Ot Štefeka
10.09.2016., subota
ZGUBIL SEM KLJUČA OD LAJCE
|
ZGUBIL SEM KLJUČA OD LAJCE Za one koji ne znajo, moram reči da je lajca drveni lomor koj ne stoji v zrok, nego je polježečki složeni i ima ključa kaj se s ključom do zakljenoti. Takvo jeno lajco je mela i moja mama. Nutri so bilje sakojočke stvori za oblječi, plofte i sljično, a pot sem tem f plofti je bil kobelor s penezi. To mamina lajca je mela ključa koj je bil šuplji, a to znoči da je mel prelo po sredini. Unda smo se skoro si igralji s takvemi ključi. F prelce ot ključa se naruljilo ono črljeno žveplo ot šibice i prelce se zateknolo š čavljom koj je s špogicom bil prevezani za ključ i unda se vudrilo po banderi i počilo je. Jempot smo tak pocalji, a več je bila noč. Jo sem fest zamohnol i ljupil v bandero, akat tamo, v roki mi je ostola samo špogica, a ključ š čavljom je nekam odljetel. Odljetel je f koprive ilji nekam drugam. A kaj ve? Jo sam si misljil, ampok ga bomo negdi našlji. Vre nemogoče! Grintavec je rekel: – Dosta s pocanjem! Idemo si iskat Štefekovoga ključa! Petalji smo po koprivjo i si smo bilji tak spečeni ot koprivja kaj so nam roke mrvelje i joko so nas srbelje. Alji ključa nigdi! Jo veljim: – Idemo dimo, jo ga pem zutra po dnevo iskat! Drugi den je mama morala iti f Čakovec k doktoro na nekof pregljet. Trebalji so ji penezi, a penezi so bilji v lajci zakljenjeni. Dok sem išel pocat, zakljenol sem lajco jerbo sem si misljil, bolje kaj zakljenem lajco kaj na što peneze fkral ak bo lajca otkljenjena. To je unda bilo pametno, alji ve je ne bilo dok sem zgubil ključa. Mama je ključa se po sot iskala, a ključa nigdi. Pita ona mene: – Čuj, Štefo, si morti ti zel ključa od lajce? A jo sem ne štel priznati, jerbo sem bil stroho da bom joko bit, i zoto sem rekel: – A kajbi, mama! Pok kaj če meni ključ od lajce? Minolo je več polne i mami je več prekesno bilo iti f Čakovec. Mama je dišla po vujca Rokija i strica Ivija kaj so s pajserom potrlji ključenico na lajci i kaj je mama mogla dojti do kobelora. A unda so stric Ivi znogla reklji: – Štefo, jo sem snočka videl da ste vi dečki pocalji z ključima po banderi. A jo sem samo rekel: – A kajbi! Dok so stric i vujec dišlji dimo, mama je poslala sestro Katico po šibo i stola je pred vrota kaj nam vun pobegel. Najpre me porpot vdropila z vesljicom jerbo je baš žgonce kuhala, a unda je Katica došla z veljkom šibom i pitala je mamo, alji bo ji jena šiba dost. Bit sem bil z zeljenom neoguljenom šibom. Tak me naljemala kaj sem čurke mel po hrpto i po nogoj. Bez večerje sem ostal, a prije toga sem moral iti tikve nakosati za svinje. Unda sem si noge opral i moral sem iti gloden spot. To kaj sem ključa zgubil je zapraf bilo i dobro jerbo je mama dola pre tišljaro delati lomora i to novoga kaj je v zrok stol, a ne kak lajca koja je lježola polježečki. Lajco so stric Ivi i vujec Roki dneslji na guno i v lajci je ne več bila obljeka, nek naružđena koruza ilji pšenica. |
- 02:13 - Komentari (8) - Isprintaj - #
02.09.2016., petak
CUCEK SE NA KVAKO PRIJAL
|
CUCEK SE NA KVAKO PRIJAL Sigurno se pitate kak se cucek more prijeti, a nema roke? More se, more! Te Cucek ima roke, i to dve. A te Cucek je jen dečko koj je z menom išel v isti razred. Dok smo se igralji, on je navek lajal, hodal je po sema četirema nogomi, očem reči po rokomi i zodnjima nogomi. Navek je delal nekve hurmastoče. Cucek je povedal kak mo je njegof japa povedal kak so negda ljudi bilji bolje korožni i sposobni nek mi denes, i kak so ničemo ne bilji stroho, i kak so bilji provi meštri. Pilji so f krčmi v Meki po dvo tjene i opče so ne išlji dimo, a žene so jim moralje donesti čisto obljeko kaj so se presljeklji. Celo vreme so samo pilji i kortalji se i delali sakojočke huncotarije. Cimerman je hrosta postajel na kukmi krova, šoštar je naprajel cipelje bez mere i cipelji so pasalji kak po meri. Tišljar je širočkom sekirom z jenem šubom otsekel potplata na cipeljo koj je bil na čoveko, a ne ga je ranil. Šnajder je bez mere zašil opravo i to oprava je čoveko pasala. Se so to delalji za oklado. Koj je zgubil, moral je sem platiti pijačo. To so bilji provi bečari. Zakortalji so i grunte i zemlje i morho. De smo mi do njis?! Tak je povedal Cucek, a unda je pital: – Što hupa na zmržnjeno kvako jezika presloniti? Ha, kaj ve močiste? Vidite, jo hupam jerbo sem jo bečar, a ne kak vi strahopezdeci. Alji zabadaf nam, neg za oklado. Si so mo govorilji da ne hupa. Oklada je bila sladoljed z vrhom nametoni, tri turski medi i deset karamelji. Cucek je rekel: – Jo ve nemam tuljko penes, alji bom jojca pobral po našima i sosedinima gnjezdima i to bom f štacuno prodal, a ako niti to na dost penes, unda bom to kaj falji negdi gepil. Cucek sje navek nosa ftikal de mo je ne mesto, alji ve sje ne nosa fteknol, nego jezika. Dok je jezika pretisnol na zmržnjeno kvako, samo je počel joči bračati i mrčati, a Grintavec je rekel: – Fljetno moramo nekaj naprajti, inače bo Cucek tu preljepljeni tak dogo dok ne sprhne. Jezik mo se tak zaljepil kaj je bil skros-naskros zaljepljeni. Išlji smo po kropa i f krop smo hitilji snega i tak smo ga otopljalji dok se jezik ne otpustil. Z jezika mo je počela iti krf i samo je skamuskal kak provi cucek. Drugi den smo si mi kaj smo navijalji za Cucka, si smo si smelji jempot sladoljeda poljiznoti, saki je dobil malo turskoga meda i pol karamelje. Jo sem si premišljoval, alji bi i jo to hupal. Alji dok sem videl kak je Cucek potlji zgljedal, rekel sem som sebi: – Štefo, naj takvoga nekaj delati, makar bi drugi reklji da sem jo ne nikof bečar. |
- 23:46 - Komentari (8) - Isprintaj - #
27.08.2016., subota
NA SONIMA S KOTORIBE
|
NA SONIMA S KOTORIBE Jo i Grintavec imamo veljke soni, i to saki svoje. Soni so naprovljene pre tišljaro i uglavnom nam koriste za sonjkanje, alji i kaj se v zimi nekaj dopelja kaj se nemre nesti. Nekoji ljudi imajo i joko veljke soni kaj ji konji vlječejo. Oni s tem sonima sikaj prevožajo. Jempot sem jo videl kak so takve soni išlje po drumu, a dzoj za veljkim sonima so bilje prevezane malje soni i na njimi se jen dečec peljal. I mom mje pola na pamet jena čisto nova ideja. Tak bi jo i Grintavec moglji zavezati naše soni za teretni cuk i cuk bi nas zabadaf vljekel. Dbežal sem k Grintafco i povedal sem mo svojo čisto novo idejo. On je rekel da bi to bilo dobro, alji bi moralji iti samo z jenima sonima i obedvo na tema sonima sedeti kaj bi bilji bolje žmefki i kaj nej palji soni dolji. Tak je i bilo. Zelji smo Grintafcove soni i čes polje pravac na kotoripsko stanico. Malo je mene Grintavec vljekel, malo jo njega. Grintavec mje uspot povedal kak so sosed Đuri povedalji da je cuk zglojzal f Pragerskomo f Sloveniji. Cuk je zglojzal, alji se ništ ne dogodilo, samo so se vagoni potrlji. A to Pragersko je bilo poznoto po tomo kaj se tam moralo navek presedati z jenoga cuga na drugi. I zoto ako si nešto poje grižavo tepko hruško, unda se velji da mo potlji te hruške f žaloco preseda kak f Pragerskomo. Valjda te terheš kaj nas bo vljekel na zglojzal i unda smo i mi gotovi. Jo sem z našima soni v zimi vozil kuruzo v „Elektromlin Hunjadi“. Tam so soset Jondri meljalji kuruzo. I moralo se reči kaj očeš: kuruzno meljo ilji šerota. To moraš som reči makar te mljinar niti ne pita. Jempot sem jo zobil i dopeljal sem dimo mesto melje šerota. I tak smo jo i Grintavec pomalji došlji sonima f Kotoribo. Na štacjono je bilo puno štreki i stolji so sakefeljejočki cugi – i motorka i putnički cuk i jen terheš. Te je bil naš. Samo smo moralji čakati dok gene. Tak dogo smo se pomalji sanjkalji i grudalji. Dišlji smo malo dalje ot stanice jerbo smo se dogovorilji da vojčico zaštreknemo za hokelj na zodnjem vagono dok cuk več krene kaj nas prije na što natiral. Tak je i bilo. Mašina je fučnola, prometnik š črljenom kapom je zdigel ono svojo lopotko i po vojnički je pozdravil i lopotko je del pot pazove. Si vagoni so joko zružilji i zacviljilji, mašina je počela centrifugerati kak vešmašina i cuk je pomalji krenol. A mi begac za cugom. Prije smo još na vojčici naprajlji jonjko i zaštreknolji smo vojčico za hokelj i fljetno skočilji na sone. Na šveljerima je bil zmržnjeni snek i opče so se šveljeri ne vidlji. Alji sejeno je fest drnjkalo. Grintavec je sedel nopri, a jo za njim. Trdo sem ga držal pot pazove. I bilo je joko ljepo. Alji čim je cuk bolje išel, to smo i mi bolje drnjkalji. Šveljeri so nas pomalji v zrok othitovalji. Tak smo počelji skokati skup sonima kak mlodi jariči, a soni so počelje skrekati. Ve mje več ne bilo ljepo. Tak je počelo joko drnjkati kaj sem misljil da mi bo žalodec na zobe vun zljetel. Najempot je počelo nekaj joko fest ružiti. A to je bil željezni most. Zove se željezni most zoto kaj je od željeza. Na željeznom mosto so šveljeri bilji golji, bes snega, jerbo se tam snek restaljil i prepal pod most. Culo ti cusravo, obedvo smo skupa sonima zljetelji v zrok i to por pot. Na krojo željeznoga mosta so soni skupa z nami fest zljetelje v zrok i obrnolje se. Jo i Grintavec smo zapikeralji v grabo kre štreke. Grintavec se zapičil v bandero i zajofkal. To je ne bila bandera ot struje, nego ot teljefona. Soni so dišlje skupa s cugom, a mi smo lježalji v grabi. Dok je to videl, Grintavec se tak rezbečal kak šmrkljivec i rekel je: – Ve me bo japa tak zljemal kak vola. I kaj smo ve čineči? Grintavec mi velji: – Štefo, ve za terhešom pe motorka i terheš mora f Kroljefci počakati dok motorka dide jerbo je motorka fljetneša nego terheš. Zoto se mi moramo požuriti f Kroljevec jerbo nas bo tam terheš skupa sonima čakal. I mi begac. Bežalji smo po štreki kaj so nas noge neslje. I tak je i bilo. Motorka je zaprckala jerbo ona ne zna huškati, nego samo prcka kak prcka. Mi smo se skrilji za grmje kaj nas na što videl. Dok je motorka dišla, mi begac dalje. Nesem znal da je te Kroljevec tak dalko. Celo vreme sem si misljil, a kaj ak nas naponejo divje svinje ilji divji voki ilji divlji jeljeni? To sem ne hupal niti Grintafco reči kaj se na i on prebesil. Došlji smo f Kroljevec. Akat tamo, niti ga bilo motorke niti terheša niti soni. Prozna stanica. Grintavec velji: – Piši ga vrit! Se je dišlo k vrogo! A jo mo veljim: – Ivo, a kaj da pitamo skretničara za soni? A Grintavec mi odgovori: – To ne dolazi v obzir! Išče pemo v rešt ako bodo znalji da smo mi soni za cuk svezalji. Bilji smo glodni kaj mlode lostavičke koje kljune otpirajo kaj jim store lostavice nekaj f kljun hitijo, a nam bokcom je ne mel što kaj hititi f kljun. Nesmo bilji samo glodni, nek i zdrnjkani i zmočeni i tožni. Nejrejši bi bilji pomrlji od jada, alji nam je več bilo joko zima i trebalo je do doma rojzati. Jo veljim Grintafco: – Ivo, nikaj se naj! Jo ti dom svoje soni kaj se boš sanjkal, a ako boš dober, japa ti do delati nove soni jerbo boš moral z nečem peljati kuruzo f „Elektromlin Hunjadi“. Nego, jo misljim kaj bi mi do doma ve išlji po drumo kaj namo još jempot snega prtilji po štreki. Tak je i bilo. |
- 01:22 - Komentari (8) - Isprintaj - #
Rujan 2016 (2) Kolovoz 2016 (1) Dnevnik.hr |
|||||||||||||||||||||||||||||||||||||||||||||||||
|
Opis bloga
|
|||||||||||||||||||||||||||||||||||||||||||||||||