dalmacija moja inspiracija

30.07.2012., ponedjeljak

junetine sa na suncu osušenin balancanama...in umido...

Ma zaželija san se prave spize dosta je bilo salata i na brzinu frigane ribe oli lešade, ajmo mi malo konkretnega ništo za čin se more popit poštena boca vina a ne ovako ka dosad samo razlađivanje.  Evo van moja riceta iskreno da van rečen nije da se falin sa svojon spizon na vama je da odlučite ali ova riceta postaje jedna od mojih klassika.  Evo ovod cila riceta. Juneče odreske malo potučen i zabrašnin... Narižen kapulu i češnjak na sitno... Uberen pet šest vrja od grančice ružmarina sa dva lista lovora... Triba mi solidna tava sa maslinovin ujen koje je pokrilo cilo dno... Meso frigan i dodajen sve ovo gori napisano... Okričen i malo promišan... Na suncu osušene balancane dodan svemu... Žlicu tvrdega varenika meknen na sve da se otopi... Sol i papar iz mlinaca zavrtin par puta... Dodan dvi žlice kvalitetne kvasine a ja duperajen moju nektar kvasinu iz 1959 godine pomišanu sa domačon kvasinon... Sve zalijen sa kvarat litre crnega vina, ja duperajen moj Merlot... Desetak mali friški pomidora zajedno sa decon vina samejen u blenderu... Dodan u tavu i sve dobro promišan... Sad to sve gre u vatrostalnu caklenu teču sa poklopcen... Pečnica je ugrijana na 150 gradi... Kad sve ovo počme lagano i vidjivo da kuvucka onda se fibra u pečnici spusti na100 gradi... Nek ostan tako jedno dvi ure... Napose san skuva talijatela u koju san doda maslineva uja i nasickene murtele... Salata je iz vrtla, pome, malo tušta i dva tri lista zelene salte... A vino je doli iz konobe iz drugega suda sa desne bande... ONA je nasuprot meni u litnjoj kužini   i guštanje more počet...

29.07.2012., nedjelja

sparina je za popizdit...

Ma do prije par godin me nisi čuje da bi reka da je vruče, neznan jesu li to godine ali se meni pari da je postalo vručje...ma more svak reć ča ga je voja ali je meni gradacijun u bazenu...lani i prilani nije bilo dana da je fibra vode išla priko 28 C a ove godine je rekord 31C pa onda jedno pet šest dana zaredon je bilo stalno 30C evo sad je ura 18.35...29. srpnja i fibra je 29 C...nima veze i ovako se čovik more razladit...onda nima druge vengo jist verduru, pit puno vode, mozda poist malo ribe...a vina nesmi nedostajat...eto li ga na, biće brontulavanja sa prvin kišama a dotle ladovina i guštanje...

26.07.2012., četvrtak

Klub gurmana i hedonista...Split...

U Kuzmanića kali u Splita a to van je ka se od Pazara prošetate Radunicon i onda na Vrj Lučca skrenete desno doli oli ka se sa Pazara uputite gori prima bolnici pa onda skrenete livo, a to livo je nasuprot Kotekseva nebodera i samostana...i tamo pri kraju Kuzmanića kale van je u šesnoj kamenoj kući ugodan ambjent di se moredu nabavit i kušavat najboja vina is Rvacke...uz fine delicije je pravi gušt se malo opustit i guštat u vinima...Igor Beroš je motor iza tega projekta i ako van za vašu firmu triba ništo drugo osin standardnih ručkova povedite svoje goste u Klub nek se opuste i kušaju ono najboje ča jemamo pa in onda dajte mogučnost da sami izaberu šesni poslovni poklon...život je kratak da bi čovik sta doma i gleda spunice svitu moj ajte vanka i guštajte...

22.07.2012., nedjelja

cooking classes sa unucima...

Od mali nogu se uči jist, kušavat i guštat...jučer san sa unucima napravija điradu po vrtlu, pokaza in pome i balancane i onda smo ubrali desetak cvitova od tikvica pa i zajednički počeli spravjat...prvo smo i oprali od eventualni mravi i beštija...pa smo razmutili malo brašna sa maslinovin ujen, dodali na sitno češnjak, zavrtili malo papra i soli i bacili na gradela...najstariji unuk je 7 godin pa 5 i onda 3 onega od godinu dan ne računan on je još jednin dilon na materinoj čičoni...dica su guštala i naučila ništo novega gremo daje u nove pobjede...

20.07.2012., petak

počeja san sušit dalmatinske trave...

Tako van je svakega lita po cileme đardinu restu dalmatinske trave koje se onda u ovo vrime počmu brat i sušit u zimskem vrtlu...tamo je fibra deboto 50 banki a ispod valovitega krova od plastike san meka tendu jerbo brez nje bi sve izgorilo...a zimski vrtal mi je idealan i za sušit kapulu i češnjak...ka se sve osuši onda ja to meknen u u jednu kašetu i pokrijen...duperajemo za spizu a zgodno je i da se mekne u škartoc i da za poklon...

18.07.2012., srijeda

velike vručine i veliki gušti...

Ne sičan se više odkad je ovaka vručina bila, ma to je za popizdit vrtal vapi za vodon ma zalijen dva puta na dan...onda malo točavanja pa onda u sjeni kuće malo lavure u vrtlu i to van je sve...zato su najboji momenti ka se počme kužinavat...za zagrijavanje jedan aperitif i onda branje verdure u našeme vrtlu, rizanje kuvanje...i na kraju gušti samo gušti...dugo dalmatinsko lito kojeme deboto nima kraja...

08.07.2012., nedjelja

skalopini...sa kadujom...od svinjskega fileta...

Evo sad malo promine ovo je spiza koju san kuva u našoj kultnoj konobi Konoba krajen sedandeseti godin onega vika u Niskozemskoj...uz ovo smo jili fažolete i na suncu osušene balancane koje su docnije marinirane pa onda frigane...kod vina je bila dilema ali smo se nikako snašli ...bila su to vrimena koja se lako ne zaboravjavu...ajde potražit ču čagod fotki pa ču napravit i jedan post o temu...a sad van evo ovod malo mesa u toču...

07.07.2012., subota

litnja kužina i njezine tajne...

Sad ka smo te sriće da živimo u prirodi i di nan je klima samo taka ka ča je ovod u Dalmaciji e onda triba kraj kuće jemat i litnju kužinu. Ona nan je bila uvik na prvo misto. Tamo nidi krajen trečega miseca se počima sve pripremat i čistit sva ona šporkica koja se zimi skupila. O onda je prid Uskrs otvorenje...i svi ti gušti traju do polovice studenega. Doma se samo spava i gre u kondut a ostalo je sve ovod...lipo da lipše ne more bit a i ovi blog se vanka piše...eto to bi van bija naš dalmatian slow life...

06.07.2012., petak

lagani litnji rižot,...

Ovo vrime je stvarno za popizdit ma vanka grije ka ludo a eto bar mi s ti nimamo problema...točavanje i guštanje u i uz modru baru...a spiza je lagana Ona je napravila rižot ja san ubra salatu u vrtlu i oladija vino...a u litnjoj kužini je debela ladovina...da se nama nikako izdržat, samo je teško starijima i bolesnima...ma ka če kiša da malo svit oladi i napoji vrtle i đardine...

05.07.2012., četvrtak

lavandula dalmatica, leptiri, čele...

Svako jutroa i po cili dan mi je divota vidit puno leptiri i čela kako se trudu da vazmu porciju svoga nektara na lavandi u malome đardiniču iza kuće...odmor za oći i dušu...di su lepitri i čele tu nima pesticida...a tega se ja uvik držin...

04.07.2012., srijeda

pohani mladi kozji sir...

Sir san ostavija priko noći u cidajki da se dobro ocidi...onda san ga pomiša isickanin selenon i murtelon...malo san izmlija papra a soli samo na vrj noža...sve pomišan i napravin šesne polpete koje se prvo meknu u oštro brašno pa u maslinovo uje i onda u mrvice...pažljivo se friga na maslinovu uju i to bi bilo sve...

03.07.2012., utorak

pasja vručina...ostaje nan samo spiza, bibita i točavanje...

Pa ovo više nije normalno, čeka me toliko lavure doli u našoj kamenoj kućici u Kaštelima pogotovo danas ka san se dogovorija sa dvi firme od Slow travel - a...jedna je australska a druga britanska firma za slanje gostiju...ma čekan da ova fibra pane da se mogu jopet uvatit lavuravanja. Dobro nije baš priša to je tek za dogodine ali ipak sve triba bit gotovo do kraja trečega miseca 2013e. Okričen se oko kuće di je sjena tamo san i ja ali i to ne pomaže vruče je za popizdit e onda mi je najboje se zatvorit u kuću i malo lutat priko interneta. Evo sa ka san ubija oko i probudija se bija bi red da se mekne koja fotkica o spizi vinu i o ostalin ladanjskin guštima u ovi sparni dan.

02.07.2012., ponedjeljak

punta od Nehaja kraj potoka...

Ovo nan je zimska i litnja buža di češče navratimo...zimi su fenomenalni zalasci sunca pogotovo ka je onako brez vitra pa se more uz zid lipo sit i popit kavicu...parkiramo se u Resniku i onda priko Dračića sve do Nehaja i nakon kavice lagana šetnja nazad a zanje sunce nan u povratku tuče u čunku...ma ko more ovo platit...a liti je ovod ekipa od WON-sa oli ti surferi, pa rokeri, pa alternativi jahači na ludin makinjama, eto svega je pomalo...prvo kavica a onda točeno Češko pivo...uuu, lipo klizi niz grlo...puščaju dobru mužiku...r&b, rock, latino ma svega pomalo...a moga kompe kuća je tamo iza oni koltrina, kompa vidimo se u kolovozu, je svitu tamo van je Čiovo...ajde da se nikako izdržat...;-)...

Mašograd oli ti Sućurac...

Evo san naša stare litrate o Sućurcu, ma koji lipi i šesni gradić koji se smistija podno Kozjaka nasuprot oneme velome selu ispod Marjana. Ovod se bar zna da je ovako kako je, ma ovod život jema svoj tempo, terace na Rivi su uvik pune pogotovo liti jerbo je onod ispod murvi uvik duboka ladovina a tek kad meštral pune ma to je prava divota. Evo se u Getu vidi da se kuće priuređuju i da se sve više pitari sa cvićen meče vanka isprid vrata. Nađe se u Sućurcu par oštarija za poist čagod tu je banka, pošta, izvrsne linije prima oneme selu ispod Marjana i prima Trogiru. A gori iza Sućurca je Kozjak koji mami da ga se posjeti i s njega gušta u prekrasnin vidicima. I mi smo ovod u getu vlasnici jedne šesne kućice to van je oni litrat koji je jedini u boji kuća je taman po sridi. Restauracija gre pomalo ali ka bude gotovo onda če bit taman onaka kakva je i uvik bila...i to brez betona oli aluminija, sve če bi kako je i prije bilo ali sad malo sređenije, svudi pojačano, zaštičeno i izolirano...ali če ostat vidjiv stari timbar.