Sritna Nova svima, a ne samo njima! Nije mi vrag da mira, pa sad između dva umivanja da dođen sebi, moran napisat koju besidu ... eto, da počnen Novu kako triba, ako već stara nije bila. Ako ne ništa, barenko je lipo završila, ka ča se na slici vidi, laganon šetnjon na suncu, jerbo nas je Zakonita potirala vanka da more uredit kuću. Ka da ona ne zna da ča radiš na Staru da ćeš radit cilu Novu godinu. Mora bit da se konta zaposlit ka čistačica!
Novu smo, fala na pitanju, dočekali kod mojih, cca 100 m zračne linije od mista stanovanja. Ionako su mi rekli da se nisan DOVOLJNO DALEKO maka od matere, ali, ka sve ostalo, to jema svoje dobre i loše strane. Moji penzići su još dobro prošli. Mala je samo prolila kafu po tapetu u kužini i razbila jedan pijat, koji je ionako osta sam za se iz jednoga staroga servisa.
Pobacali smo (fala na pitanju, svi osin male Vinke) jednu škatulu petardi, i gledali vatromet iz Splita ... Nova godina ka i druge pri nje, i akobogda još puno nji.... ali nijedna neće bit ka ova. Kako, pitate se? Oli van triba nacrtat? Pa ovo je bila PRVA VINKINA NOVA GODINA!!! Puno je toga bilo PRVO na Staru: PRVI put mi je doša novi pop blagoslovit kuću, PRVI put san se mora mislit kako ću mu uvalit šta šušnja pa san u svoj strci zaboravija i mora trkat za njin u susida, Vinka je PRVI put poškropljena sveton vodicon posli krštenja ... Eto, istresa san sve ča mi je bilo na duši ... sad mogu na miru poć kolendravat okolo, najpri u Njezini, pa onda dalje ... baš nas briga, INA se smilovala pa je malo kalala benzin da se ljudi moredu vozat okolo, a na pumpan red ka da se dili mukte ...
SRITNA VAN I BLAGOSLOVLJENA NOVA 2005 GODINA!!!!
Post je objavljen 01.01.2005. u 10:36 sati.