Već više od misec dani nis bila na sajmu, a tribalo bi stuć ku kunu, zač ni dost Mijeće pemzije i onega kaj dojdu doma po zelenjavu moje mušterije, jerbo triba tega puno det pod bor. Puno je dice i familije, a Janjo je uvik ništo spremala , svakemu sitnicu, ali se sabere…
Mislim si čul jutri pojt na sajam, ili ne. Nikako me stra da opet ne dojdu kandidati za prisednike države. Stalno, svake srede mašu po Ogulinu i idu na sajam, tobož se slikat s narodum i pitat ih kako su, pa me stra da me nebi ki od njih to pital…? A još više me strah da se nebi ki smanum slikal, zač mojega kandidata ni nigdi, jerbo su svi ovi skorom isti. Drži vodu dok majstori odu, a kad projdu izbori i sednu u Pantovčak ondak će bit druga pisma…
Zamislite samo da je dr.Hebrang jutri u Ogulinu i da dojde baš on Janju pitat kako je i kaj misli o ovemu svemu? Ajme, mili Bože, kaj bi čul od mene, ajme, omrknil bi mu Ogulin i narod još i više neg kaj pomislet morete!
Neću ovdi divanit, moram sve to grdo kaj se sabralo u meni ostaviti nigdi, moram pojt jutri pa ki došal da došal, samo u mene nek niki od nji ne pača ako mislu na miru pojt u svoj Zagreb ili kamo već mislu?
Pa kad bi još saznali da sam ja ona Janjo, kaj je tila da moj Mije zame presedničko mesto, da se kandidira, ajme, sramote ..? Pravo veli moj Mije, nemoj Janjo nikud pojt, jerbo ako ki dojde jutri i postane prisednik, pa se još slika s tobum, nećemo moć pojt od srama hiljadu godin nikud iz dvora i iz kuće van, pogotovum ako bude sve izlagal u predizboru kaj i svi drugi?
Morda moj Mije ima prav, morda mi je bolje ne pojt, pa manje det pod bor, joj, kaj nam je tega već dost, teg tramakanja, ti reklami, teg keljenja po televizori, smiju nam se i sprdadu konda imadu kadi svih onih milijardi euri duga jutri za vrnit kaj su zadužili?
.. a morda ja jedanput poslušam Mijetu, morda projde Mare mesto mene, al neće ni z njum projt bolje, zač će ona njimi sve izdivanit kaj sam ja ovih dani divanila pred televizijum… morda je bolje da niki nikud ne gre jutri ? I moram prestat mislet o temu, ki god da bude samo nek bu gospon, da ako krene kamo van med stran narod da ne lupeta i da me ni sram!
Kaj nisu mogli nikako smislet izbore u nikakovo drugo vrime neg izmed Božića i Nove godine, tako da nemoremo niti ta dva velika blagdana imet, a da ne moramo mislet na politiku? Kad je već tako ,nek nam i ovi izbori projdu sretno...
Lip bor je Mije izabral tamo kadi smo pošumili pred 7 godin, tako lipu smreku, da mi se srce paralo kad sam videla da ju je posikal, al Mije veli da su sve takove, ki bi znal ćel bit kad velike i narast do cimpera kakovega, ili će ih vruća leta šundrat, to niki nezna…nekoje su se i posušile, morda i opstanu..?
Lip ćemo Božić naredit, prebrala sam sav nakit i ove ću godine naredit sve u jednoj boji, sve ću det na naš bor u boji zlata, da vidim da je ništo od starine zlatno ostalo med nami, pa makar to bil i nakit na boru, jerbo vidim da je sve drugo apšisalo ili je nestalo, nigdi se zagubilo sve lipo, istinito i vridno, pa kad ne blišći u našim srcim i u duši, neka blišći na lipoj, makar posićenoj, zelenoj smreki.
Znam, reć ćete, to je lažni sjaj Janjo!
Zna to vaša Janjo, ali nemore pobić ni sklonit se nikud, nima više nigdi mesta na kugli zemeljskoj kadi se ne blišći laž, obmana, prevara, došlo je valja takovo vrime, kad i to moram izdurat i priklonit se, pognit gobu i čekat bolje?
Evo, sa suzum u oku i molitvum u srcu, svimi želim BLAGOSLOVLJEN BOŽIĆ I SRETNU NOVU GODINU!
Ajte bok!
JANJO, 23. prosinca 2009.
Post je objavljen 23.12.2009. u 13:35 sati.