Asti čire Irudove...ma očedu li zbilja dovest Sanadera da svidoči okolo INE u Sabor...an Marine ?
Nikoga nećedu morat dovodit vengo će dotur Ive, lipo, ka ča zakon nalaže, doć i sam na šedutu o Istražnog Povirinstva u Sabor - da kaže svoju...šjora File.
Ma ajde sinko, ostavi se čorava posla - ka da un nas zakon išta piza ? Ko još drži do zakoni ? Njanka ni bambini u dičinji vrtić !
Ma za Gospu Blaženu....pa naravski da se dičica ne držidu zakoni - jerbo su malašna i ča oni znadu ča moradu a ča ne moradu uradit kad ji, ajmo reč, Sabor zovne da dojdedu svidočit ?
Ma to se tako kaže...mono jedna - nervožasto veživajući šudar oko svoga suvog lica...prikori me moja susida.
Ma joli si ti skroz na skroz čorav ? An ?
Ka da je teško i najvećem čoru vidit da se cila Rvacka pritvorila ka u niki dičinji vrtić a u njemu je glavna Teta...ona Kosoruša !
Ma kako to govorite o našoj pridsidnici vlade ? Da Kosoruša ?
Ne, vengo je Mona Liza....ka u nikoj svojoj zajebanciji doda šjora File i na kantunima o justiju zatitra joj podrugljivi osmjeh.
Ma znan ja , Marinko da ni ona baš Mona - ali je, more bit, profešurica od ingleškog kad onako lipo čakula sa fureštima...i to drito kroz ponistru od tonobila.
Ča ja to govorin ? Ma koji dičinji vrtić ! Cila je Rvacka postala ka niko veliko Sveučilište a naša vlada pravi pravcijati rektorski zbor. Samo narod neće da uči ! Linčine jedne neuke ! Eto, tikvani jedni, nikako jin ne gre u glavu da je vlada kupila ijadu i po novih tonobili i kako to ni nikakav trošak ! Pa kakoš naprid su takvin injorantima, su takvin narodom ?
Jer ko će dat takve grandece i pameti ka u naših ministrov ? Ma nima tega nigdi...sunce moje - pa da sad na jarpu metneš sve ministre i sve profešure cilega svita !
Ma jesi li vidija onega Bajsa..Onega ministra o turizma ? Ma to je takva priženca o čovika da bi ga najradije stavila u tinel u veltrinu da mi lipo figura...Cili je ka nika japaneška igraška. Ma ne ona na baterije vengo ona o porculana. A bome i on se iza Kosoruše gura da reče koju inglešku besidu...Ma nemoš o nje ništa. Ajme je i ona nika lajona - Ma ne bi je napričale sve naše peškaruše !
Šjora File, gren u grad. Niman ja vrimena sad ogovarat ovod našu vladu, Ni ni njima laka !
A naravski da jin ni laka.
Evo, uzmi, rečemo - onega Šukera. Ka da je njemu lako nosat uokolo samoga sebe. Jema u njemu, a ča ja znan - najmanje sto i deset kili žive vage !
Eto ste ji počeli mećat sad i na vagu...ka da smo na pazar o beštij .
Ma bogati, neš ti faca ! A vengo ča ću nego ji mećat na balancu. Jerbo se svi oni mogu mirit na onu teretnu balancu o telac, krav, prajac i najteži božji stvorenja - a ovi bidni svit se mora poć mirit na onu malašnu, apotekarsku balancu jerbo je vas uša u se. Jesi li vidija šjor Matu s petog poda. Vas se ocidija ka suvi suvcijati bakalar. A nemoš ga bidnega ni skuvat kako se usuka. Ne bi sa njin oni ljudožderi u Jafriku omastili brk. A ne. Ma ne bi ga Bogami doteklo ni za učinit marendu kojemu sučijavon ditetu !
Bože oslobodi...Ma ča to govorite - Ne mogu to ni slušat. Baš ka da ste skroz naskroz otišli na kvasinu ?
Jesan, jesan - baš san otišla na kvasinu Marinko moj...Da je još kapja maslinova uja moga bi od mene učinit salatu !
A to Vi ka da spremate obid za ote ljudoždere ?!
Ma pušti ti na miru afriške ljudoždere - Mene ovod ova nesriknja vlada svaki dan dere i to na živo...pa ću na kraju ostat i bez kože. Svu ćedu me odrat. Mi penšjunati ćemo bit ka niki živi kosturi....Turistiška atrakcija !
A to je Vas jutros udrilo niko teško crnilo ! Pa di na ovu buru ? Ka da ste deset dan gledali samo filmove o strave i užasa !
Ma ko će meni dat pinez za u kino, an - mangupe ?
Ne triba meni daleko. Izajden isprid kuće...Ča će meni kino ? Sidnen ovod isprid portuna sa ostalin kosturiman i samo gledamo. Jemamo ča i vidit: Mižerju, jad i nevoju. Judi višje nimadu ni srama. Ka maške kopadu po škovacan tražeći čakod za izist. Ne tražidu višje samo one plastišne boce jerbo ji višje niko i ne bacije...vengo judi traže stari, suvi kruv !
A isto ste malo tega nadožuntali, šjora File !
Pivaj ti pivaj, tico moja.....ma bi sve moglo poć kvraguc ! Eno - jesi li vidija u onu Rumunjsku. Sad bidu tili natrag onega Čaušeskua ča ji je bija satra u papar pa su ga striljali zajedno su ženon mu...Ma i on jin sad dojde ka nika sveta vodica prima pristiglin haždrafima i farabutima ča su se svugdi nakotili pa ka vampiri čićadu narodu i zanju kapju krvi iz tila ! A ja ti kažen da ni mi nismo daleko...Slušaj ti mene ča ti ja govorin.
Ajde, šjora File, evo će brzo i deseta ura...Morete sad popit bićerin prošeka...
Aj daj malo, da baranko malo ubijen ovu gorčinu s kojon san se jutros ustala.
Kad je popila bićerin prošeka...ponovo joj ga nalijen...a ona, onako suva i košćata - ali ipak pinku veselija doda: Marinko moj, još je meni pokojna baba Marta pričala da su u Kinu...kad bi bila glad jili sve ča bi jin došlo pod ruku...I maške, i pase i miše i zmije...i, Bože mi prosti...jude.
Ajme...opet Vi po Vašu !
Muči...šupja glavo...nastavi ona tiše.
Straj je mene, dite moje, da ovi naši - kad ne bude višje ničesa po kantama i kontejnerima - ne počmedu jist turiste, pa i Kineze. Oni mi se paridu nikako najslaji. Malašni su..žuti, svi činidu ginaštiku pa su slaki ka cukar....Pazi se, sad si ovo čuja i dobro zapanti: Moga bi nan narod pojist turistišku sezonu !
Ajme majko, skočin ja sa katrige...Vi ste skroz poludili. S Vama triba u Šibenik !
A ona pukne od smija...
Ma zajebajen te, politiška mono jedna. Samo te zajebajen - jerbo vi političari i niste za drugo. Ubila vas vela pamet !
Ka prvo i prvo, ni ti ludnica višje u Šibeniku. To još samo vi šempjasti splićani tako govorite. Ludnica je svukud, po ciloj zemji Rvackoj. Nima ogradi, nima posebnih likari....Sve su nas metnili u nju. Jedino spavamo doma - jerbo je državi tako cinije ! A brzo ćedu svi rvacki pacijenti ležat doma po kućan jerbo će nan oni Milinović ionako ukinut ošpitale. Ča će Rvatima ličenje. To je jedan zdrav i izdržjiv narod. A ti se omar pripa da ćemo počet zobat okolo Kineze. Ma ko bi se mašija za njima. Paridu škakavci joli mravi - a ne čejad !
Atroke ovi naši ministri. To su prežence o judi. E, bome - njih bi vajalo u lonac...i to oni veli, o lušije ! Tu bi se, bome, dalo puno tega nakuvat i omastit brk !
Ja ovo ne mogu niti oću višje slušat.
Gren radit, šjora File...Aj stojte mi zbogon !
Radit ! Ajme smija ! Političar gre radit...zakikota se moja susida.
Nemoj mi se umorit od posla , Marinko moj - i pazi da se ne oznojiš ispod jezika....Moga bi te uvatit propuv od pustega balenja i otvaranja justa...A di smo onda mi ? Jerbo ča bi ovi bidni narod bez vas političara ?
To vi mene zajebavate, šjora File ?
Bože sačuvaj, Marinko moj šesni....Samo ti aj radit...ali mi prin vengo partiš nalij još jedan bićerin prošeka a ja ću ovod čekat Maju i čuvat ću ti ovega pasa...reće ona i pogleda prima Li-Lu koja se, bidna. sva ščućurila kraj kauča i muči ka zalivena o straja - jerbo kad vidi šjoru Filu ka da je vidila sto đavli....
I ne brigaj se ti ništa Marinko....Samo da dok čekam Maju ne ogladnin i ne pofrigan ti ovega malega pasića na uje su malo kapule. Možda je baš sladak ka ča i pari...doda ona smijući se i gledajući ispod oka drhtavo bilo dlakavo klupko koje se još više zavuklo u kantun između kauča i zida - iz kojeg su još samo virila dva priplašena crna oka - ka da je pas razumija svaku rič šjore File.
Post je objavljen 28.07.2010. u 09:03 sati.