NE ZAUDOBIT ONE OD PRI NAS

nedjelja , 13.04.2025.

Rascvitale mendule, svukli se kapoti, arivala Cvitnica. Korizma gre svomen kraju, ulazimo u Veliku šetimanu. I vrimena i judi se minjaju, ma lipi običaji ostaju. Malo koga čete danas trefit da ne nosi grančicu masline oli javora, ali nima onih ča bi po starinsku nosili vijolu. U stara vrimena vijola i murtila su resle u svakomen dvoru i taman bi ujokolo Cvitnice procvitale, pa se vijola nosila na blagoslov.

Prin nego se gre u crikvu umilo bi se iz malega lavamana u koji je večer prin bilo potop'jeno cviče. Rekli bi nan da se prvo umiju oni mali anđeli, pa mi mala dica, a iza nas ostala famija. Obukla bi se roba o' sveca i išlo u crikvu na blagoslov. Iza mise bi muški potegli do po'ja i vinograda odnit blagoslov'jenu grančicu na zem'ju da bo'je rodi verdura i grozje.

Doma bi baba zadila grančicu za kvadar našeg sveca da nan u kući bude zdrav'ja i sriće. Uvik bi to bija sv Antun koji se štova ka kućni svetac , jer je moj dida bija član Škule od svetoga Antuna.
Poza obida bi se išlo na grob'je odnit grančica i cviće našima ča su partili sa ovega svita.

Vrime je učinilo svoje. Ne gre se u poje, jer ga više nima, stare kvadre sa sveciman su zaminili niki drugi kvadri, a i poć na grob'je je postala fatura. Ma se lipo siti onega vrimena kad su naši stari držali se reda, čuvali familju, poštivali rojstvo, pomagali suside i imali rišpeta je'ni prima drugima

Ma kako da je vrime pasalo, ne smi se zaudobit ono kako je bilo , išli ne išli u crikvu vaja naam znat , da smo ovod svi od onih, koji više među nama nima.


A&A