Jučer smo imali sastanak "na Ibleru".
Vesna , Ranko i ja došli smo avionom oko dvi ure poslin podne u Zagreb a već u devet uri navečer krenija sam nazad autom za Split- Vozija je Arsen....a još su s nama putovali Andrea i Damir. Sve bi bilo ka bog da nas negdi oko Prokljana nije pristiga presretač i upalija ona plava svitla i natpis: "Slijedi me" - šta je, radi pinku brže vožnje, bidnega Arsena koštalo 5oo kun.
Jutros gren u "More" kupit kruva i nešto spize....kad me intra jedan susid i udri kukat kako ne more vezat kraj sa krajem, da kako je sve oko kuća zapušteno, da nima državnega vrtića za dicu, da je osnovna škola sva otišla kvraguc i da dica o straja ne mogu ulist više u nju, kako još ničega, usprkos obećanjima, nima a posebno gimnastiške dvorane za pučkoškolce....da ča se more uradit i sve tako u beskraj.
Lipo san mu reka da zovne na mobitel Jadranku jerbo ona tvrdi kako nan teče med i mliko, da se živi ležerno i da kako je svaki građanin more slobodno zvat kad ga mu padne na pamet.
To Vi mene ka voltajete...je li šjor Marine ?!
Ma voltaje ona sviju nas lipi moj čoviće...Aj, čut ćemo se još. Žurin kupit marendu !
Zdravi !
Adijo !
Kod Vojka u butigi jutarnja gužva a neki već sididu isprid dučančića na gajbama i bumbidu pivu zorušu. Ma di ranije !
Da Van ne bi teško pala piva na stumik ovako na tašte ?
Neće, neće. Ne bojte se !...Aj platite dvi Žuje !
More !
Bog Vas blagoslovija !
Je, piva će Van dat...piva. Bilo bi Van pametnije da se uvatite štogod lavura i da ženan donesete koju kunu...začujen iznutra poznati glas.
Ma ko će dat posla, šjora File ?! Nemoš njanka skupit koju plastišnu bocu. Više ji svit ne bacije vego doma skupja i nosi naplatit po 50 lip za svaku.....Škrtuni jedni !
Pa je li Van rekla Kosorica da sve gre na boje. Kad skroz izajdemo iz krize biće boca za bacivanje. Živit će te ka krajevi o plastišni boc !
Jedan od pivopija se okrene prima starijen čoviku: Šjor Mate, je li tako...Vi ste ono za nju glasali !
Pustite me na miru i ne pačajte se u mene. Nisan Van ništa reka, odgovori on mrzovoljno !
Pa ča se sramujete ! Svak jema prav dat svoj glas komu ga je volja. Bogati - napokon je stigla demokracija !
Je, meni je stiga otkaz - evo jin ga na...Pa peta roge u zrak jedan drugi ča je sidija na gajbu. Evo jin ga na ! Pa počme mavat i štrcat onon bocon Žuje povrj glave.
Jebala te politika...Prolit ćeš svu pivu...zavapi njegov kumpanjo s druge gajbe.
A ča se ti intrigaješ u me: Eto baš oču mavat jerbo me je voja......Neš ti mneni zapovidat ča ću ja radit !¨
U to šjora File izajde iz butige,,,podboči se i kreštavin glasom vikne: Basta, basta manjamuktaši i dangube jedne....! Nikad Van ni po voji. Uvik grintate i brontulajete ma se ne bi uvatili motike !
A oli ste Vi pali s Marsa ? Koja Vas je sad motika spopala ? A ko će dat zemje...Neman ni gać a tu mi spominjete niku zemju....
U tomu i je prolem ča ste pobigli sa zemje u grad a sad Van je HDZ pozoba radna mista, proždra poduzeća i ča sad...? Ostala Van je jedino dikoja piva i tot po cili dan sidit na praznin gajban i umovat. A ča niste mislili kad ste glasali...nego ste potla došli do pameti !
Nemojte tako, šjora File ! Ne vriđajte !
Ne...vengo ću Van kokolavat. Je...je ! Dok Vama dojde iz gujice utu praznu glavu glavu i sinjska rera bi obašla po zemajske balote. Ča sad kukate ?
Ne kukamo vengo ljudikamo !
O la la ! Lipa li ljudikanja.....Ma divota Vas je vidit. Ne zna čovik je li Vas ije lipše gledat oli slušat !? Ne zna čovik bi li plaka oli bi se smija !
Pustite Vi vaše riči...javi se šjor Mate: Dosta je nama bilo crljeni !
Pa ča Mate onda glasaš za njih ?
Ma za koga ? Prin bi mi ruka usala vego ča bi ji zaokružila ! Eto Van na !
Ma je tebi žena lipo zaokružila oti tašel, otu zakrpu na gujici o tega izlizanega trliša ča si gau škveru lambrija još u socijalizmu- pa ga sad nosiš ka svoju najboju monturu !
E pa neka ću odat cili zakrpan ali crljenima ne dan svoj glas....jesi li me čuja, počme se ka kostrešit šjor Mate !
A bogati čuja san, nisan gluv ! Nego, oli ti Kosarica ni bila u komuniste ? Meju cljnenima ?
Naravski da nije !
Ajde Mate lovi rake govnjare. Pa ti jedini u cilu Rvacku ne znaš da je ona bila su crljenin šudaron oko vrata još ka divojka i da je pivala u svih šesnajest ispod crljene zastave su žutin srpon i čekićom. Ma istini za voju - jednu drugu pismu od ove koju sad piva !
Je, je...Ovega mi Boga...znamanujući se ,doda šjora Cvita koja je privrčala po gajbi kupusa.
Ma ni samo ona pivala Internacionalu - vengo cili vrj o hadezeja: Od Šekija, Jarnjaka, Božinovića pa sviju po redu....koliko god ji je !
I Friščić...i Frišić - reka je meni jedan iz njegova kraja...javi se oni su pivom.
Ma to ti je HSS a ne HDZ.
Neš ti. Ista pašta ! Čuja san da je on bija glavni za organizacije štafeta...
A Milinović ! On je još, ka pravi komuništa, Račanu slava pisma podrške !
Pa ča onda, ona su brošima na sisan, bali da kako neće dozvolit da se Rvacka zacrljeni ?
A ča ja znan ?
Biće da joj je sad najdraža bila kolura zaraj oni pusti bili kameni temeljac ča ji bacije di god vidi koju rupu oli.štogod buže !
Ma ča ona opće sletije iz svojega avijuna ? Oli joj nije jednostavnije bacivatt ote puste stinje iz zraka. Mislin ote kamene temeljce. Ne triba joj ni sletivat..a .e bome !
Ni luda, pa da kamen ubije na zemlji koje čeljade !
Pa ča onda ! Ko bi se libija dat život za Jacinu Rvacku !
A je si šempjast. Kad bi neki kamen temeljac, ča ga je Jaca itnila iz avijuna, pa kokomu na glavu - ona bi se sva rascopala ka dinja kad padne na pod.
To ni nikakva velika žrtva za nježino veličanstvo !
Ma je li, Bogati ! Pa da ona bidna mora gledat krv koja je crljene boje i da joj onda pozlije !
Od crljene boje !
A da od čega !
Ali crvena je boja najrvackija !
Kako sad to ?
Je li rvacki grb jema najviše crljeni polja ?
Jema !
Je li rvacka zastava jema jednu trečinu pituranu u crveno ?
Jema !
E pa cukunu - zbroji dva i dva. I na grbu i na zastavi najvišje je crljene bije !
Bogami je ! Jemaš prav !
Pa zašto je ona onda mrzin?
Đava bi ga zna. Biće je bidna puno nosala crljene šudare i crljene zastave pa se ka nikako prijila te kolure..Ka kad se dite prijide, ajmo reč, sladoledon, đelaton. Kad ga svaki dan kusa..A ka ča se zna.....Ni maški nije drago ča je prislano - a ona se nakusala crljeni koluri onda kad je to bilo ka puno u politiškoj modi i puno probitašno a sad su, bome, nike druge kolure došle u modu - pa se tako i ona prominila !
Dobro ti i govoriš !
Ola filozofa o pive...nasmije se šjora File. Žena zadužila državu zaraj Vas - do guše...a Vi je zajebajete. Jeste nezahvalni ! Eno je i par lopovi ka našla u svoju stranku...a to ni lako - a Vi je zajebajete ! Slomila se o putovanji za Vaše pare a Vi je zajbajete ! Utrnila Van je firme i poslala Vas da se odmarate oko kontejneri i da ka gospoda pijete pivo na gajbama oko butiga i trafika - a Vi je, nezahvalnici, zajebajete. Čujen da je dala befel da najboji rvacki inđinjeri omar izumidu i napravidu najveći teretni helikopter na cilemu svitu, ča more nosit sto toni kamen temeljac odjedanput - koje će ona itat u svaku i najmanju bužu ča postoji u Lipoj Našoj - A ča Vi radite ? Zajebajete je ! Pa aj ti sad vodi takvi narod...Nije ni njoj laka, Jel tako šjor Mate ?
Ajde ostavite me na miru. Molajte me se...ionako gren ća jerbo više neću slušat ove protudržavne i antirvacke beside. I zaputi se on put svoga portuna....
Ma šjor Mate...fermajte, molin Vas fermajte...zaviće šjora File za njin.
Ča očeš !
Vidin ja da je šjora File nešto dogovorila sa dvi svoje prije i zbilja......
Evo da ne grete bez mužike doma zakrpani gaća, samo za Vas otpivaćemo Van jednu.
Šjor Mate je nepovjerljivo zasta i gleda koji je sad to bog a njih tri se podboćile i na cili glas skupa zapivadu:
"Crven fesić naaaa-nooo...Crven fesić joj Ja-dran-ki-ce !"
Ajte kvragu svi Vi skupa mrzovoljno i ljutito će šjor Mate, okrene se i gegajući, ne okrečući se - krene put doma.
Šjor Mate: "Pozdravila te Crljenkapica !" - zaviče oni s već popijenon pivon,- ča je sidija na gajbi.
A svi udri u smij.
Jesan li zaslužija još jednu pivu, a šjor Marine - sav ozaren okrene se prima meni gajba-man ?
A jesi, ovi put bogami jesi.
Aj Vojko daj ljudima još par Žuja. Ako ništa drugo a ono su baranko hranjive !
Takooo je, šjor Marine. A more li ona su crljen zvizdon ? Hajnekenuša ! Vama za jubav !
Funcuti jedni da bi li funcuti.
Vojko ! Daj judima po voji a ja gren doma prije nego ča me ovi filozofi opeljuše !.
|
