Lipoga li naslova! Olala! A i ne znan ča ću drugo napisat, jerbo mi je moja Vinka jedino oko mene ča nije naslikano tamnijin tonovima ... da mi nima nje, ne znan ča bi radija. Ovako, pogledan je i ka da san popija šaku apaurini. Valjda je zato dragi Bog izmislija dicu, da se ljudi situ zašto su na zemlji ... Nima ča, lipo san ovo počeja, ali eto, uspija san se suzdržat da Vas sad ne davin sa svojin problemima, koje, je li, fala dragome Bogu, svak jema. Ko veće ko manje! Koko od nas ne more izdržat, pa sam sebi reče dosta i povuče crtu, a mi ostali, u koje se i ja nastojin ubrajat, borimo se i dalje. I ča ću ja sad Vas počet dušit da mi je žena do daljnjega nezaposlena i ostale sitnice da ne spominjen. Gremo dalje! Mac naprid, reka bi moj pape ...
Pitate se zašto crnilo ovako? Jučer san napravija obračun troškov za ovi misec, i umra san o straja kad san pročita brojke na kraju ... straj me iti reč. Pa ča da i rečen, oli bi to ča pomoglo. Oni koji bi mi mogli pomoć, nećedu, iz ovega ili onega razloga, a oni koji bi i tili pomoć, ne moredu ... preživićemo, doživljava san ja i gore pidaije.
E sad je stvarno dosta crnila. Obratite pažnju na sliku: Vinka je počela sama papat!
Je da je jogurta bilo svugdi, pa i njon u ustima :-) ali bitna je volja, početak .... neka gušta dok more, pape će jon osigurat kako bude zna i umija ... pa makar mora pod stare dane poć navigat ka Zlato Mamino. Je, znan da ćete se sad svi nasmijat, ali reka san van, sila Boga ne moli, ja san već radija svašta u životu, pa mogu opet! Opet san zacrnija! Kvragu i crnilo! Kaka! Ronaldo!
Di smo ono stali, a, Vinkini gušti ... lipo je mater odvede svako jutro dok ne zapeče, malo na Gojaču, mala je već uvatila lipu koluru, baš jon zavidin, jerbo smo svi mi po mojon raci blidi ka macaklice, a Vinka je baš lipo tamnoputa, za razliku od mene, koji se zaškarpunin ka neiskusni češki turista koji se zaboravija namazat prvi put na sunčanju. Zaludu mi zaštitni faktor 380, meni to ne pomaže, ja svoju Kalvariju crvenilo/guljenje moran proć i dalje je koliko toliko normalno. Nisan je još uspija slikat kako se igra u plićaku, ali obećajen, prvon prilikon ću Van priuštit i tu sliku. I fala na komentarima. Znan da navratite i pogledate diko ovi blog, pa ako van ništa ne pade napamet, barenko me pošaljite u , znate već di, barenko da znan da ste bili ...
Post je objavljen 29.06.2005. u 14:32 sati.