Eto, počela je i Vinka prepisivat od mene ... nikako da zaspe, ne bi ne znan kako, prošla je ura vrimena u bezuspješnin pokušajima ušuškavanja i onda smo se pridali i donili je u ogradicu. Sve je bilo u redu, lipo se igrala i onda najedan put muk! Tišina! Ništa se više ne čuje! Ja se okrenen, a ono mala Vinka zaspala na dva kušinića ka u crtanome filmu. Lipo! Ne moreš protiv prirode, niko, pa ni ona. Eto, oborilo je ... i ne triba jon puno. Rekord je njanci sto metri kad je stavin u auto, ali ovo je bilo prvi put ovako, da je zaspala deboto na nogan. Ka Mijo pekar, da ne rečen ka pokojni stric Davor. On je spavajuć zna vozit i doć doma ... ne na tovaru, vengo auton ... Eto, dite se odmori kad jon dođe, a u međuvremenu je počela zajebavat svoje bližnje, to ka nas roditelje. Pri par dan u kuma, ne bi Gospe našla njezinu bočicu. Samo ča nismo doveli pasa tragača. I odustali, pa se za dva dana javlja od kuma mater da je otvorila ormar, sakrila bočicu i utiho zatvorila. Ajde, to je još moglo bit i slučajno ... ali danas! Opet nima bočice, Zakonita digla uzbunu, ja je pitan da je li pogledala u ormariće, a ona meni da ča je zajebajen. i ništa. dobro, naćemo je ... I ja lipo da ću se poć popišat ... dignen pokrilo od školjke i ča mislite ča je bilo unutra? Odgovor je točan ... inkriminirana bočica, koja sad leti u kantu. Nećemo je njanci prokuvat, Šefici je očito antipatična ... moramo kupit novu. I sad vi meni recite ko ovod koga, je li ... da ne rečen zajebaje ... Neka. Lipo je znat da ti čer jema duha i ovako, od šesnajst miseci i sedmicu dan. Samo ča će bit posli? Mala je zarana svatila da u ovome ludome selu triba naučit brzo mislit jerbo si izgorija ... P.S. Jedva čekan sutrašnju novinu. I "Pressing" :-)
Post je objavljen 28.08.2005. u 11:11 sati.