Taman san, u petak, krenija po onoj vručini iz Sabora kad me zovne Zoran. Triba ujutro bit u Marmontovu ulicu u Splitu u deset uri i reč par besid - jerbo ćemo skupa sa sindikatima govorit o ovemu referendumu oko Vlade koja je natantala izminit Zakon o radu a na šćetu radniški interesa.
Već se vatalo tri uri pozapodne i omar san zva Matijaševića. Je, triba se nacrtat sutra u Marmontovu u deset uri - a doć će i Seve jer vodi svoju mater da potpiše sindikalni peticjun.
Govorin mu da ujutro gre i spliski SDP su tri svoja štanda - i da more računat na nas i na svaku pomoć koja jin zatriba. Lipo se pozdravimo i ja san oko četri ure, po uzavrilon zvizdanu - krenija put Splita. U mojoj karampani ne radi klima ali ča se more. Triba prispit ča prije doli jerbo se sa svojiman iman dogovorit još puno tega. U nedilju se triba vratit nazad na Glavni Odbor stranke a u prvidan su već pripreme za nastavak šedute o Sabora.
Ariva san doma na Pujanke okolo osan uri pridvečer. Vikend je - pa je na cesti prilišno tonobili makar je počelo svitsko prvenstvo u fuzbalu u onu Južnoafrišku Repupliku !
I naravski da san, kad san izaša nogon na cestu iz umorne Mazde - omar naletija na moju šesnu šjoru Filu koja je sidila na šentadi s prijatejicama mašući i ladeći se ventulon ka nika gospoja iz meksičke sapunice.
Zdravi bili...Lipa Van je ota ventula ! A oklen Van ?
Iz butige mono - a oklen bi bila....nervožasto mi odgovori šjora File. Da si čovik bija bi mi ti donija koju iz Španjolske. Ionako te vrag uvik nosi doli !
A koliko san Van puti donija ventulu ?! Mogli ste, deboto, do sad otvorit muzej od vetuli ! Ma Vi svaku razbijete....
Je, kad mi kupiš one najcinije za po šolda. Ni se moja ruka okusila prave vetule o tebe - škrtunu jedan da bi li škrtunu !
Fali gospodinu šoldi....pa se ne more bacit u trošak...doda ispod glasa njezina prija - A meni tlak omar skoći na miljun...ali ča ću, boje mi je mučat jerbo će me ova ćudnovata klapa uvatit u đir pa san tek onda najeba.
Dobro kad je tako...rečen ja, ka malo jidan....Ajde zbogon Van - gren ja doma !
A vidi mone, vidi štufajice ! Ola ča smo postali takni živac ! Ne moš mu više ni besidu reč a da omar ne obisi nos....A kako je nama, friga se njega - glavno da se on odma vriđa...Pari gospe o cukra a ne mulac sa Pujanki ! Pari se ka da san ga pitala zajat miljun lira šterlina kad san mu rekla da mi moje joko još nije vidilo pravu vetulu.....od svih tih njegovi pusti ventul o po šolda, ča mi ji je donija...sad se ona ka najidi.
Ma ča sad spominjete ingleške funte ? Pa ne pravidu se ventule u Inglešku ! U Španjolsku su euri a prin su bile pezete, a tamo radidu ventule, e !
Jebe se meni koju munitu oni jemadu - ja niman niti jednu. Neman ni kun...Ma ča kun, ni lipe niman...Evo ću i ja poč sutra podržat sindikata pa ma kakvi jesu da jesu !
E, lipo...Eto, mogu Vas ja odvest jerbo i ja gren u deset uri u Marmontovu !
Aj, neka je makar nika korist od tebe...doda ona, pinku veselije..A vidin ja da joj se brk smije i da ona mene , u stvari, stalno zajebaje isprid svita. Ali neka - jopet mi je najdraža !
Već u osan uru ujutro počela mi je tuč na vrata o stana.
Digni se linčino ! Vaja nan poć u demonštracjun !
Otvorin joj vrata jerbo je već probudila tri kata o kuće pa su svi znali di to ona gre i ko je to vodi.
Ma nisu Van to nikakvi demonštracjuni...vengo potpisivanje podrške za održavanje referenduma.
Ma ostavi se ti mene. Ajde su namon i muči. Ja san na bokun kartona napisala "Doli Vlada" i mali mi je to pribija brokvon na jednu štuketu i bez toga ne gren u Marmontovu.
Ajme meni, opet ćete pravit monade i cirkus od ozbiljne stvari !
Muči mali i gremo u grad dok te nisan udrila ovon parolon posrid čiverice !
Jedva san utira tu njezinu parolu u auto...I tako, stiskajući se, dojdemo u grad. Svit se okreće za nama a ona gušta ! Digla onu parolu i još puton stalno viće na cili šuc svojin kreštavin glason "Doli Vlada" !
Ma ča se tod derete po ulican šjora File ? Umrit ću o srama !
Ka prvo ja se ne deren vengo čitan judima ča piše na karton !
Pa znaju judi sami čitat !
Tikvane jedan...Ovo ja govorin zaraj oni ča ne znadu čitat - Nek vas svit zna ča šjora File misli ! Nima ti u mene straja - da znaš ..reče ona, ka nikako ponosno - i nastavi vikat...A za nama je već išla cila fila svita. Ipak je ovo Split !
Uto naletimo na šjor Lovru koji je nosija svoju parolu na kojoj je pisalo "Kruva i rada" !
Zdravi !
Zdravi !
A di ćete Vi šjor Lovre ?
Gren u demonštracjune, eto di !
Ma ča ste to napisali da očete kruva i rada...a Vaša familja jema pekaru okad je svita i vika. Najstariju u Split !
Asti ga Mande ! Doro govoriš Marinko ! Gren je omar prominit...reče on pa drekne na mene: Kukumaru jedan zeleni da bi li kukumaru - pa to san baš i napisa zaraj oni ča nimadu ni za kruv ! Eno nan je skroz butiga prazna...Nikad ni bila praznija. Ovo još nisan u životu vidija - a za deset dan ću uvatit devedesetu. Miritaš da te su ovon parolon odalamin po toj conkulastoj glavi - izbeči se on na mene !
Ma udrite ga šjor Lovre moj, slobodno ga udrite - upali se moja susida . Ja san ga već tila opalit mojon parolon po glavi još u osan uri ujutro...ma mi ga se učinilo nikako milo. Ko će ga ovako mižerjastoga i čoravoga poć još i tuć. Mogla bi mu razbit i očale..pa neće vidit vozit tonobilon. A di san, jadna, onda....Znade te li Vi kako su daleko Pujanke, annn !?
A judi oko nas, udri u smij !
A oli Van je to šofer šjora File ? A šesan Van je - nima ča ! Ola ča ste avancali - parite pridsidnica Vlade !
Ajme meni. Bilo bi jin boje da ji je ujila zmija šarulja nego da su joj to rekli !
Čaaaaa !? Čaaaa ste to rekli ! Mene će te poć uspoređivat s onon mustron...s onon maškon ! Mene ?! Eno će počet u prvidan u Večernjaka izlazit nika serija o njoj ! Pari meksička sapunica ! Ma tribalo bi nju dobro luštrat i oprat - ali onako po moju ! A ča bi bilo da o meni pišedu ? Ča bi bilo da moj život stavidu u nastavke u foje ? A ne, to neće - vengo: "Od napuštene divojčice" pa do ovega ča je gospoja pridsidnica sada....Ma miritala bi ona jednu po gujici - i to od mene, pa bi onda vidila. Ja bi joj mogla bit mater sto puti....Boje joj je da mi se makne s puta ako me trevi. Još kad se sitin u koji stan živi..Ajmeeee !!!
Šjora File, završit če te Vi u pržun...dobaci joj jedan.
Ma ko se to meni priti ? A ti longo...okrene se ona prima jednon dugonji...A ti ne moreš u pržun jerbo bi ti noge virile iz komore pa bi ti ji morali osić....!
Ma ča Vi to meni !
Aj ne pizdi ! Ako ti je dražje, dobro - osikli bi ti glavu ! U svakome slučaju toliki ne moš ni u pržun...Nigdir te triba skratit: Jo li gori - jo li doli, pa ti sad biraj !
A svitina omar počme vikat: Gori ! Gori ! Ča će mu glava ? Samo za špančeru nosit...Za trošak ženi pravit ! Glavu mu triba osić - manja je šćeta !
I pobiže bidan čovik...
Marinko, otpočinimo malo....reče mi već umorna šjora File. Danas gren u revoluciju. Moran popit dec crljenoga ! A sutra je moj lipi Sv. Ante Padovanski - pa ćemo i to, ka prava čejad, zafrajat !
Ma on Van je bija iz Lisabona. Tamo ga zovedu Sv Ante Lisabonski jerbo je portugalac, ma je partija na oni svit u Padovu di je poslin živija !
Aj ti muči, šupja glavo ! Ča ti znaš ? Sv. Ante je i ribama drža propovid a ti si pametan taman ka i riba...i to ona sitna....ajmo reč - ka gavun ! Ti bi triba dva puta otić na propovid da bi razumija ča on govori !
Dobro, neću se inatit s Vama - ča ćete popit ?
A jedan bibit...Samo da je crljen !
Onda botilju drniškog Merlota. More ?
Amo ga ča probat ! Nisan ga nikad ni liznila !
Kad je stiglo vino....popije šjora File gutljaj i reće: NI loše. Bogami ni loše ! Gleda ona botilju i vidi da je iz drniške vinarije a da ga puni Dalmacijavino.
Pa ko to kaže da Dalmacijavino ne vaja ! Pa ovo je čista likarija !
Je šjora File moja, jedno od najlipjih vina !
Još da je čakod bacit u kljun...Ovako teško padne na prazni štumik !
Uto stignu frigani gavuni.
Ajme ča su friški ! A Marinko moj - ma di san ja tebe mogla usporedit sa gavunima. Ma gavuni su puno boji od tebe - Ti ne bi vaja ni frigan..... namigne mi ona i udre u smij !
Tako malo otpočinemo i krenemo u Marmontovu a ona će meni: Merlo moje šesno, zbilja ni lako ić u revoluciju po ovoj vrućini...ali nima nan druge - sad ne moremo natrag. Daj Bože samo da se najde niko pravi ko će se judima stavit na čelo, kome ćedu judi virovat i ko je pošten ka ča je bija moj dobri Sv. Ante.
Jemate prav šjora File - ma prvo judi tribaju doć pameti i skontat dva i dva, shvatit ča jin se dešava....i pokrenit se. Bez podrške naroda ne more se ništa ! Vaja da i narod jema svoju glavu !
Tako je, sinko moj, tako je ! Ma za sve triba jemat kurađa....reče ona i počme mavat onon svojon tabelon ka su nikon velikon domaćon ventulon, vičući iz petnih žila: "Doli Vlada" !
Post je objavljen 14.06.2010. u 09:23 sati.