Pregled posta

Adresa bloga: http://blog.dnevnik.hr/janjoblog

Marketing

ISTINA I SAMO ISTINA

Jutros mi se zamaglilo red očimi od tuge, kad sam pročitala po svim portalim istinu o jadnem Polančecu i sad mi je jasno zač je bil cilo vrime Rumenko, rumenil se siromak od silnega srama pred narudum, jerbo su ga tirali da laže i krade, da jeftino prodaje i skupo kupuje, da plaća studije koje nisu nikem za niš rabile..o siroto dite Hrvacko.
Ali nima puščanja, dolazi žrtva nad žrtvami branit Rumenka, , časan čovik bivši premijer , čim puhne dobar vitar stiže u svoju ljubljenu domovinu, raščistit ki je kega tiral, na sva ta djela-zlodjela.
Imam nikako predosjećaj da je sve kriv Šuki, seguro je on stiral jadnega Sanadera u kakovu škulju, posudil s Kptola sprave za mučenje iz vrimena Gričke vještice, a Jaca je zela korbačinu i mahala i pucketala s njum dok su govorili Drivi i gospodaru satova kaj mora reč Rumenku da dela, a on je u silnem strahu sve to popamtil i naređival jadnem Rumenku da to sprovede u delo.
Zač bi inače palo na pamet Rumenku da da tulke novce za nekakovu studiju i zač bi Mravunac, siromak išal praznit kasu od HEP-a bez veze, pa ni on takov, zač bi išal punit kasu od HDZ-eja samo tako, bez prisile i bez koristi, da nisu delale sprave za mučenje, korbači i druga efikasna i poznata sredstva koja dovode poštene i pametne derektore i političare na pravi put.
Pa kadi ste videli da na primjer premijer dolazi divanit sa osumnjićenim u rešt i davat mu podršku da divani istinu i samo istinu, pa sramota bi bila da ni naša Jaca tako plemenita i da se ni sažalila nad Rumenkum i njegovum sudbinum.
Pa ni ona sve to zapisevala, zapisevala je samo kaj je Drivo divanil, jer tako je seguro niki naredil da mora, nego ni mi ipak jasno kadi su u ovoj prići Kaljmeta i Vukelić, dal oni i dalje farbaju tunele i delaju mostove preko njiv, treba to prostudirat, platit dobro još jednu studiju da se vidi da ti mosti i tuneli ne vodu na kakova tajna mesta, kada se skrivadu još nekoje Hrvacke tajne?
Sve mi se čini da tuj ima još ništo, duboko zakopano, nisu to naši dečki, naš Drivo, naša Jaca, Rumenko, i ki zna ki samo tako delali. Nekako me ipak Šuki jako podsića na Frnceka Tahija, Kaj nam je gore i kaj se više oko njegove bačve obruč steže on se više i glasnije smije?
Jaca je malo dezorjentirana u svemu temu, nezna sirota kaj bi, pa pita narod po cesti „Kako ste ..“ a oni odgovraju strogo narodno-hrvackim jezikum,koji ona i razumi ne razumi. Ni joj sirotoj jasno kako je to taj sav narod kaj je kliktal kad je imenovana za nasljednicu izabraneg u stranki i vladi, tako ogrubel prema njoj, kako se moglo dogoddit da se osjećaji tako brzo minjaju, kako je ona stamena i uvik voli Hrvacku i Hrvate, pa i oneg jadnika Drivu, kaj su ga poslali u Meriku a on sad, kad se voda počela bistrit, kad je jasno da niki ni niš znal osim Rumenka kaj se dela, dolazi opet mutit Hrvacku vodu i zbunjivat narod.
Pa ni to u redu, taman sam se pomirila da će Rumenko dobit 240 godin rešta, da se Gospodar satovi stacioniral u Meriki, da je konačno za našu Jacu čist zrak a on stiže nazad.
Ali ako je pročital, kaj divani Mravunac, a morada još ni, bojim se da niš od velikog dolaska na misto zločina?
E , a u Našem malem mistu, vodidu se također bitke i ratovi, naš pavednik Bokulić digal je celi Ogulin na zadnje noge oko afere „putni troškovi Športske zajednice“, ki iznosu 1.200 kun za celu prošlu godinu. Ajme, počelo je počelo, takova pljačka ni viđena u ovem gradu, to se mora rasčistiti, a tek svlačionice, kupaonice, parketi , tepihi, pa kaj je vami gospon Prravednik, kaj ni niki bil na putu osim Maria P i Koze? Ma mene zanima kuliko ste vi dobili dnevnic i drugih dobri od talasanja po plitkoj vodici i zamućivanja sa takovim glupostima , dok se milioni ziđu godinami po cestam, kanalim, ogradam, intelektualnim uslugam i pučkim učilištim u dugogodišnjoj izgradnji? Ili bi vi rajše, da nima nikakoveg sporta u nešem malem mistu, pa da nam sva dica idu u bertije i umisto da se bavu zdravim sportima, da piju po kafićimi…
Kaj ste se napopali na te ljude, zač se ne uključite u kakov sport konačno pa ćete morda bit na mistu kadi se delaju tako veliki i silni kriminali? Ali ne, tribalo bi se uznojt a morda i priznat da triba održavat dvoranu ku je narod naredil samodoprinosum, kaj ne ? I kadi bi se odigravale te proslave i manifestacije da nima tih sportskih objekti, u Pučkem učilištu valja ili morda med Fiorentinskim lipa u rožicam?
Ma zač uvik grizete tamo kadi nima mesa, na kosti?
Ja ne velim da nam je tribala teniska dvorana ne velim da je sve baš čisto ko suza naše Jace, ali da se tuliko vrimena potroši na 1.200 kuni, da se popravda pol grada radi tega kaj su tri čovika išli na put iz sportske zajednice, a drugo da sve štima? Ej Pravedniče, ništo mi tuj jako bode oči? Ili bi rado da niki iz te zajednice reče, dajemo ostavke „Ajte vi to delajte“, vi bi seguo bolje?
I tako, praćenje ovih događanji, ni mogla omest ni krvava Severina i njezin najnoviji mecena, ni Dikan, ni Lambaša, ni Vlatkica, čak ni gospa Begović u čipki i kožnim lačam preko kih se prelivaju obilni šlaufi, pa čak ni Berend kaj je smršavila i došla se pokazat kako je lipa na nekakovu modnu reviju. Svi su pali u šesti plan, jer glavni celebriti su naša vlast, i zato Šuker oduševljeno šalje puse novinarima. Konačno sam uspio biti glavni uz Jacu i naradet pravi šou, ali bez biznisa !
Sada čekamo da nam puhne malo vitra, i da preko bare dojde gospodar satovi zamutit vode ke je naša Jaca tako lipo razbistrila, i dogovorila sa Rumenkom da divani istinu i samo istinu?

Ajte bok!
JANJO, 18.rujna 2010.


Post je objavljen 18.09.2010. u 10:21 sati.