Ola, koji lipi dan u Splitu, Marinko moj. Nikad dujeg i luđeg babjeg lita !
A šta je sad šjora File moja ? Nikad Van ni po guštu ! Ća Van sad ne vaja ? Uvik grintate :
Ne, vengo ću eto poć balat o veseja, tukac jedan tukasti...Oli tebi ne smeta ovi konfužjun, ove makakade i sva ova pusta , prosti mi Bože na grubin ričima, politiška priseravanja potla izbora. Ionako su mi sve živce izgulili već u kampanji. Ko to more višje izdržat ?
A ča Van to ni jasno ? Recite !
Ni mi kjaro da oni Karamarko stalno piva da kako su oni pobidili a svaka mona, čin mu vidi onu obišenu ćunku, omar na prvu vidi da su izgubili a da je on toko sritan ka da je na nikon sprovodu, ka da nikoga ukopajedu a ne slavidu ajmo reč pobidu na izborima. Pari mi se ka da je u koroti a ne na slavju !
Pa oli jih niste gledali onu izbornu noć tamo u nikon zagrebaškon restoranu kako se veselidu !
Ajme meni Marinko moj, ne spominji mi to, molin te ovin Bogon....reče mi moja šjora File i poćme se znamenovat.
Parilo mi se ka da su u nikon kocu a ne negdji di se skupija pristojan, normalan svit. Ma oli ti nisi vidija kako se niki tamo vajadu po rvackoj zastavi, jubidu je i umotavadu se u nju po tleju i krive se, Bože mi prosti, ka da su šimije a ne juska čejad. A kad je oni zabala s čašon na vrj čiverice skoro san utrnila televiziju ma mi unuci nisu dali jerbo su oni krepavali o smija jerbo je za njih sve to bila jedna velika smijada...A bome i je parilo ka prinos iz pravega pravcijatog Cirkusa a ne sa slavja i čekanja izbornih rezultata nike normalne politiške stranke. Koji dežgracjun ? Ma koja sramota....Di se to još na ovemu svitu na ćelo lipidu stranaške, kako se ono reče...an, iskaznice. Koje krevejenje i ludovanje. Ma ke pristojna čejad ? Čurma barufanata, podnapitih judi razdrjenih košuj i škicanih jaketa. Evo se i sad sva naježin kad se tega sitin. I tebi je to slavje ! To je prin bi niki pakal vengo veseje ! Ja mislin da oni nisu ni mogli razumit otu većer ča se u stvari na izborima desilo. Dvi trečine njih je to tek sutra možda razumilo kad su se otriznili, popili rasol o kisela kupusa, sodu bikarbonu oli vodu iz botilje o kiseli kukumari, i onako mamurni polako počeli dolazit sebi. Ma je Karamarko, viruj mi, već otu većer sve dobro razumija jer inače ne bi izgleda ka krepana maška kad je vas kisel govorija da su pobidili. A o muke je skoro proplaka. A podnapita čurma oko njega ionako ništa ni razumila vengo je i dalje skakala i arlaukala ka na pravon derneku di su svi podnapiti i skroz u balunu. Eto tako ti je to bilo ,očalinko moj, u tom hadezejskom zagrebaškon restorano u kojen je Karamarko sa svojon stranaškon eliton čeka rezultate o izbora ....i nikako drugovačije !
Je, baš je tako nikako bilo šjora File. Dobro ste Vi to sve vidili i razumili ali prigovori stranak tek nan pridstoje, tek će započet i to more bit baš danas. Ko zna ča će još na kraju ispast ?
Ča ispalo da ispalo, lipi moj, svak pametan je moga već lipo vidit ono ča san i ja vidila - ko je ko i ča je ko i s kin ovod jemamo posla. Pa sad neka odlučijedu kako ji voja ! Bog jin da svaku sriću i pamet ! Ma će svak ko jema baranko dva zrna soli u glavi dobro razmislit s kin će u tal. S kin će poć tikve sadit ! Kašnje će bit kasno za kuknjavu ! Ja san, Marinko, jedna stara žena ma još nisan skroz izlapila. A kad ja razumin o čemu se ovod radi onda i svak drugi to more razumit....pa i najgori politiški slipac ma da je i najgori tukac.
Jemate Vi, ka i obišno, prav šjora File moja lipa. Daleko ste Vi od tega da ste izlapili ! Ali svak jema svoju pamet ma i svoju odgovornost pa nek radi ča misli da je najpametnije a judi će na kraju prosudit je li to ono ča su i oni tili kad su nikome davali svoj glas i svoje povirenje na ovin izborima.
A nego ča, sunce moje, nasmije se na kraju moja dobra šjora File.
Nisu naši stari još puno puno prin vengo san se i ja rodila zaništa govorili : "S kin si takvi si !"
Post je objavljen 11.11.2015. u 10:17 sati.