Pregled posta

Adresa bloga: https://blog.dnevnik.hr/iskonskipag

Marketing

DA SE NE ZABORAVI - LEROJ




Koliko se samo ovih dan govorilo o uri naprid ili nazad, dali to vridi ili ne vridi, na ca to sve djeluje.
Sićan se jednom prilikon kada san doša kod deda i nane u Studeno da san upozori deda da ni stavi uru naprid. Ded mi je odgovori: kako Branimire da ja ovci objasnim da je ura naprid, kada je ona navikla uvik u istu uru da se pomuze. To je bila najveća istina zac ne triba pomicat uru naprid ili nazad.


Dvajset i cetire ure na dan samo je jedan mali del u životu covika, kada ura za uron biži i tako dojde ono za ca recemo da je došla – zadnja ura.
To me je potaklo da se spametin još jednog paškog šulaca, kada je mertvo tilo bilo doma da je mat pitala ćer:
- ka ura je?,
- zac me to pitaš?
- pa da pocmemo narikat.
I tako dok je svita i vika, judi će vrime i ure – mirit. Zato nan rabi leroj, jer bez leroja nebimo znali ka ura je.
A ca je leroj? To je naprava ka nan pokažuje koliko je uri, ili kako ga književno zovemo - sat. Leroj je dobi ime po francuskoj fameji iz Pariza ki su bili lerojisti i prezivali su se Le Roy. Tako je i do naših kraji došlo to ime i ni se saterlo. Malo ki u Pag rece, sat.

Ima više versti lerojov: za na ruku, za na zid, za u tašku, javni leroji na kakvoj značajnoj zgradi u grad, ali samo jedan leroj zovemo drugim imenon, a to je žvajarin. Žvajarin dolazi od talijanske besede ( tal. sveglia) i to je leroj ki nas budi (hr. budilica), najviše za poć na posal.
"Vrime je leroj života", govori nan jedna portugeška poslovica. Bi leroj ili žvajarin, jako nan tribaju u ovo današnje vrime ko leti.

Zato su javni leroji bili jako važni, jer prije ni svaka kuća imala leroj, a malo je bilo onih ki su nosili leroj na ruku ili za pason.


Ima san sriću da san jedan leroj ki se nosi za pason dobi na poklon od pokojnog barba Vala Marca i on je doša iz Pariza, kada se baraba Valo torna doma nakon ca je neko vrime živi u Pariz.

Danas je leroj svakodnevnica ali i prestiž. Malo ki da nima leroj na ruku. Ca skupji to je pripadnost staležu boja. Po leroju se danas miriju i štimaju judi. Ne nosi svaki Rolexa ili Cartiera. Danas su najpoznatiji švicarski leroji, a nekad su to bili francuski ili ingleški leroji.
Sada ću fermat, jer ure kuriju, a ne receju uzalud Englezi da on ki ima najviše vrimena, najmanje ga imaju za izgubit, a zgubjeno vrime ne more se više nać. Škvere od leroja zato greju samo naprid i nikad ne fermivaju.



Post je objavljen 10.11.2016. u 11:05 sati.