dalmacija moja inspiracija
30.08.2012., četvrtak
Cukarin...bili smo u tzv. gradu između Solina i Stobreča...
|
Ma znan da če niko reć da pravin sprdačinu sa njin ali meni ga je pun qurac...tako su ga spizdili da više nima ni duše ni mota ni šušta ni gušta...da se razumimo to je meni a virujen da je mnogima sasvin jasno...e drugima kad in je OK eto in ga...koliko god u njemu jema lipi kantuna i nađe se još uvik izvornega mota moramo priznat da to i nije svudi tako...eto mi smo banili u oni trgovački centar Koteks, ma jebote pa ovo je gore od Bejruta oli Tel Aviva...nekad je bija perjanica tega Grada i Dalmacije u ona vrimena je bija senzacija u ciloj bivšoj državi...a sad je katastrofa i nered kojeg nima ni u Bronxu...svudi su grafiti i reste trava iz svi moguči buža između ploča od u davna vrimena bilega bračkega kamena a koliko je tek žvaka na tlevu i razbijeni skalina to je za nevirovat...a doli šoto su nazovimo dučani, nima ni pasa osin par žena koje se trudidu da budu jubazni a kako i neče ka smo jedini u butigi, pokretne skaline radidu samo ka se gre gori a doli moraš sam na noge...tragedija od trgovine... Ali nije sve tužno i crno, sa jugoistočne bande je od Mediteranski igara bija kafič prije je jema male gabarite pila se kavica i Pipi a jile su se pašte...dobro svemu dođe kraj ali ova buža mirita da je se spomene, ma koja suprotnost naspram onega rugla okolo...puno šesna trendy pašticerija, kava in je samo taka servirana u teplin čikarama kako i mirita a pašte su royalne samo bi in priporučija da uz perun dodaju i pošadu jerbo se onda puno boje more guštat u krasnin paštama...ma koji je gušt tamo sist i opustit se...nismo odavno ovod bili ali čemo svaki put ka smo ovod navratit...bravo ekipa...             |
27.08.2012., ponedjeljak
unuci i prošek...
Nakon ča se grozje nikoliko dan malo na suncu prosušilo eto sad je došlo vrime da se počme spravjat prošek...prije par godin je unuka gnječila grozje a sad je doša red i na malega tako da smo utroje štrukavali...nakon štrukavanja ja san ostatak turnja i ono ča je ostalo san meka da se još par dan macerira tako da če se nač i koja litra opola...a ostalo san veza u ovu plastičnu vriću i od tega čemo ispeč lozu...sve u svemu lipo nan je vrime, unuci guštaju, ja sritan ka prasac u blatu he,he, ma diš bojega života...a kakvi je prošek bija ka ga je samo unuka štrukavala moret vidit na litratu sa one dvi boce...                 |
21.08.2012., utorak
litnja lavura...
Grozje sa odrine je zrilo evo smo ga obrali i mekli malo osušit jedno 70 posto je Cardinal a 30 posto je Muškat naši unuk i unuka če ga izgnječit a ja ču od svega napravit prošek. Murtela je obrana i sad je u zimskem vrtlu na vručini da se brzo osuši nakon tega skidanje lističa i spremanje u caklenke. Prva mendula je obrana a smokve sušin več jema dvi šetimane stiga san do desatak kili. Sa jedne bande bi tija da pane kiša a sa druge nek sve ovo malo potraje dok su litnji gušti. Život nan gre u prvoj brzini a tako i triba ka smo u mirovini ma koje vidija prišit.           |
16.08.2012., četvrtak
sime od kapule...
Svake godine ostavin sime od kapule za drugu godinu...onda se ove godine počešjan iza uva i promislin kako bi to bilo ka bi sime ostavija i duperava ga za spizu...meka san desetak zrna u ovi peštadur oli mužar i malo ga sameja...dodavanjen priko spize san dobija fini gušt koji lagano vonja na kapulu...eto rodila se nova gastro ideja...eno caklenke kod ostali delicija na radneme stolu...ajde nije baš radni vengo hobi stol...      |
14.08.2012., utorak
sparina je kalala...
Sad se već da živit malo je zaladilo taman kako triba,... ribe je napritek a tako i triba malo laganija spiza sa puno verdure dikod koja ribica ali obavezno vino...evo san doli u konobi naša ovu botiju Chardonnaya tako da je danas platila...malo san marinira na suncu osušene balancane...pomidora iz forna je polu suva sa bokuničima sira, murtele i češnjaka...pravi gušti,...pripremanje suvi smokav je u toku...i tako nan prolaze dani...ajde moglo je bit i gore,...              |
10.08.2012., petak
dvi orade za nas dvoje...
|
Litnja Gastro Odiseja se nastavja spiza je standardna riba, verdura o'sezone, vino o'lani, kruv je integralni, a nama se vratija mir bila nan je čer sa unucima, gušti su nezaboravni a di češ večega gušta vengo ka ti unuci uberu verduru pa zajedno sa didon spravjaju a da ne kažen voće lipo onako s'grane pa odma zagrist...još malo pa nan dolazi i sin sa suprugon i sa njiovon čeron i sinom...biće jopet ludila sa unucima...ali dok smo sad sami red bi bija da se čagod i poide nakon puste lavure okolo kuće...rizanja ružmarina, lavande i održavanje vrtla... Bili smo na peškariju i u oko su mi pale ove dvi orade...promine radi smo ovi put u trbuj mekli list o'limuna, list lovora, vrj grančice o'ružmarina, dva tri lista citronele oli ti matičnjaka, listič češnjaka, sol - papar i sve je zaliveno maslinovin ujen...na gradela o'letrike je to spravjeno i to van je to...ovi frit o'kunpira je posebna štorija...naš vridni susid jema tako dobre kunpire da je to za nevirovat...svake godine nan ostavi dvi tri škatule o'banana tako da stin nimamo problema...Zvone kunpiri su ti samo taki...nima tu puno filozofiranja vaja sist za stol i počet guštat...          |
09.08.2012., četvrtak
malo gušča juva od ribe...
|
Kupili smo kil trlja, znate onega sitniša, za niku sitnu lovu Ona i je skuvala i mekla da se oladu onda i je očistila od drača. U jednu teču je dodala karota, selena, iskrižane kapule i paprike, dva lista od limuna, lovora, ružmarina, jedan obilatiji kunpir, naše domače konšerve, dvi zrile pome, režnjić češnjaka, zalila maslinovin ujen i ostavila na laganoj vatri da se sve skuva. One drače zajedno sa glavama mekla je u drugu teču i i od tega je napravila ribji fond koji če docnije u frigo za rižote i ostale delicije. Iz one prve teče se izvadidu grančice od ružmarina, listovi od lovora i limuna a sve ostalo se grezo samje ali ne do kraja. One bokuniče ribe koje je odvajala od drače zanji momenat dodaje mlivenome povrču pa onda kontrola soli i papra a priko svega obilata žlica maslineva uja i sad je sve spremno za klopu. Salata i tikvice su iz vrtla a Merlot rose je malo razlađen. Kruv je namazan sa maslinovin ujen i isfrigan na suvoj rebrastoj tavi. Obid more počet a Darko Baretić nek pati.            |
06.08.2012., ponedjeljak
kaštela...ovod je vrime stalo i neka je, boje ovako vengo ka cirkusi po ostalin našin mistima...
60ti godin onega vika san lavurava u Palacu i Resniku, bila su to vrimena "mraka"...ma dabogda se i ovoj mulariju koja sad živi tako smračilo ali znan da od tega nima ništa sad su u điru niki novi klinci i nike nove klinke...turizam je onda bija pojam...u Plavem Jadranu kojega ka i Palacea više nima su se svaki dan spravjali doručci, obidi i večere za deboto 900 gostiju koji su spavali kod privatnika i vidi kurca jili u društveneme restoranu...ma kako je to bilo moguče u vrimenima mraka...moglo je moglo i svi su bili zadovojni, Kaštelanska Rivijera je jemala dodatni privatni smještaj, kužina u Plavome Jadranu je radila u svi šesnajst i svi su zarađivali lipe šolde...mene je Kaštelanska Rivijera stipendirala a ja san se trudija da odradin nikoliko lita i vratin uloženo...u Palace-u san upozna i moju suprugu, fureštu, ona je uspila oveme galebu da postriže krila eto mi smo krajen ove godine 41 godinu u braku...svitu moj nezaboravne su bile večeri u Plavome Jadranu di je Davorin Popović sa svojin Indexima svako lito piva i sa nama gušta u nezaboravneme Kaštelanskome litu...za Trogir, Okrug oli Seget se nije znalo gosti su dolazili u Kaštela...i sad ka su se uloge prominila mogu van reć da mi je i drago...u Kaštelima se među domačin sviton nađe i koji furešti a u Trogiru, Okruku oli Segetu van je obrnuto...svi odreda moji furešti prijateji više volidu Kaštelansku fibru vengo fibru od ostali mista u okruženju, dobro možda su moji prijateji malo drugovačiji od prosjeka ali je ovo ipak interesantno za znat...u zanje vrime mnoga turistička mista počimaju ličit jedno na drugo...to van je u Španjolsko, Grčkoj i Italiji veliki problem jerbo sva mista stanu u duzinu...a tako van polagano postaje i kod nas...nadan se da če Kaštela pripoznat svoju ulogu i sa svojin lokalni feštama nastavit radit na dobrobit prvo sebe a usput i furešta...a ne obratno...tema je za razmišjanje...       |
02.08.2012., četvrtak
nosači za penjačice...
Ovoj metalnoj zaštiti o'cabla je puno godina mi smo je za niku sitnu lovu kupili na aukciji u Niskozemskoj...ma nikako da se nađe pogodno misto i evo konačno nakon deset godin ležanja u kantunu našli smo dva šesna mista...nečemo duperat za cilo cablo vengo dvi polovice napose...jedan je za ovu penjačicu sa lipin cvitovima koja gre priko 5 metri u visinu i zimzelena je...a druga polovica za lozu koju san posadija kraj ulaza u konobu. Danas san i lakira sa mat lakon tako da ova ruzina ostane vidjiva...mi van volimo starovinske stvari tako da priko ovega ne triba nika pitura.      |