Pregled posta

Adresa bloga: http://blog.dnevnik.hr/domina

Marketing

Baketina


Sidimo po murvom i ladimo se. Gornja je skuvala kavu, ja sam donila fritule i zajebajemo se.
Vidiš, svi ovi dišpeti po malemu mistu, su krenuli poradi tebe Joke dragi - ja ču.
Zaradi mene? A ča sam ja kriv? – Joke če zabrinuto.
Tutle jedan, siti se, ča si obečava?! E da si povalija Livu ka čovik, ne bi porebambila vako – ja ču.
A ča bi biloDome moja? - upita me on milo.
A borami, sidila bi na teracu i ladila se, bolija bi je kurac jel moj Antiša zapiša vrata, bolila bi je nika stvar jel skuvala obid, pivla bi, pivala po cili dan, bila bi milina.
A ča oče reč da se Desna jebe ka luda? Siti se Donja.
Ne, ona je drugi teški slučaj, jemaju iste simptome, a drugo jon se piše. Činim fintu rukom, zavidavam glavu.
Jo ča si ti pametna Domina moja , njlipja moja gazdarice – Joke če usapunjan.
Muči đava te odnija, razbit če ti Donja pičku! Rečem ja.
Vidim Keko raširija justa i iz sveg glasa zareve:

Skoro saki put
kad se mi pogledamo
ti i ne odzdraviš
ko da se ne poznamo
A da mi te k sebi zvat
kad ćeš zaspat
prvo sna da ti rečen
da volin te još.


Pronese se pisma niz kalu, sve do đige i nazad, svi prihvatiše:

Vilo mojaaaa
ti si moj san, ti si moj san,
al lagje bilo bi
da si tuja mi
da te ne poznan
da te ne znannnn
.

Stali se okupljat furešti, čire nas, misle da su «oni dani u misecu», a mi samo skuvali kogulu kave, a ča bi bilo da smo obidvali, e, ne bi bilo kraja. Gledam ja priko vale i vidim ljeska se more, jedrilice klize niz vitar, šuškaju jidra, šuškaju vali. Jo, ko ovo more platit.
Ma jel vami malo čudno - Keko će moj- da svi brodi ulize u susidno misto, a nas zaobidju u širokon kutu.
Je jemaš prav- reče Điđi – oni su napravili mista u porat za vezat brode, naplate jim struju, vodu, uvale lošu ribu, a vi se jebite malomiščani.
E, kad je moj Keko govorija učinimo mista za nautičare, niko nija tija čut, a sad idu u drugo misto, tako nam i triba - ja ču.
Ma pade mi nikod napamet….- rečem ja. Svi načuli uši, stisli smo uvo do uva, ka ovisnici na okupu, Gospe moja. Joke jopet stavija ruku na moju gujcu ka slučajno, Antiša je to oma vidija i zapiša mu šlapu, Ljube je spavala na mom krilu i prela, baba je prnula (jebate ča more izdušit), Liva je provirivala kroz škuru, Desna je obukla šlafrk iz karitasa, Joke je trepča ka pizda, reci višje , izgorit ču.
Usrat češ se, slušaj amo. A da mi nji, ka slučajno zajebemo, triba mislit na imidž našeg malog mista – podviknem ja.
Triba, triba- svi prihvatiše.
Evo, vaki ti je moj plan ja prošapjem i nasta tišina dok sam ja izlagala ti paklenski plan, kojim čemo udrit kontru, stavit baketinu za furešte.
Najprin moramo imat infrastrukturu, koja će pratit ovu našu poduzetničku ideju, moramo uredit naše malo misto, da s mora ostavja prepoznatljiv brend.
- Najprin triba očistit sve škovace po malom mistu, svu plastiku bacit, vratit stare drvene škure, stolove, stolice, plastične pitare zaminit ruzinavim tečami i posadit đirane. Otvorit sve ponistre i nasrat cviće što više…..
- Obisti robu na tiramole i nasrat (nakrcat) ih mudantama, šugamanima i lancunima ….
- U porat oslobodit mista za furešte, onim vlajima ča su vezani u četverovez reč da dolazi lebičada, da izvade brode vanka, jušto…..
- Tzv. ribarima naredit da se uvate krpat mriže na rivu od pokojnega dida……
- Ugasit letriku u malo misto (ka slučajno) tako da se dica izajdu igrat vanka na kolo od barila, spuštat se karetom niz kalu, franje …..
- Sve žene pokretne i nepokretne privest na rivu nek side, ka čekaju ribare s mora, obuči ih u babine stare fuštane, dati jim da pletu
- Čarape- Điđi uskoči
- Ne čarape, to su vlaški običaju, finu pašku čipku – ja ču
- Ali mi nismo na Pagu – Joke če
- A ko to zna osim nas ovod, malo dramatike, malo kolorita u misto ne bi falilo – ja ču konspirativno.
- Kad dojde Tonći s plivaricom, cilo selo jema da se skupi i pokupuje svu frišku ribu, popodne želim da cilo misto peče istu na gradele, tako da cilo misto smrdi po friškini a….
- A ča ču s fratrom, jeman ga za obid? Frane če
- A jebate daj ga fratru, ja ču
- Kod Žuži (konoba u misto) želim da gosti sami jedu iz bronzina, ka štedimo vodu, ekološki smo osvješteni….
- Da nisam vidila koga da na mobitel zbori, jasno!



Tako oni koji dolaze s mora, zinu; ajme koje šesno malo misto, ka da je život sta prin 50 godin, a jopet ka da se samo usporene živi. Nautičari su ti fjakavi, zar bi cili dan vatali dašak vitra,za maknut se sto metri. Znači mentalitetom su nam slični.
A ča čemo mi radit Domina moja, reče pop?
A vi čete blagosivat i uzimat milodare - ja ču.
A ča čemo mi radit Dome moja, ljubavi moja šapne tiho Joke.
A vi čete se karat ka i obično, činit čete monade, nešto ka teatar na otvorenome. Onda čete se mirit, onda čete bumbit, pa se karat pa ispočetka…. Program je slobodan, a ne moren ja i tekst smislit.
A jebate ča češ ti činit i tvoj Keko? Siti se nikor.
Mi čemo svrnit nautičare u maše malo misto. Rečem ja i svi razjape justa. Padne Joki šlapa, pripadne se maška, skoči Antiša (taman je prispa), zaleti se u Live, pojuri sve maške, pojide krokije, zapiša vrata. Izleti Liva i stane beštimjat: kravo jedna, ti i tvoj pas!!!
Kurbačo jedna, da bi kurbačo - ja ču, ulizi u kuču smlatit ču te ka tricu.
Joškota, Joškota, brzo tuču me – ona če
Jeba te Joškota, da te je jeba, ne bi ti falilo nike stvari – ja ču. Sta se don Antiša krstit, izlatitli golubi iz golubarnika, Ljube moja se nakostriješila, dica stala drukat. Uleti Frane među nas, a taman sam se krenula da jon opizdim plesku, ljudsku i rastavi nas.
Onda neko potegne pismu i za par minuti ka da ništa nije bilo. E tot ti je, kad si duševan. A ča ču, ko me ne bi!

I tako za par dan, vidiš kako ja, Keko i Antiša isplovljavamo s našim brodom iz malog mista. Onda pridveče vidiš jednu točku, kako se polako , livo desno vrača put malega mista. Ne ulizimo, nego se sidrimo prid valom, a drugi za nami, pa se udri sidrit, desno, livo, gori, doli, brat bratu 50 brodi. Oni uvik prate domače ljude, ka mi znamo ča je najbolje. Upalili mi ka slučajno petrolejku, stali bumbit vino, ljuljuškamo se i promatramo ča se dešava u ovom pitoresknom malom mistu. A ono idila, povirin kanučalom da li su svi atento, a čuješ samo pismu:
Da te mogu pismom zvati ,
ja bi piva ne bi staja,
da se stara ljubav vrati,
nebi srići bilo krajaaaa…………….
Jo Keko moj, koji smo mi pametni svit, svakom moremo upakirat ča mu triba- rečem ja.
Ma pokrij se, ima bave, ovi Švabo ti stalno nazdravlja priko bande od broda, bojin se past če, pijančina jedna.
Ja mu nazdravim i namignem. Ma višje sam ja učinila za ovi naš jebeni turizam nego li naših sto ministi i Kalmeta - ja ču skromno.
A je da je i on šeta u gače i prije bi bija napravija gay paradu- Keko če dišperan
Zaljuljuškalo mi mozak, uvatila me mala snaga.
Gren ča.




Post je objavljen 15.08.2006. u 15:03 sati.