro proveravati, kaj se mogla lahko i glava zgubit, će bi nutra zašel neki kaj bi žandarima sve spripovedal.
Tatek je čital puno knjig kak 'Kapitala' od Marksa i Engelsa, 'Manifest Komunističke partije' i slične knige. Je ih imal nekaj i doma, kaj sam ja već u škole išel i sam ga prosil, da mi ih da, da ih čitam. Je rekel: 'Bracek to ni za tebe. Nebuš niš razmel. Morti jemput kad narasteš.' Sam razmel da je to ozbilna stvar i da komunisti trebaju biti najbolši ljudi, kaj delaju za dobar svet, da bi svi imali pravedan i pošten život i di buju sva deca jenaka. Volel sam tateka i divl mu se po tomu. Je i on taj!
Kak je rat došel je tatek na železnici dalje delal. Je pelal sve. Znal je pelati i fašističkih topovih. Nigdo ni znal da je vu partije. Se to sve med dečkih čuvalo kak tajna. Su bili vu trojke organizirani i su to znali samo oni dva skim je povezan bi. Su tak i zadatke delali. Mi je znal povedati kak je on znal prepoznati gdo je kak i on. Je taki ne puno pripovedal, navek uz zida bil i pazil na sve kaj se dogaja. Se lahko glava zgubi vu ta ratna vremena. Su skuplali crvenu pomoć i po vezami slali vu partizane. Bile su posebne linije kaj se po njima to lifralo. Tak je negde vu drugom delu rata tatek moral iti vu partizane, kaj je zgleda nekaj procurelo. Sam se ja tek rodil. Vu to vreme je vu ložione on bil sekretar partije, tu pred svimi kaj je delal, a nigdo ni znal, samo njegvi partijski pajdaši. Čist ne razmem kak se to tak dobro skrivalo. Ipak ima ljudi kaj reči držiju i ih je bilo.
Pri Zagrebačkom korpusu je pred sam kraj rata šrapnelu fasoval vu rame i tak je kraj rata dočekal. Su ga u njegve jedinice deli za polit-sekretara. Su to oni bili, kaj su pripovedali za kaj se bori i kakav svet gradiju. Je o poštenju pripovedal.
Se ipak živ vrnul doma. I dalje je delal na železnici kak železničar. Je lokomotive pelal. Nekaj sam tek kasneje videl. Je ni od toga niš zeti htel. Ni dodatka na plaču kaj je borec bil. Je prava imal, al mu to ni pošteno zgledalo. Se boril za jenakopravnost.
Gda je do imformbiroa došlo su ga vu rešta deli, kaj ni bil za tvrde linije. Je drukše mislil nek oni kaj su veću moč zgrabili. Nekak je navek, da moč zgrabi onaj kojem je potrebna za njegvi cilji. Onaj kaj dobro hoće veruje vu dobro i mu ne treba takva moč. Je tatek tak rešta odgulel. Su ga posle zvlekli van, kaj je imformbiro tu propal. Tatek više ni štel z njimi biti, kaj je videl, da to ni to za kaj se on boril i zalagal. Su ga oni još prosili i knjem doma dolazili i govorili da se vrne, da su se stvari promenile. Je znal da se tak i opet moreju promeniti. Svakavi ljudi moreju gor dojti.
Ja sem gledel tateka kak se i on nekak malo promenil. Kak da je veru zgubil, al je ipak imal svoj mali svet ideala. Je dugo primal doma mjesečni list SSSR. Je ipak nekak veroval, da oni tam i dalje delaju za dobro ljudi. Sam ja pak videl, da je to sve sama šminka. Su oni tam hteli stvari pikazati lepše nek kaj jesu. Ipak je tu i tam bilo dobrih člankov iz nauke, medicine i takvih sličnih stvari.
Vu našoj familiji se vu crkvu ni išlo. Je tateku ostalo kak je to za bogate dobra stvar. Siročeki su siročeki. Se trebaju sami brinuti da si bolje narediju. Je meni sve to nekak čudno zgledelo, kaj je puno dece z razerda i s kojim sam se igral vu crkve išlo. Smo mi deca znali pripovedati o tome jel Bog postoji jel ne. No, o tomu bum vam drugi put pripovedal.
Tatek je prema kraju svoga živlenja se i dalje menjal. Je nabavljal razne viske, nekakve rašlje, knjige o bioenergiji. Je imal neke karte kaj ih je znal gledati i z nje videti kakvu ko bolest ima i je pripovedal kak se čoveka zlečiti more. Pripovedal je kak se puno toga znati more, kaj se nekak pripoveda z nekim kaj se ne vidi. Zamislite, moj tatek kaj ni veroval vu ono kaj se ne vidi. Moj tatek kaj je pripovedal da Boga ni. Moj tatek komunist. Gledam ga ovak staroga pri kraju ovozemaljskoga puta, ja stari prek 50 let već, i velim mu: 'Tatek kaj ne vidiš, da je to kak da se z Bogekom spominješ'. Me onak strogo pogleda, kaj je to još navek mogel tak facu narihtati, i rekel: 'Braco ne budi bedast. Je to sve nauka.' Ne je dugo prešlo 1997. je moj dragi tatek prešel. Volim ga i to sam mu puno put rekel kaj je prešel. Ja znam, da je on tam vu nauki, kak je sam rekel. Ovaj zarez pred da sam del njemu na sečanje.
Fala ti tatek. Bil si čovek
Post je objavljen 20.10.2005. u 13:21 sati.