Marketing
Večera o' maškar 2010.
Finilo je vrime korizme, odricanja, najpri nas je dotuka Uskrs sa svojin prehrambenin običajima ... a kad smo se malo rikuperali (oporavili, za sjevernjake) od puste navale cukra, kolači, kalorija, i svakovrsni delicij, da ne rečen nezdrave spize ... došla je, već po tradiciji, večera od maškar.
Ka i svake godine, u ova doba, potla Uskrsa, okupimo se svi mi ča smo ove godine uzeli učešća u krnjevalskin događanjima, bilo aktivno, bilo pasivno.
Prilika je to da se sastanu i proćakulaju raznorazni ljudi, koji se osin u krnjevalskoj povorci i ovod, za stolon večere od maškar, ritko kad jemadu prilike nać i razminit mišljenja.
Pa je tako moguće uvatit našega dotura, kako mu njegov savjetnik šapje na uvo kako se najboje pravidu pravi mašogradski ćevapi ...
... ili kako se uz punu trpezu raspravljadu raznorazni, pa i vjerski, aspekti uređivačke politike Sućuraškoga Portala.
... dokle su niki od učesnika/posjetitelja stvar, to ka večeru, svatili ozbiljno, gledali su svoje posle i ka dobro odgojeni, nisu govorili punin ustima ...
... i baš i bilo briga zašto u objavljenome registru branitelji nije bilo neki ča su in prsa modra od bucanja u iste.
Kako ko okreneš, kako je govorila jedna stara reklama, mislin da smo se svi dobro zabavili, o spizi (hrani, za sjevernjake) ne triba ni trošit beside, bila je dobra i obilna ka i uvik, a Tiho i ekipa su se, ka i prijašnji godina, pobrinili za štimung u dvorani Vatrogasnoga doma.
Ispričavan se na malo slabijoj kvaliteti fotografija, ali san radi boljega motiva, uhvaćenoga sa veće udaljenosti, svjesno odlučija malo žrtvovat kvalitetu.
Bilo nas je malo manje nego ča bi bilo prijašnji godin, čarobna rič "recesija"
je i ovod sve infetala (zarazila, za sjevernjake) . Zdravi bili ... do idućih krnjevalski svečanosti u Mašogradu (Kaštel Sućurac, za sjevernjake)
Post je objavljen 10.04.2010. u 14:16 sati.