Moj sused Štefek o izborima

I kaj pak sad. Pak neki izbori. Lokalni. Oni nama fakat ne daju odmarat nedeljom.

Čovek bi si nekaj doma napravil ili odmoril, a ovi fort nekaj očeju. Nemrem se ni pošteno na grbu hitnut, već se treba presvlačit, pa bolju robu obleči i to je problem. Kupam se ja nedeljom, ko i sav svet kaj do sebe drži, al navečer. Kaj da se zbog njih popodne kupam? Pa bum se još usaftal do večeri, sad su pak topli dani. A i košulju bum si zmazal. Moram si pivu popit posle, red je, a od pive mi sam znoj curi. Kaj bi drugo pil? Morti vodu? Je, nisam badava u grad došel, vode imam i doma.

A tam kad dojdem, svi mam u mene gledaju. Cela komisija. Svaki put odahnem kad me na onim brojkama najdu. Dobro je, nisam im se zgubil. Da je dečji doplatak u pitanju, ne bi me na listi našli, al za birača sam još tu.

Onda mi olovku daju. Pak svi u mene gledaju. Kaj si misle da ju bum fkral. Ne bum. Kak bi ja to napravil. Pa vidli su me kad sam ju uzimal.

Onda si sednem tam na onaj stolac, pa se u karton zagledam. To je da niko ne bi videl kaj bum zaokružil. Ni zbog olovke.

Pažlivo čitam kaj piše i kaj trebam delati. Ni saki put isto. Sam su ljudi isti.

Ima tu i tam neki novi. Koji još ni bil. Ti su meni dragi. Si se na slikama smijeju i imaju puno slova kod imena. Mr.dr.pr. gr. Si su velike škole svršili. Nek su , nek su, taki, pametni nam i trebaju. Ne oni kaj su bedasti. Ko bi takve biral.

Stari su stari. Njih već znam. Bome su se zdebljali od zadnjih izbora. Moraju. Bome bi i ja kad bi me na sve strane furt zvali. Te zakuska, te vol na ražnju, te janjac, te bažulj, te kanapei... S tim kanapeima je ziher najgore. Čovek ih sam stavla u usta kak su mali, pa ni ne skuži kak kile idu.
Nudili su i mene s tim, neke cure napol oblečene u dučanu. Kakti nek probam nov proizvod neke naše/stranske firme, pa sam i probal. Tri puta. Niš nisam osetil. Trebal bi celu šaku toga progutnut. Al su me čudno gledale, pak sam sam rekel da je fino i otišel.

Stare znam. I kaj delaju i kaj ne delaju. I koji bi pomogel i koji ne bi. Nekak čim više moreju, manje to delaju. Ne sme se to. Onaj jedan je na selsko igračište lampe dopeljal, pak je u reštu završil. Bolje niš ne delati. Ne bu čovek ni za kaj kriv.

Koga bi zaokružil?

Novoga il staroga? Neki stari su novi, a neki novi stari. Skroz novoga? Ima i takvih.

Mislim da bum njih. Trebaju se i ta deca i ti ljudi malo zdebljati. I pojest koji kanapej.

Bum još videl kaj bum napravil. Imam vremena.

Sad me više brine koju košulu bum si oblekel. Nemam ih ja tak puno kolko je tih biranja.

A kupanje u nedelju? Ma bum se dva puta okupal. Tolko za svoju zemlu morem napraviti.

Oznake: izbori, humor