E, ne more se svak pofalit da jema mater sa tako lipin imenon. Tako je svojedobno moj otac reka jednome Highlanderu da jema doma Slobodnu od 1941, pa ga je napalo da je lud ča je ne da u muzej. Dokle dotični nije svatija da je "Slobodna" počela izlazit tek 1943. godine, i da se momu ocu žena, ilitiga moja mater, zove Slobodna ... Vidi prošli post, u ovome ludome selu triba naučit igrat na prvi balun, jerbo ti za sekund ko uleti klizećin starton i nima te više do kraja prvenstva ... Kvragu balun, i Politika, a bogami i Vjesnik ... eto tako, posidija san gledajuć one naše nesriće na Islandu ... Naša posla, ubezobrazili se protiv Brazila, pa ka ča će oni sad se trudit protiv tamo niki Lazari, Ribari i da ne rečen koga još ... tribalo in je tri kvarta (frtalja, za sjevernjake) ure da svatu kako niko prid njima neće skinit gaće, a pogotovo potomci Hogara Strašnoga. Pustimo mi to sve, vrnimo se na sliku! Ka ča se vidi, moja Šefica pikira na tortu, to je ono ča pari ka Barbika sa malo većon vešton. E pa ta vešta je torta.
Kvragu i torta. I kolači. I dobra spiza. Više se njanci na stočnu vagu ne mogu izvagat :-( Baš Van neću reč koliko jeman kili! Odlučija san kalat. Čvrsto! Svašta se more dogodit u ovome ludome selu. Sad napokon moremo stavit veliku tendu navr mista i počet nabavljat lave i tigre, jerbo jemamo i predstavnika u BigBrother kući i sa otin je CIRKUS kompletan! Bog mu da zdravlje (Duji) i sriće. Tribaće mu. Ja to ne gledan. Jeman pametnija posla. Radije ću se igrat sa Vinkon nego trošit vrime i možđane na to. Odličan komentar san pročita nikidan o tome svemu: By the stupid, for the stupid! I da me ubiješ, ne mogu se sitit di san to pročita, ali citat je po meni 100% dobar! Eto, dokle se moja mala Šefica vjerojatno ljulja na kojoj ljuljački doli u parku, ja čekan 11:00 da mogu izletit malo vanka na zrak, i da je mogu obać. Guštan još ovo malo dokle ne zabljuzgi vrime do kraja. Ipak je deveti misec. A ja, sram me je reć, nisan se NITI JEDAN put okupa ovo lito. Moraću se barenko jedan put itnit u more, čisto da ne ostane NULA u rubrici KUPANJE. Puno se lipi stvari događa, ali ne smin reć :-) Ako Bog da zdravlje, u nekome od slijedećih postova ... a dotle, dovidova ...
Post je objavljen 06.09.2005. u 09:24 sati.