ok
Danas na netu lipo san čekirala da mi je sela plaća. Lipo, na vrime. A bravo! Ma klinac bravo!!! Pazin ja! Ma ča je ovo, svete mi lumbrele, MANJE!!! Manje je, koliko god ja krečila okice, manje i manje! Upozorena san od "treće strane" da se šef zaje...Ma ja neka držin svoju bandu. Ha! Pa baš ja! I ča ću sad! Mučat ili otvorit laloku, neka se mala dimi!
ok
Ovo me sitilo odma na jednu staru štoriju. O sinu jednoga bodulskoga težaka, vridnoga čovika. Imal je i loze i od nje činil slatkoga vina. Imal je i prasci pa je činil najslaji pršut od njih. Imal je i lipi del od maslin. Blaga je imal, ovac i janjac, tovari je leti peljal grad, furešti su davali lipi šoldi za učinit đir na tovaru, slikivat se... Svega je imal, vridan je bil. Imal je i mlajega sina, komu motika ni bila draga. Otil je va skule. Otac mu je bil mekan na dicu pa ga je poslal u Zadar na skule. Mali je lipo študijal, otac i mat su mu bili kuntenti. Jedan dan šal ga je otac obać, da vidi kako mu je Zadri. Popeljal ga je mali i va skulu, do gazde kadi je imal kameru, otac pazi sve i srce mu pomalo trepće. Mali ima lipe ruke, žulji od konopi s kima je prošlo leto vukal mriže sada su pasali, ruke su mu ka u šinjorine. Bele i mekane, va njima nosa okolo libri. Kosa mu diši na neke pomade... Peljal ga je mali svuden, do na večer. Onda su načinili điradu po rivi. Otac se malo stisal, škinu uvukal va kapot. Sve si misli ...mučat će, mali voli skule, neka mu je. Bit će fišlkal, i to je dobar bokun šolad posli. mali je pametan, neka se uči. Ma sve mu se pari da se mali puno prominil. Postal je gospodinčić, sve se prečinja, načinja...Čudno govori. Otac ga jedva pozna.
Na jedan put stane mali na sred rive, popazi va nebo i ćapa oca za rukav pa ga fermiva.
-Ćaća, popazite malo ča je lipa luna! Ma recite vi meni, vidi se i u nas va boduliji ovako lipa luna?!
Oca mu ćapa neki mled, muka mu pukne na oči, malofali se ni obalil pokloh. Uzdahne teško, popazi va lunu i pasa se težačkon rukon po škini kako da ga pot pasiva. Puno toga mu je pasalo po glavi. I njegove njive ča ju nadničari kopaju, i loza i masline i ovce i barka...Celi njegov težački život pasa mu po glavi,sve ča je podigal od svoje očevine za sebe i fameju, a sad pazi va svoga maloga ki va skuli uči bit gospodin čovik, ki će bit da je popil pamet svita a i ko i ne, malo mu još fali... sve su mu to mater i on dali fala njihovome priprostome, ma poštenome i teškome trudu...pa klima glavon livo desno i uzdiše:
-Poooveri moji pršuti!!!
Tako nekako je to bilo. Poanta...Radin ja, i to dvokratno, do 11 uri noći. I ča iman od toga? Najkin ono malo ča se reklo, nisan "dobila" ... I zato, poveri i moji pršuti! Poveri, da poveri bili...
Kako se osića čovik? Osićan kako da su mi rekli da san šordava. Da san i previše dobila koliko vridin Da ne valjan... Kako da su mi ćepu prilipili sred obraza.
I ni mi prvi put ovako pasat va lipoj našoj. Više bi rekla da mi je ovo užanca.
prevod mi se ne da pisat boj san ljuta i bisna i ...
Post je objavljen 03.07.2008. u 02:40 sati.