Mašogadur

petak, 20.02.2015.

Gotova sezona Krnjevala AD MMXV

Pošto smo mi, kad rečen MI mislin na ekipu iz KPU "Kampanel" prvenstveno mašogradske maškare (Mašograd = Kaštel Sućurac, za sjevernjake) ne činimo prestave za Rijeku i šire, nego najpri za našu najbližu okolicu (Kaštila, Vranjic, Trogir) di gremo povirit sa di kojon točkon, koliko smo u mogućnosti, a i da pravo rečen, koliko ko jema volje ...
Tako da nan je, već tradicionalno, kraj krnjevalske sezone u Kaštel Starome, na Donjokaštelanskin maškaran.
Ove godine smo gostovali sa dvi točke ... "Imamo Predsjednicu" ...

 photo IMG_0525_zpsfbe79006.jpg

 photo IMG_0526_zps032670d6.jpg

 photo IMG_0529_zps56016cbf.jpg

 photo IMG_0530_zps879c2f06.jpg

ka i sa tradicionalnon sportskon točkon, u izvedbi Đeme i Frane ...

 photo IMG_0517_zpsa8fad2d2.jpg

 photo IMG_0521_zps62054a88.jpg

... da ne zaboravin spomenit da je, ka i uvik kad ga zdravlje posluži, bandiru nosija naš Kengi ...

 photo IMG_0512_zpsb066d098.jpg

E sad, koliko mogu bit objektivan, pari mi se da je mašogradski prikaz izbora za predsjednika/cu Lipe Naše izazva nepodiljene simpatije okupljenoga pučanstva, tako da su na svaki uzvik sa razglasa "Imamo predsjednicu!" uzvraćali sa ovacijan, ka na stadionu. Tako je bar bilo namo di san se ja stacionira, u Novome, isprid banke.

Sad, kad je sve gotovo, triba, je li, potegnit crtu. meni se pari da je, da više ne spominjen onu prokurbanu besidu "recesija" točaka, ukuno gledano, bilo manje, ali da su bile kudikamo kvalitetnije nego proteklih godina. Nisan se odavno nasmija ka za "Sprovod", "Bilo kuda ..." i "Imamo predsjednicu" u sućuraškoj povorci i "Skok u vis" u Donjokaštelanskoj ... Naravno, to je samo moj osobni utisak, i meni se osobno više sviđa da imamo dvi PRAVE točke nego nekih deset 'ebete točaka cerek
Od pridučer, Čiste Sride, nastupija je period Korizme, čišćenja, odricanja, koji traje sve do Uskrsa, a nedugio poslin blagdana, već tradicionalno, organiziramo domjenak za sve učesnike povorke i naše drage sponzore, koji su nan u ova teška vrimena pomogli da ovo sve organiziramo. Željno iščekujen party njami
Zdravi i veseli bili! mahmahmah

20.02.2015. u 09:41 • 0 KomentaraPrint#

utorak, 04.02.2014.

Avanti popolo!

Svake godine isto, malo izad ča projdedu Baltazar, Melkior & Gašpar sa mirisima, zlaton i tamjanon, mi se malo ozbiljnije uvatimo maškaranoga posla. Nije da ne radimo ništa priko cile godine, ali u ova doba smo svi na većemu broju okretaji nego inače.
Zato i ovakovi naslov ... da nan malo digne tlak, iako iz različitih razloga headbang
Pogotovo ja osobno ... ča radi svoji zdravstveni problemi, ča radi oni priskočeni maškar od nazad dvi godine, kad smo svi bili u koroti, iz poznati razloga.
Da me ne bi ko svatija sa malicijon: uželija san se ovi raskalašeni domaći monadi, batudi, badanja, kontreštavanja, karbe i podjebavanja. I baš neću napisat prevod za sjevernjake cerek
Ove se godine, nakon jedanaest godišći, opet poklapa moja godišnjica braka i dan kad su naše maškare, zadnja subota prin pokladnoga utorka, pa san i apropo tega uspija nagovorit Zakonitu da «repriziramo» kostimografiju od nazad deset godin, a Vinkici smo morali nabavit novi kostim jerbo je sve one prijašnje debelo prirasla.
Kako san lani u vrime maškar boravija u hotelu «Firule», mora san zamolit ostale paparazze ča su slikavali za njiove slike. Odziv je bija iznad svi očekivanja. Ča ne znači da morete poslat još koju sliku, oli napisanu batudu, ako jemate pripremljeno. moj email je: filko.garbin@gmail.com, priman sve slike i tekstove, sve gre na konzilij/uredništvo koje će se ove godine, jema bit, sastat kod Toje doma, jerbo je još na bolovanju.
Lako van je bilo pri, kad je samo nas par slikavalo, a sad deboto i moja Vinkica jema mobitel sa kojin more uvatit koju situaciju, da ne spominjen one makinje koji se, nazad par godin, ne bi i koji profesionalni fotograf posramija. Osin moga kuma @pechine, koji se i dandanas kune u oni svoj aparat sa običnin filmon. I onda neče nikome da pokaže slike kad is i napravi.
Jesan lani napokon pristavija moj libar, koji je kompilacija svega ča san u deboto desetak godin pisa po blogu, ali da mi je kako uspit @pechinu nagovorit da učine svoju izložbu fotografije, e to bi tek bija događaj ne samo za nacionalne TV kuće, vengo i za CNN! thumbup
Po običaju san ja ovod nadrobija svakakovi lipih želja ... a posal ne smi patit! cerek
Dunkve, najprin smo dobro proučili lanjsko izdanje «Mašogadura» ...

 photo JURICAPAVICIC_zps7fc8118c.jpg

... a onda smo se bacili na posal, raspravili smo se lipo ka ljudi. Srića da nije ko sluša ispod ponistre, zvalo bi odma USKOK-a, B.a.b.e, Helsinki Watch i Plavi telefon ...

 photo RASPRAVA_zpse93cbf98.jpg

Ko in je kriv, kad mi tako funkcioniramo, i nikako drugovačije. Nakon verbalnoga i psihičkoga čašćenja, obrisali smo paučinu & prašinu sa tastature ...

 photo PAUCINA_zps96a45e77.jpg

... i podilili zaduženja ča ko jema radit. Kad smo završili službeni dil posla, bija je red da malo i zapivamo ....

 photo KLAPAScaronLAPA_zps6cb0400c.jpg

Razišli smo se u miru, neko malo manje, neko malo više štuf ...

 photo SCHUMACHERIMARIO_zps8b917caa.jpg

Najbitnije je da se Schumacher probudija iz kome i da se pomalo oporavlja.
Uskoro sa novin vjestima ... a do onda:
Zdravi i veseli bili! mah mah mah

04.02.2014. u 09:31 • 0 KomentaraPrint#

nedjelja, 11.08.2013.

Litnja fešta o'maškar AD MMXIII

Posli onega praznika za nepce, ovogodišnjega Mašošefa, nikako mi se nije dalo odit na drugu feštu, ali ča ću. mora san, obeća san mojoj ekipi iz KPU Kampanel da ću doć napisat dva slova i potegnit dvi slike. Uvik, bar u zadnje vrime, dođen na feštu još za dana, da snimin zadnje pripreme ... ovi put san malo okasnija, jema san zato više nego oprtavdane razloge, rekla bi mi Marijana da radin PR za promociju.
Kad san se pojavija, vidilo se dobro da nas je sve, od Buiša pa dalje, bilo dobro ispripadalo sa vrimenskon prognozon. Lako je sad zvizdit, ali meni je bilo ništo ka sumjivo čin su se sa vrimenskon prognozon, osin dokazani igrači ka Vakula i ekipa, počeli bavit i novinari i „novinari“ opće prakse, koji od računa za kapučino u najskupjemu kafiću na Stradunu začas napravidu mirakul, a di neće od malo nevere. Čak su mi, kad san radija blokove za spizu, piće i lutriju, rekli da ne mećen datum nego samo godinu, ka ono ako budedu morali odgodit.
Dunkve, prvi mačići se učidu plivat, ka i prvi utiscu, koji nisu baš nagovještavali dupke punu Rivu ...

 photo slike008_zps5558c6d5.jpg

... ali ekipa iz Maškar se nije dala smest. Uz standardnu ekipu sa druge strane šanka ...

 photo slike005_zps50010691.jpg

 photo slike009_zps7562f151.jpg

... i sa vrljačon u ruci, pogotovo se to odnosi na izgubljenoga sina Pelu ...

 photo slike010_zps425e3c5f.jpg

... rezultat nije moga izostat:

 photo slike013_zpsf6d7479e.jpg

 photo slike012_zps12417bdf.jpg

 photo slike011_zpsb5820d26.jpg

... čak su i čevapi, koje su držali u teči osvojenoj na ovogodišnjemu Mašošefu jemali malo lipši okus. Svit se pomalo počeja skupljat, kad su vidili da neće buit ni krupe ni pijavic ...

 photo slike025_zps7f0c22d6.jpg

 photo slike018_zps80271f91.jpg

Najprin su „stradale“ srdele i tunjevina. Buiš još buba glavon kako nisu osigurali bar srdel duplo više, ali svega je nestalo ... na kraju je, bar oko deset i po, bilo zar još samo rižota ostalo, a čule su se neke glasine da će se kuvat druga tura ...

 photo slike031_zps8ef9f117.jpg

Nisan osta da glasine provjerin, jerbo san već bija na po koplja. A glede slikavanja, deboto da nisan triba njanci dolazit, puna Riva Lupina i paparazzi ...

 photo slike006_zps35ce71d4.jpg

 photo slike007_zpsc37d164a.jpg

... nisi moga uteč sad kad bi tija. Jedino, ništo mi je ka falilo. Reka je jedan čovik da nigdi nima veterani ... kako nima, evo is trojica, i to iz više sportova ...

 photo slike026_zps77dcc2e0.jpg

A bome nije falilo ni živopisni likova iz dijaspore ...

 photo slike016_zps384a9bd6.jpg

Za glazbeni program se pobrigala ekipa iz „Ritma kiše“ ...

 photo slike022_zps4efdd2ce.jpg

... koji su svirali pisme ča i volidu slušat i dide i unuci ...

 photo slike021_zps399f49bc.jpg

Sve u svemu bila je to još jedna lipa, ugodna litnja fešta ... dovidova do iduće. Zdravi i veseli bili! mah mah mah

11.08.2013. u 00:58 • 2 KomentaraPrint#

ponedjeljak, 28.01.2013.

Zagrijavanje!

Pali motore ... pala je naredba omar poslin Nove godine, ča san već uredno nota ovod užežin onega jedinoga sveca ča jema šest jaj. Materijal je skupljen, fala na pitanju, jemali smo vrimena, dvi godine, ej!
Uvatija san se radit novi broj Mašogadura ...

 photo logo_12_zpsa36f62a5.jpg

... ma me je sve straj koliko će na kraju izać, jerbo jema materijala i za one ča samo gledadu slike, i za one ča i ne zaboli glava kad pročitadu više od tri rečenice.
Polako se diže radna temperatura, a glede zagrijavanja i priprema za dvanajst dan, organiziramo na Sokolani „Noć pod maskan“ ...

 photo PlakatSokolana_zps99ede84a.jpg

... da se dostojno spremimo za samu povorku i masklenbal. Dokle ne izajdedu na sridu nove maske i nove monade ča biste tili da is niko nije vidija ... evo van podsjetnik na neke prošle slike ... ka ča je ova galija koju smo na vesla vozili deboto davne dviijadeičetvrte godine ...

 photo berekesos_zps0005c511.jpg

... ili ove prikrasna grupna slika dičjega vinčanja u Jabukovcu, iz filma „Vlak u snigu“ ...

 photo svatovivlakusnigu_zps7019bdbc.jpg

Nisu ni ove klaunice novijega datuma za bacit ...

 photo klaunice_zps73031022.jpg

Nima straja, nismo oskudjevali tehničkin mogućnostima ni u ona doba kad nije svak jema ....

 photo SNIMATELJ_zps9374099c.jpg

... atroke sad, kad svaka mona misli da je Francis Ford Copolla samo zato ča mu mobitel more snimit dva minuta videja. Pomalo mi već para izalazi na uši i miš mi biži po stolu, ali ću dat sve od sebe, ka i ostatak ekipe, da posal završimo na vrime i opće zadovoljstvo svekolikoga pučanstva. Stanen, uvatin zraka, čoknen na brzinu kocku čikolate, srknen gucalj kafe iz ovega bronzina ča mi je žena skuvala ... i nastavin dalje thumbup
Zdravi i veseli bili! mah mah mah

28.01.2013. u 23:12 • 0 KomentaraPrint#

petak, 04.01.2013.

Još 36 dan!

Daj Bože zdravlja, pa bi za još toliko dan tribalo opet, tradicionalno, užgat Krnju ... onega ča je za sve kriv. Kad se vratin malo unazad, koliko li se samo živopisni likov za Njega izminilo u ovi trinajst godin našega reinkarniranoga Krnjevala ... neki i po više puti cerek
Ma isto, jema bit da je najviše bumbiza (puknuo, za sjevernjake) oni zadnji, ča smo ga užgali 2011. godine.
O tome san već detaljno pisa, i o izboru lika & djela Dotičnoga, a i o medijskome praćenju spomenutoga događanja.
Prikomjerno granatiranje koje su mećali na dušu Gotovini u ona doba je golo govance za ono ča su sve nasljednici „one male iz Pojate na Mosoru“ bili o nan nadrobili. Srića i Bog da još u ono doba nije vridija ovi novi zakon o verbalnome deliktu thumbup jerbo bi nas sve sa dva autobusa poslalo na Bilice. Ako još jema mista. A govoridu, bar oni ča su jemali prilike okusit, da je Remetinec „Hilton“ prema Bilican.
Nego, ostaviću po strani crne misli. Trenutno san, gle čuda puknucu opet na bolovanju. Davni dan su mi rekli da ča više vrime prolazi da više sličin na mater nego na pokojnoga oca. Jerbo san sve više po likarima. Ma me ni to neće omest u mome dilu posla, koordinirat oni naš tradicionalni „brainstorming“, da ne rečen karbu, beštimje i prijateljska uvjeravanja ča gre a ča ne gre „unutra“ ... onda slidi još par dan manovaljenja kojega mogu sam, na miru, učinit ... i moj je dil posla gotov.
Bar do povorke. A ove godine bi se moga i umaškarat, pregovaran za pristupit u dvi slike. Biće nešto, sigurno ... a ako ne ništa, opet malo piturat side vlasi, nabacit koju štracu na sebe, napunit sve baterije i fotoaparat u ruke.
Lani smo pauzirali ... nije bilo jednoglasno, ka ni u Haagu, ali većina je odlučila. Godinu dan smo odmorili, stali na balun, sićali se oni ča i više nima, a dubokoga su traga ostavili u ovi trinajst godin ... Želka, Mehe, Pagara, Čonča ... Osin ovi nabrojeni, puno je još svita partilo ... partija je i moj pape, Dine Garbin, ča me je i zarazija viruson Mašograda, ali o tome ćete pročitat na jedno drugo misto thumbup

Photobucket

Selo naše malo, od milja Mašograd, živilo je svojin životon i dalje. Činile su se monade, snig smo svi dobro zapametili

Photobucket

... činili su se prosvjedi, teške su riči padale ... kako uživo,

Photobucket

... tako i na sucurac.info, jedinome mediju za kojega moremo reč da je sučuraški. Rekli bi zli jezici ironično „nekad bija“ ... ali još u svići jema uja, još se trza.

Photobucket

Kažu dobro upućeni da jema materijala za dvobroj, a dežurne Žalosne Sove da će se jedva skupit pinez i za obični broj štampat. Čeka nas naporno odvajanje „žita“ od „kukolja“, „more“ od „nemore“ a glede situacije, sastanak će se održat kod mene ...
Danas su Predsjednik i Tajnik KPU „Kampanel“ bili u mene na prvi dogovor. I ča misllite ča mi je Buiš prvo reka: Nemoj sad opet napisat da si u udrugi „Poklade“ ka ča si reka Tariku. Ka zaboraviće mi cerek ... a to san ionako meknija odma pri vrju moga uvodnika.
Ove godine ćemo angažirat i neke nove ljude ... neće in bit laka, svi će i uspoređivat sa onima prije, ali biologija je neumolljiva ...
Nisan zna ča bi meknija, koju od stari slik, ali evo, napokon, KOMPLETNA kolekcija „Mašogaduri“ za download zainteresiranima, jer neki, unatoč obećanjima tipa „samo ča nisan“, ni nakon par godin nisu stavili sve „Mašogadure“ dostupne za download, složeno po godištima.

2001 * 2002 * 2003 * 2004 * 2005 * 2006 * 2007 * 2008 * 2009 * 2010 * 2011

Eto, toliko za ovi put, ne smin još puno toga reč, a ni napisat. Prelazni rok je tek počeja party pa da ne zajebemo još koji od transferi ča su u toku.
A svima onima ča su mislilli, ma ča mislili, tvrdili da su čuli iz pouzdani izvori, da će se, radi lanjski događaji, Mašogradske Maškare udunit ka šunferina, moremo samo poručit ...

Photobucket

... ili onako lipo, pjesnički, moremo poručit da in se seremo na izvor informacija. Dođite, dajte ruke, koju dobru ideju, a ako dojdete sa pinezima isfalit ćemo vas i u Mašogaduru i usmeno, na sva justa. RECESIJA je besida koja se više izlizala od duperanja (upotrebe, za sjevernjake) ... sve znamo, dođite i pridonesite prema svojin mogućnostima, da se svi skupa bar nakratko opustimo i zabavimo, i naravno, užgemo onega koji je za sve kriv.
Zdravi i veseli bili! mah mah mah

04.01.2013. u 23:41 • 2 KomentaraPrint#

utorak, 18.12.2012.

Domjenčić

Da ne bi ko mislija da sad izmišljan nova imena ... sve u duhu novoga vrimena. Samo pokušavan nać prikladni naziv za naše malo, krizno, okupljanje na kraj godine, da prigrizemo čako, da se nađemo, da proćakulamo, da malo ogovaramo one koji nisu tili ili nisu mogli doć, i da se sitimo oni ča i nima više među nan.

Photobucket

Photobucket

Malo ćemo sest, počet se pripremat za nadolazeće maškare, prve nakon lanjske pauze. Nikad ranije, koliko me pamćenje služi. Deveti od kurbe vejače, jedinoga ženskoga miseca. Jemali smo, Bogu fala, vrimena skupit materijala. Čak su neki zli jezici bacili pecetu da bi Mašogadur ove godine moga bit dvobroj!
Ne bojte se, sve se biluži, sve se piše i pamti. Koristimo sve blagodati moderne tehnologije, društveni mriža i činjenice da danas svaka mona jema pametnicu od mobitela, fejs profil i svi smo deboto intravenozno prištekani na internet. Ovo zadnje, naravno, govorin u svoje ime, a mislin da nisan jedini ;)
Zato dođite u sridu, 19. dvanaestoga (prosinac, za sjevernjake) u sedan uri. Uvečer, da smirin ranoranioce. A znate di tribate doć: u prostorije od Maškar, Mašograd (Kaštel Sućurac, za sjevernjake) stara škola, ili za nostalgičare, prostorije od pokojne sučuraške glazbe. Pozvane su sve bivše i sadašnje maškare, ka i one koje su još u ormaru pa i je straj izać vanka.

Photobucket

Photobucket
Mi smo odavno pobjedili anorexiu ...

Gladni nećete ostat, biće čako za meknit pod zub, ne bojte se ... a pogotovo nećete ostat žedni ....

Photobucket

Zato dođite, ponavljan, u prostorije KPU Kampanel, u Kaštel Sućurcu, 19. 12. 2012. godine u 19 sati na tradicionalni domjenak povodom ispraćaja Stare godine i prvi dogovor za krnjevalska događanja koja će kulminirat maškaranon povorkon 9. 2. 2013.
Zdravi i veseli bili!

18.12.2012. u 10:05 • 0 KomentaraPrint#

ponedjeljak, 20.02.2012.

Adio naši ...

Subota, zadnja užežin pokladnoga utorka. Zadnja užežin korizme. Sve san i zapantija. Pogotovo onu 2003. kad su izašle sve vatrogasne aute iz garaže u dvor i upalili rotirke i sirene. Dunkve, tako su me moji vatrogasci dočekali kad san se vratija iz crikve, kad san potpisa i kad san Zakonitoj reka „DA“.
Subota, zadnja pri pokladnoga utorka, kad je u Mašogradu uvik bilo posebno vrime, posebno raspoloženje, jer počinje Povorka, koja kreće u tri ure pozapodne, sa pokojne Pilane. Pozivali bi danima svekoliko pučanstvo Kaštel Sućurca, poznatijega ka Mašograd, da dođedu vidit ča smo in mi umaškarani spremili, da dojdedu povirit maškaranu povorku, da vazmedu Mašogadur i vididu kome se „omaklo“ pa je završija unutra.
Svake godine se živilo i spremalo za tu subotu. Samo, ovi put je bilo drugovačije ...
Zanamisto pisme, veselja, trumbetavanja i di koje beštimje ... ovi put su se u tri ure pozapodne čula samo crkovna zvona. Ona gori, u Gospe na Hladi. Di će, pri oli posli, završit svaki od nas ... niko neće za sime ostat. Samo neka gre po redu, u svoje vrime ...
Puno je smrti bilo u ovu godinu dan. Priko više toga, mašo ... i to one priko reda, vanka mire ... svaka smrt nas je dosad ranila, ali ova zadnja, u prvi misec, kad je partija naš Dida, to nas je dotuklo. Ispratili smo ga, kako Bog zapovida, i poslin par dan, našli se, ladni glav, i poslin dugoga sastančenja, odlučili da ćemo ove godine "apstinirat", naše maškare i sva gostovanja. A zanamisto tega, u dogovoru sa don Emanuelon, učinit misu u Gospe na Hladi.
Dunkve, misa je bila i unazad par godin ... ali ova je bila posebna ... za Didu i sve one naše stare ča su nas napustili, i po redu i priko reda ... i u zadnji godinu dan i sve godine prije.
Pomolili smo se, zapalili sviću na Glavnomen križu ... i onda se u tišini skalali doli, mi rečemo u Selo, u prostorije od Maškar, progovorit koju besidu i popit jednu za pokoj duši, onima ča i više nima ...



Počivali u miru!
Prineseno sa bloga bloga Umorno_Oko

20.02.2012. u 11:49 • 0 KomentaraPrint#

srijeda, 09.03.2011.

Donjokaštelanske maškare MMXI.

Po dobro utabanin putima, obaša san lagano cilu trasu pri nego san odabra misto di ću slikavat.
Usput mi priđe jedna smišno umaškarana krotiteljica lavova, koja je prodavala Mašogadur. Kupin, platin, i pitan je oće li kupit Mašogadur? Ne, fala, vidiću sutra u novine

Photobucket

Uspija san naše iz „Kampanela“ uvatit na jarpi dokle su čekali Njegovo Veličanstvo ...

Photobucket

Naši su, ka i obično, jemali zapaženi nastup, od barjaktara ...

Photobucket

... priko našega KRALJA (Nije Aleksandar, nije ...) koji je tako uzbudija novinarske duhove u „Male iz Mosorke Pojate“. Ovi put ga nisu čuvali gardisti, vengo cila novinarska regimenta ...

Photobucket

Photobucket

... a sužnji su ovi put bili iz KPU „Kampanel“ glede izbora Onega Koji Je Za sve Kriv u ovu subotu.

Photobucket

Ne triba ni napominjat da je Žuti sa svojin nastupon izazva nepodiljene simpatije svekolikoga pučanstva na zapadu našega grada ...



... a i Vale sa svojin Trogiranima mi je falija na našemu krnjevalu, jer su jemali u isti dan. Ovod su nastupili sa svojon flower-power točkon i, naravno, oduševili sve nazočne ...



Ali, počmimo mi pomalo, od početka ... još je sunce bilo visoko na nebu, kad su se činile zadnje pripreme, šminka, make up i ostale stvari ... ne moreš svakakovi izać prid svit ...

Photobucket

... a u ovome ludome gradu se drži do maškarane tradicije, pa se generacije zajedno maškarajedu ...

Photobucket

ne moreš se okrenit nigdi, a da ne naletiš na koga iz Mašograda, bar da je jedan od roditelji rođen tamo. A još ako mu je ujac donedavno aktivno učestvova u maškaran ...

Photobucket

Donjokaštelanski krnjeval je odavno prirasta Kaštila, pa mu dolazu u goste maškarane grupe i iz Rijeke, među ostalima ...

Photobucket

Photobucket

Za razliku od nas, njiova mjesna glazba nije blagopočivajuća, vengo je još itekako živahna ...

Photobucket

... a i mažoretkinje su na domaćemu terenu, pa su mogle izvest dvi postave, one ča su nastupale kod nas, i još jednu ...

Photobucket

Nakon mažoretkinj je prikazan i dičji Krnje, Kalimero, kojega su spremili za milenijssku sliju barba Šime Strikomana...

Photobucket

Donja su sela još uvik malo, kako bi reka, ruralnije nastrojena, tako da kod nji nije bilo problem nać koji kar (zaprežno vozilo, za sjevernjake), dobro očuvan, sa ful opremon i u voznome stanju, je da se ovi konj, bidan, malo i namučija ...

Photobucket

... ali zato je ovima slidećima bilo malo lakše ...

Photobucket

... jerbo je u toj kočiji bija Poteštat, a i bila su upregnuta dva konja. U slidećoj kočiji je bija i Župan ...

Photobucket

... samo mojoj sidoj glavici nije nikako bilo jasno zašto je na glavi jema kapu od Kalimera.
Na kraju kolone kočija je bila mala krajica dičjega krnjevala ...

Photobucket

Nakon toga su nastupili Strikan i Netijak. Svi smo to svatili ka dobru masku, i ni po mise da je ostalo na tome ...

Photobucket

... da nisu oni prionili sanaciji javno prometne površine, nakon prolaska ekoloških prometala na četveronožni pogon. Drugin ričima ... došlo je do sranja ...

Photobucket

... a oni su pokazali da in priloženi alat i oprema nisu bella figura, nego da znadu posal. Reka san već da su Donja Sela malo više okrenuta zemlji, naročito preradi grožđa. Na kraju, Crljenak nije pronađen na padinama iskopa od Kave ...

Photobucket

Ni ovi krnjeval nije moga proć bez našega Ive, kojega sad svi sad kendaju, i odriču ga se, a do jučer su mu virili iz analnoga otvora tek toliko da moredu disat. Zato se narod organizira pa priko njegovoga brata skuplja pomoć ...

Photobucket

Isto tako ni naše vrhovno zakonodavno tilo, kojega je još Pokojni Ćaća smatra suvišnin, nije moglo proć lišo ... Ko je spomenija Muppet Show?

Photobucket

Severina, dakako, nije prošla neokrznuta, ka ni njezin novi "jahač" ...

Photobucket

Photobucket

Bilo je, vjerovali ili ne, i totalno apolitičnih maski, u koje je bilo uloženo mnogo truda, sa sluhom za tradiciju ...

Photobucket

Na užas komunalaca, i slijedećih točaka, doletija je pravi četveropreg. Neće se naša Jaca, je li, vozit u običnome težačkome karu ...

Photobucket

A kad smo već kod premijerke sa sivon-metalik frizuron, pozdravjaju je i ove dvi ovčice, dvonožna i četveronožna ...

Photobucket

Podulju listu uvaženi gostiju su uvećali i iz Županijskoga krnjevala u Glavogradu, ali kako je ponestalo kočija, morali su proć nanoge ...

Photobucket

... a donili su sa sebon i Maminja & Mlatka, dvi praživotinje koje žive u simbiozi, a dokle će, ne znamo!

Photobucket

Zadrani su nan dovukli i Jovanku, koju je pratija počasni vod Titove mornarice ...

Photobucket

Zvizde, ipak, dolazidu na kraju, strašnja Jaca Antonjeta, koja giljotinira svoje neprijatelje i narodu odgovara da ako nima kruha, neka jede kolače.

Photobucket

Pratili su je do zuba naoružani specijalci, koji su nan pomogli da razbijemo još jednu predrasudu, ili običan mit ...

Photobucket

... Žuja ipak NIJE ZAKON. Ovome predstavniku zakona, vidljivo je iz priloženog, više paše Karlovačko.
Krnje je, ka i svake godine, uz prigodnu osudu (izašla je u novome Maškaduru) spaljen u Staroseljskome portu, na veselje nazočnog pučanstva, a krnjevalske svečanosti su nastavljene na maskenbalu u hotelu Resnik, a ne kako su (pogrešno) prepisali u "Slobodnoj". To bi bilo NAPOKON sve za ovu godinu i maškare. Zdravi i veseli bili!

09.03.2011. u 02:13 • 3 KomentaraPrint#

subota, 05.03.2011.

Partija je ...

Ne, dežurni zlobnici i šporkačuni, nema van ovo veze sa politikon, ni sa partijon, ni sa strankon, partija je, užgali smo ga ... našega Krnju. Onega, ča je svake blažene godine za sve kriv. I kako van to obično bude, amo govorit ka u balunu, lakše je udunit trenera vengo minjat cilu momčad. A to ča tri dila momčadi ne zna dva na nogu, ča i više od polak ne zna štopat balun vengo se odbije od njega ka od stupa od struje, to nime veze. Molajmo mi balun, vratićemo mu se kasnije.
Ka i svake godine, sa pokojne pilane, u zanju subotu pri pokladnoga utorka krenila je maškarana povorka kroz naše malo misto. Ove godine smo svi siumjičavo gledai u nebo i koko je molija, a koko petava roge, na prve kapi kiše, već prema sklonostima.
Ka ča i priliči, nakon službenoga gajncig novoga vatrogasnoga auta sa plavo-plavo na krovu, odija je naš barrjaktar Bare Coto Kengi. Otkako je Panca iša u ekonomsko/emocionalnu emigraciju u Purger Vakuf, čvrsto je prigrabija barjak i ne da ga nikome. Njanci sestri Majdi.

Photobucket

Potla njin su odile naše male smišnice, kaštelanske mažoretkinje, koje su i po svitu pronile slavu našega grada, pa in je ova mala šetnja bila šala mala.

Photobucket

Kakva je to pogrebna povorka bez glazbe. A kako je naša glazba blagopočivajuća u Gospodinu već duže vrime, morali smo pozvat u pomoć one sa Bliskoga Zapada. Prvi i najbliži, i uvik mna opomoći, evo već par godin, su Latena glazba „Biranj“ iz Lušića.

Photobucket

Ova tri ovod kažu da oni nisu nikakva slika, da su oni na crno u koloni, da moredu lakše proć ...

Photobucket

A nakon ova tri inkognito umaškarana počinje zapravo kolona. Naši najmlaji i najvirniji učesnici, dica iz dičji vrtići Neven i Maginja, skupa sa svojin vridnin tetan, koji su već jemali vatreno krštenje kad i je barba Šime Strikoman slikava ka velikoga Kalimera u svojoj 226. po redu milenijskoj fotografiji ...

Photobucket

Photobucket

... za kojima su nastupala malo starija dičurlija. Indijanke i pokoji Indijanac, vjerojatno zalutali sa demonstracija po Markovome trgu,

Photobucket

... bilo je tu dice refužo, koji se nisu ukklapali u nijednu točku ali su i roditelji, običaja radi, malo umaškarali i prošetali povorkon.
Mora se spomenit i teta učeiteljica Alemka koja svvake godine jema posebno spremljenu toičku sa svojin razredon, prije par godin su bili razdred iz „Vlaka u snigu“, a ove godine su bili STAĐUNI

Photobucket

Kako su pasali „Stađuni“ (godišnja doba, za sjevernjake) ... onda su polako odrasli preuzeli igru. Lanjski obožavatelj našega odbjegloga premijera, naš dragi @pečina, ove godine je samo bogatu novonastalu situaciju pritvorija u novu sliku, tako da tot jemamo maštil sa tri uva, dasku, sapun i bruškin ...

Photobucket

Photobucket

.... a ove godine mu se pridružija i ostatak obitelji, tako da tu imamo tatinu ćer Petru sa malin iznoson na knjižici, ženicu dragu koja sa pinelićen kopa po Lipoj Našoj tražeć spomenike i umjetničke predmete. Ko je spomnija slike? Bilo je i toga, one ča bio se posudile iz muzeja, naravno, i vratile isto tako naravno ...
Nakon praonice, u ime novokomponirane političke korektnosti, spomenilo se i nastupajuću Gay Paradu, uskoro u Dioklecijanovoj vikendici,

Photobucket

Nakratko su nebo nad Mašofgradon proparali kambelovski mlazni motori ...

Photobucket

... kojima je priko joysticka (palica uživalica, za sjevernjake) upravljalo jedno poznato lice, nikako se ne mogu sitit na koga me podsjeća

Photobucket

Kad je završija aeromiting, ponosno je stupala sućuračka familija Simpson, sa mamon Marge na čelu, zajedno sa svin poznatin likovima iz serije, okupljenima oko točionice piva „Duff“ ...

Photobucket

Photobucket

Nakon kombija punog veseljaka, koji sasvin slučajno nose naziv Trafika-cvjećarna „Amalija“
Taman smo se odmorili od veseljaka iz amalije, onda nastrefi novi tulum, kako Petri Sanader tate nije bilo doma, naravno da je morala organizirat tulum ...

Photobucket

... šta je sa tugom u očima iz slidećega kamiona, kroz rešetke Salcburškoga prežuna, promatra njezin tata ...

Photobucket

Posli svega nabrojanoga, ipak je nastupila, po mome kromnome mišljenju, zvizda krnjevalske povorke, slika „rvatska čiča u rvatska justa“ ... su naš Žuti ka beba i Lela ka njegova dojilja, zorno prikazali kako nan je u čići još malo mlika ostalo, a ča će posli bit ... ko zna!

Photobucket

Posli Žutoga nije bilo lako nastupit, ali su se, po prvi put u našoj povorci okuražili Omiški gusari, u živopisnin monturan, i pucanjen iz pravi kubura, obznanili „urbi et orbi“ svoju nazočnost.

Photobucket

Photobucket

Kakvi bi to krnjeval bija brez da se spomene naša Severina, i njezin najnoviji 'ebacco, „Srpski kralj bakra“, a Severinu je ovi put odlično utjelovila zgodna Mihaela ...

Photobucket

Ritko koji događaj ove godine u selu je promaka, pa su se neki, kroz sliku „Dosje X“, spomenili čudnih strujniih krugova nakon utakmice HNK Jadran i NK Neretvanac, kad su dva momka skoro zaglavila od strujnoga udara, da bi se problem ipak kasnije riješija, na ovaj ili onaj način, da se to više nikad ne ponovi ...

Photobucket

Photobucket

Velečasni i njegov remeta su ovi put i zapravo malo pokisli, a ne samo teoretski, pa se snalazija svak kako je zna i umija.

Photobucket

Stvari već postaju ozbiljne, sprema nan se premijerka Jaca Antoaneta u naše kraje, ali kako je smrknutoga izgleda, mislin da se neće bavit sa kumpir-salaton.

Photobucket

Osigurana sa kompletnin kordonon pulicijoti, a isprid sebe su mekli ka živi štit donjokaštelansku postavu Kalimeri.
Lovci su isto dramatično odradili ovogodišnji krnjeval. Sve je bilo u redu do prid kraj. Lovačka kućica napravljena od prirodni materijali, u suradnji sa prirodon ...

Photobucket

... dokle iz nje nisu pobigli tukci i fazani pripremljeni za odstrel i kasniju lovačku gozbu uz pričanje poznati istiniti lovački priči i bajki ...

Photobucket

Malo je reč da je zapravo letilo perje po rivi, a i dvi bidne kokoše, žive i na kraju zdrave, koje su dica bacali u zrak ne bi li poletile. Ako su i nosile jaja, do daljnjega, radi pretrprljenoga stresa, sigurno neće.
Ipak se sve dobro završilo, jer više nikome nije bilo do zajebancije. Nastupali su, uz poznate zvukove Dragačevskih trubača, glavne zvizde filma „Ko nas bre zavadi“ ....

Photobucket

Nakon kojih su išli hrvatski sužnji iz srpski prežuni ...

Photobucket

Na kraju cile kolone, kako i priliči, praćen višegodišnjon vjernon pratnjon ...

Photobucket

... i uz taktove Barinoga hita „Gdje je nestao čovjek“ dolazi Oni Ča JE Za Sve Kriv...

Photobucket

Kako nas je, ča ste i u Mašogaduru mogli vidit, Joško Vukšić škarta sa konferanson za ovu godinu, a pošto je naš Didović trenutno vanka RH (Nije u Salzburgu, fala na pitanju) ... morali smo se snač, i pokazat cilome svitu da i mi jemamo ne jednu vengo dvi za vodit konferansu.
Peškaruša i getarka, pa ajde ti dođi do riči kraj nji dvi ...

Photobucket

Krnje je namišćen, naša mlaje snage su mu sa balkonića pročitale osudu ...

Photobucket

.... i ostalo je samo da, nakon primitka zadnje pomasti ...

Photobucket

... i naravno, uz budno oko EU promatrači ...

Photobucket

... obavimo i tu formalnost. U nedostatku Šikala, koji je bija opravdano odsutan, dužnost potpaljivača je ove godine pripala drugome Jošku iz vatrogasac ...

Photobucket

Gorićeš u paklu, jer si kriv za sve nevoje ča su se dogodile u zadnji godinu dan ..

Photobucket

I to bi, do maskenbala, bilo sve ...
Zamalo ... skoro san zaboravija ... bilo je, ka i prošli godin, posli spaljivanja Krnje, na rivi ... par stotin porcij fažola, kojega su dilile naše vridne članice, žene, majke, kraljice,

Photobucket

Fažol ka fažol, čisto onako, da zapušu novi vitrovi. naravno, ukusan ka i uvik, na zadovoljstvo BAŠ SVIH nazočnih ...

Photobucket

Zdravi i veseli bili!

05.03.2011. u 18:31 • 0 KomentaraPrint#

četvrtak, 03.03.2011.

Kad? Kako? Koliko? Di? Zašto?

Odgovore na ova pitanja, a i na još mali milijun drugi, daće van novi ODŠTAMPANI broj Mašogadura, jedanajsti po redu, godišnjega glasila naše krnjevalske pučke udruge «Kampanel».
Zašto će i ove godine opalit top na Glavici?
Ča će se ove godine najviše nosit na maskenbalu?
Kako se obuć u povorku a da ne parite štraca?
Kako se izvuć iz krize?
Kako od kune napravit kaput?
Kako zaradit penziju sa dva i po dana staža?
Kako dobit diplomu ako se uči na šanku?
Kako priživit u ovome ludome selu a ne ispalit na živce?
Kako odit isprid vrimena i napravit sve ono ča se tribalo napravit dej after jesterdej?
Vridno smo radili, noćas i danas smo ga mekli u one kesice, da se ne škorca ....

Photobucket

... neki više nisu mogli držat okice otvorene pa su se ranije uputili nanit ...

Photobucket

... sve u svemu, meni se pari da je lipo ispa ... ali moje mišljenje nije bitno. Nadan se da će van se, dragi naši štioci, svidit ovo ča smo godinu dan skupljali, pisali, slikavali, špijavali, prepisivali, malo ukrasili, ulipšali i mekli na oni glavni CD. Pa smo to lipo odnili u našega Ivice Antunovića, koji je, ka i svake godine, vrhunski to odradija u štampadurskome dilu i konačni proizvod morete vidit u subotu, užežin krnjevalske povrke. Vidit, a i kupit, dapače, čak štoviše ... Dvadeset kun, u ova krizna vrimena, i je i nije puno. Ali eto, ka ča smo već napisali, dvi pive manje, i jemate u čemu guštat bar niko vrime, dokle sve detaljno ne privižitate u potrazi jesu li vas oni k***ini sinovi mekli u Mašogadur oli nisu.
Nakon potrage, kad malo dojdete sebi, morete na miru prigledat CD na kojemu su video snimka i slike od lanjske povorke, ka i lanjski «Mašogadur» ako ga, puke li slučajnosti, lani niste uspili nabavit, a tako ste se trudili. Pa je red da vaš trud i nagradimo.
A mekli smo, da prostite, i reprint Mašovnice, potvrde o Sućuračkome državljanstvu ...
I ča bi van još moga reč, osin zamolit da kupite ovo ča smo učinili i tako date najmjerodavniji sud o kvaliteti našega obavljenoga posla.
A za kraj ... ča bi još pametno moga reč za kraj.
U ova čupava vrimena je bolje mučat, bar neko more mislit da si pametan. Jer, ako progovoriš, otklonija si svaku sumnju.
Slika uvik govori više od besid, pogotovo ako je autor naš mašogradski meštar o karikature, Nikola Listeš. Bija san počašćen dobit od njega ovu novogodišnju čestitku, a sad bi je podilija sa van jer je Nikola, ka i uvik, čovik isprid vrimena.

Photobucket

Zdravi i veseli bili! party thumbup
I Mašogadur pročitali ...

03.03.2011. u 14:39 • 0 KomentaraPrint#

<< Arhiva >>

Creative Commons License
Ovaj blog je ustupljen pod Creative Commons licencom Imenovanje-Dijeli pod istim uvjetima.

< veljača, 2015  
P U S Č P S N
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28  

Veljača 2015 (1)
Veljača 2014 (1)
Kolovoz 2013 (1)
Siječanj 2013 (2)
Prosinac 2012 (1)
Veljača 2012 (1)
Ožujak 2011 (4)
Veljača 2011 (1)
Listopad 2010 (1)
Srpanj 2010 (1)
Svibanj 2010 (1)
Travanj 2010 (1)
Veljača 2010 (3)
Siječanj 2010 (1)

Dnevnik.hr
Gol.hr
Zadovoljna.hr
OYO.hr
NovaTV.hr
DomaTV.hr
Mojamini.tv

Opis bloga

Avizjuni, petecjuni, tuzbe, molbe, zalbe, akti, spisi i ko kome, kad, kako i sa kin, priko cile godine, u naše malo misto - Mašograd

Linkovi

Dnevnik.hr
Video news portal Nove TV

Blog.hr
Blog servis

Sućurački Portal
Umorno Oko
Kaštelanska panorama

Emajlirajte ...
ili ako van ne radi automatski ...
ručno upišite masogadur@gmail.com

web counter html code

myspace web counter