Kišni proletni dan. Dan kaj sam ga čekal od čera. Su tatek i mamek čera pripovedali, da bi tatek išel novoga stana gledati. Je pri železnici stana dobil.
'Kaj si buš zel braceka?', je mamek pitala. Se sečam da je malo razmislil i rekel da bi mogel. Isusek, kak sam se ja razveselil, onak vu sebi. Bumo mi dečki stana išli gledati. Je sekica još dost mala bila i je ni za voditi bilo.
Je tatek nekak vu brigi bil, da nas kiša ne vlovi. Je padati prestala. Meni je pa svejeno bilo, kaj mi je važno samo da prejdemo. Je tatek ambrelu zel i se išlo. Če bu trebalo, se bumo obadva pod nju skrili. Smo nas dva prešli od doma.
Z našeg Trnja z Budmanijeve smo prešli prek Radničke, pa zmigoljili po nekom puteku med kući, kaj ga danas već ni, pa kraj klaonice, pa po Hajnclovoj prek štreke, pa na desno po crnomu putu kraj Kušlanove, pa mimo Svetic, kroz Koloniju, ravno vu Maksimirsko naselje. Se sečam kak sam tateka pital kaj je to klaonica, gda smo pri nje bili. Je on ne imal baš volje o tom pripovedati, al ga nis pustil dok mi ni samo spomenul, da se tu koleju životinje. Me z tim zapraf preplašil, kaj nis mogel zmisliti, da bi se to tak za praf delalo.
Kak smo po crnom putu hodili i pripovedali, sam pogledal na levo. Sam videl kak je Sleme čist blizu. Su mamek i tatek znali pripovedati kak su na Sleme išli svi skup, dečki i cure. Je to bilo nekaj jako važnoga v njihovu životu. Sad sam videl, da je čist blizu i mam sam pomislil tateku predložiti nekaj još bolše nek stana gledeti, a stana bi mogli potle. 'Tata, idemo na Sleme.'. Me tatek onak čudno pogledal i se nasmijal. 'Kaj je tebi braco, pa je Sleme daleko.' Sad ja nis niš razmel. Mi je tatek znal pripovedati, da postoji samo ono kaj vidimo i da ni vredu verovati vu nekaj kaj se videti nemre. Je to bil materijalizem, kak se pripovedalo. Je tatek moj vu pravu bil i svim je ljudima dobro štel. A zakaj mi sad pripoveda, da ni to to kaj vidim. Sam rekel: 'Pa vidim da je Sleme tu blizu.' Razmel je na kaj ciljam i je tu sad bil problem. Se ne vidi da je Sleme daleko, a je daleko. Kak dedetu reči, da to kaj se ne vidi, da je tak. Za nekakve fizike pripovedati, dečecu od pet let, ni mesta. Meni pak ni jasno kaj on neće na Sleme kad je tak blizu, a je prije pripovedal kak je to velki događaj, kaj je on z dečkima i curama tam išel. Sad bi još bole bilo, kaj bi nas dva to napravili. 'Ma idemo.', navaljivam ja. 'To ti se samo pričinavle.', je tatek uveraval. Me ni mogel razuveriti, kaj sam bil dobro navčen, da je pravo to kaj se vidi. Ne popuščam, a se ni on neda. Sam počel, ne slušati ga. Je tak naišel jen striček i onak z strane veli: 'Kaj dečec neće slušati tateka?'. Tatek veli njemu, kak bi ja na Sleme štel iti. I taj se striček isto čudi i veli: 'Pa, je Sleme daleko.'. Sad sem pak počel razmišlati kak tatek ni baš vu pravu, kaj veli da je samo ono kaj se vidi. Sam moral popustiti, al je, kak i puno put, ostalo nekaj kaj treba još nafčiti. Tatek nekaj ni dobro rekel; il jeno il drugo.
Vu naselju su bile nekakve male hiže. Saka je imela po šest vratih z samo jene strane. Med njimi je bilo nekaj velkih zgradi, kaj su čak i jenoga kata imale. Jenu je tatek posebno gledel. Je rekel: 'Tu je to.' 'Viš tu gore na katu bumo stanovali.' Mi to nekak čudno bilo, kaj tatek hoće ziti z onak dobroga i gotovoga stana, med ove cigle. Ni vratih ni bilo. Me gor po štengi otpravil, kaj sam moral paziti da se ne zokrenem z štengi, kaj gelendera ni bilo. Sam gor išel čvrsto uz zid. Je mi samo važno bilo, da štenge zdržiju.
Vu stanu su same cigle bile. Prozori su samo bili kak rupe med cigli, a vrata tak malo veće rupe, da se kroz njih more vu stana zajti. Je veter puhal, kaj je vreme z oblaki bilo, kroz sve prostore vu stanu. Meni se taj stan niš ni svidel. Je, kak su pripovedali, sigurno da bumo se sim preselili. Ni tu tateka baš nis razmel. Mi deca sve nakak drukče gledimo.
Smo doma došli. Nis baš nekaj dobre vole bil. Smo na Sleme iti mogli, a nismo, da bi one cigle gledeli. Još sam i videl, kak tatek koji put pripoveda, kaj ni tak. Sam nekak razmel da sve treba razmišlati. Morti ni tak kak se veli, jer i oni koje volite morti nekaj krivo vidiju. I kaj najvažnejše, zgledi da ima i nekaj kaj se videti nemre il bar drugače zgledi.
Je bilo to leto 49. Tog leta smo se, tam negde, na jesen i preselili. Je stan onda već bolje zgledel. Znutra ni već cigli bilo, al vanjskih vrat još ni bilo. Se sečam kak su mamek i tatek prek noći svega nametali tam di su vrata biti trebala, da negdo ne dojde dok spimo. Smo vu našega stana došli nekaj prije nek je gotov bil. Je tatek pripovedal kak su vu neke stane došli neki drugi, kaj stana dobili nisu, pa je odlučil da čim prije dojdemo vu njega. Smo nekak sreče imeli, kaj je još prazen bil.
Tak je počelo novo poglavlje mog života, al se bum na ovaj minuli del još puno put vrnul.
I tak je bracek rasel i raste još navek, kaj sad je već i dedek. Je vu njemu puno slikic iz prošlih vremen kaj bum vam ih malo po malo pokazival. Svi mi smo tak z vremenom nastali.
Vas sve pozdravla i voli Vaš Mladen
Post je objavljen 10.10.2005. u 14:12 sati.