U prvi razred pučke škole sam krenul sa trifrtalj osam godina. To je kak na vuri frtalj leta prije osam. Se u ono vreme išlo sa sedam, al sam ja, kak dete od početka leta, bil nekak malo premali, da bi me dali vu školu. Su mamek i tatek reki: 'Nek se dečec rajše još malo igra.' Ja nis niš protiv imal. Se nis rival, kak neka druga deca, da bi čim prije vu škole bil. Me zapraf to ni ni zanimalo. Kad vreme dojde bu valda ostalo i za igrati se po vani.
Toga sam lepog jesenskog sunčanog dana 51. imal školu popodne. Bili su to još sami početki. Se ne sečam baš, al mi zgleda da je to meseca rujna il listopada bilo. Sam zadaću napisal. Je trebalo nekakve crte vleči vu redu. Su bile na koso. Mi to dost bedasto zgledalo, al mi svejeno ni lako išlo. Su bile nekak kvgave. Se mi se nisu baš dopale, pa sam ih puno z gumico brisal. Mi se onda još manj dopadalo. Je na kraju sve bilo nekak zmazano, al je zadaća ipak bila. Kad sam se toga groznoga posla rešil, sam se išel igrati. Mamek ni bila doma. Ona je znala 'skočiti' do dućana. Bi rekla: 'Budite dobri. Bum samo skočila do dućana. Se brzo vratim.' Sam ja već znal kaj to znači. Je pitanje jel bu po putu nekog srela. Pak za sresti nekoga, je navek bilo. Pa valda i je, kaj je ni doma bilo dost dugo. Sam se sa seko igral. Bi mi navek nekaj zmislili. Su tak vanjkušeki dobro došli. Nateravali smo se po stanu, skrivali i kaj je najbolše bilo z vanjkuši gađali. Mi je nekak najbolše bilo je heznuti z vanjkušom zbliza po glavi. Je i ona mene, pa smo se znali skor pokefati.
Tak je vu te igre vreme išlo, da nis niš ni mislil o tom. Onda mi odjemput kroz glavu projde, kak struja, da vu školu moram iti. Ah, ta škola. Sam odjurel do vure i videl, da sam već trebal otiti i da baš počinje. Kaj sad? Je mi to kak katastrofa zgledilo. Mamek još ni z dućana se vrnula. Me ni to brinulo, kaj sam znal, da je nekoga po putu srela.
Zgrabil sam torbu, navlekel cipele i beš. Ni bilo opasno kaj se avtih dotikavle, kaj ih onda za praf još ni ni bilo. Se tu pojavil, ak bi koji od nekud zalutal. Sam se sav zadihal. Mi je škola bila na 10 do 15 minut od doma. Bila je to pučka škola u Jakićevoj na Koloniji. To je ona kaj je bila odmah uz Dinamov stadion s jugoistočne strane. Je posle tu bila i neka saobračajna, pa onda, ak se ne varam, i nekaj vu sastavu stadiona. Žurim se ja, kad ono, vidim Slaveka. Se nikam ne žuri. Mi zgledalo, kaj da nezna kolko je vuri. Se usput igra i polako ide prema školi. U isti smo razred išli. 'Bumo zakasnili.', velim ja njemu. Ga to ni niš zbunilo. Kak je videl, da se žurim, je rekel, da idemo skup. Valda mu je tak zgledalo bolje kaj bi skup došli. Se lakše opravda. Ja z bil čist sfuflan i sam se na sebe ljutil kaj se to meni dogaja. Je Slavek videl vu kakvom sam stanju, pa mi veli. 'Ne brini se niš. Bumo učitelju rekli da nam je vura išla natrag.' Bogek dragi još bum i lagati moral.
Smo pred školu stigli. Skor svaka škola ima nekakve štenge do ulaza, pa i ova naša. Smo se popentrali. Su mi te štenge tog dana zgledale tak velke! Došli smo do razrednih vrat. Sam pustil njega napred. Ja sam štel vu zemlu propasti. Je otprl i vušel. Ga je učitel vrnul natrag, da lepo pokuca i pričeka, da mu se neko javi i ga pusti nutra. Se to ponovilo i obadva smo nutra zašli. Se ni moglo odma vu klupu. Treba se ispričati i reči o čemu se dela, kaj nismo na vreme stigli. Je Slavek odmah hrabro rekel: 'Mi je vura natrag išla.' Ga je učitel vu klupu pustil. Sad sam ja na redu bil. 'Kaj je z tobom bilo? Jel i tebi vura natrag išla?'. Sam se skor rasplakal i nekak nisu reči iz mene štele van. I onda sve odjemput je zletelo van z mene. 'Sam se sa sekom po krevetu igral.. Smo se z vanjkušima gađali.' Je celi razred vu smeh vudril. Me učo gledel onak poprek i me vu klupu pustil. Me nekak sram bilo.
Sad kad se setim, je to nekak baš lepo bilo, kaj se zmišlal nis. Je Slavek se snašel. Vura mu nikam ni prešla. Je tam bila gde treba i je išla baš kak treba. Je i pri meni doma po tom sve vu redu bilo. Navčil sam da moram brinuti o tomu kolko je vur i kam trebam iti. Tak vu životu nis kasnil. Bil sam navek onaj kaj je druge čekal gda se kam išlo. Puno put puno njih ni ni došlo na dogovoreno mesto, al ja bi navek došel prije nek kaj treba. I danas se reči držim, pa i prema sebi. Mislim na one reči kaj su vu meni.
Moja vura dobro ide. I nekak je navek baš to kaj je. Se ne zmišlam. Tu i tam negdo misli da bi mi bolše bilo da zmišlam i pripovedam nekak lepše nek je. Ja pak mislim da je najlepše baš tak. Morti ne zgleda lehko, al je to ono kaj je. Ono drugo ni ni. Sam toga svestan.
I sam i z tim postal malo starejši, a da se i nis nekaj bitno promenil.
Vas sve pozdravla i voli Vaš Mladen
Post je objavljen 16.10.2005. u 17:09 sati.