Tovari u Dalmaciji jemadu poseban status !
To je jedna od najomiljenijih ali i najmaltretitranijih beštija - pa ma ča god ko mislija o njima.
Je da se kod nas reče kako je neko "tvrdoglav ka tovar" - kad neće nikako da popusti u svom stavu ili namjeri...ali, na kraju krajeva, ča je tu lošega ?
To se kod ljudi ionako zove dosljednost....a nje uvik više fali nego ča je jema na ovemu svitu.
Uzmimo samo politiku.
Eto, kod nas su niko vrime na cini bile "prilivode", oni koji su minjali bandire kako vitar zapuše. Njih u Dalmaciji, inače, zovedu "šete bandijere"....a niki jih još, rugajući in se, nazivju "makako" - a to je ka nika vrsta o majmuni oli se misli na onega pivca o late ča se na vrj fumara okriće u pravcu odakle trenutno puše vitar.
Tako da je tovareća tvrdoglavost ispada, na zanju, ka nika dobra..puno moralnija stvar i vrlina...vengo ča je to popustljivost i mavanje repon prid svakin ko trenutno jema u rukan bič oli ti je ka niki gazda.
Jebeš gazde !
Do njih pravi judi nikad nisu vele držali !
Tako je ispalo da su i oni političari koji nisu glumatali muve podguze ispali pravi judi, vridni svakog rišpeta i fale - a oni bidnici, utiratori i liziguzi su zaslužili da ji pjuneš u čunku čin ji sritneš na ulici - jer svaka sila za vrimena, ka ča su to jošćec naši stari govorili !
Zatin, ne more se nikako reč da tovar nije, jedna puno vridna beštija.
Uvik fatiga, vuće od jutra do sutra, od nemila do nedraga...Jašidu ga, natovarijedu brimenima drv joli lozjen, bačvan vode joli vina - i još mu se na kraju na sve to uspentra gazda pa lipo side, ka navrj Keopsove piramide, i za svaki slučaj stalno ga tuče šibon po gujici da mu slučajno ne bi palo na pamet da ferma ili da malko otpočine.
A za nagradu, nakon teška rada, da mu navećer da lizne komad soli i poji naramak bodljikave suve drače.
Ma ćudin se ja da se ti naši tovari još odavno nisu digli na revoluciju, pobunili se i napravili demoštracijune - oli kopitan izubijali sve svoje gazde dok ovi spavadu.
A ko je njima, u stvari, bija gazda ?
Bidan, siromašni, recimo spliski, težak koji je i sam po vas dan, upeka zvizdan joli puvala bura, teško radija i kopa u poju na tujoj zemlji...koji ni jema ni za kajiš o gača vengo ji je veživa konopon a na gujici i na kolinima mu je žena svakako sašila po jedan tašel jerbo bidu se baš tot gaće najprin izlizale.
A ko je meju njima jema za nove gaće ?
Nikor...Samo gospoda !
Ujutro bidu upregli konja...ko ga je jema - a za kar bidu vezali kozu dok bidu na tovaru svakako, do u poje, jašili, pa baranko dica ako nikor drugi.
Najgore je bilo u poju ako blizu ni bilo vode. Onda bidu svako malo upregli tovara da nosi vodu sa gustirne joli čatrnje - pitaj boga oklen sve ne. Gori - doli.
A on bi bidan samo klima glavon, tira repon mušice i kaska di ga se vodilo.
Pa fala bogu da bi dikor ferma i ni tija ni naprid ni nazad - dok bokun ne otpočine, dok mu duša ne odane.
Jedan san put vidija tovara u Milni na Braču kako pije more. Nisan se moga naćudit - ali su mi rekli da je to normalno jerbo da njemu ka fali soli jerbo se znoji - a usput se lipo i napije. Ka da bidna beštija u sebi ima niku makinjetu za desalinizaciju. Ali. štaš ! Tako je to bilo....Ko je marija za to kako je i je li to bilo po guštu bidnoj beštiji
A u Splitu se, u ona stara vrimena, bilo desilo da je jedan velovaroški težak, kad se vraća u suton iz poja, izubija svoga tovara jerbo je ferma nasrid puta i nije tija ni naprid ni nazad.
Dobija je, bogami, dobro po škini. Ni se bidan mica - samo je reva ka da plače i nariče.
Naletija je žandar i opalija je globu težaku jerbo da je zabranjeno mučit, odnosno tuć beštije.
E tu su večer svi bidni splitski tovari iz Velog Varoša ovancali. Platili su buletu zaraj nesriće koja je pogodila gazdu o pobunjenoga tovara..
Težaci su ji sve pozatvarali u ono bokun štale ako su je jemali...joli su ji utirali drito u kuću na donji kat u konobu...vezali ji ih i onda dobro izubijali. Do jednega. A tovari su bidni revali i tulili tako da se cili Varoš tresa a dica se o straja vatala materama za skute i za brnjice.
"A gospoda bi dozivala đendare.Izmuzla nan šolde na globe ! Još bi smo mi morali plačat ča nećete da nas slušate. Ma sad će te dobit svoju po škini !" I udri nemilice !
Tako su govorili svi težaci solidarizirajući se sa svojin unesrićenim susidom kojemu je žandar naplatija globu jerbo je utirava svoga neposlušnog tovara u škvaru - onako pedagoški, bijon po kostima.
Ujutro su svi težaci gledali ispod oka na svoje tovare ka da jin pritidu u sebi: "A ča je ? Di smo sad....buntovnici ? Anarkišti i antikristi jedni ! Ajte sad fermajte ako jemate kurađa !"
I bili su ponosni na sebe i svoju tovareču pedagogiju.
Sto puta san se pita: Ma ko je ovod tovar a ko judsko čejade?
I nisan moga lako nač odgovor.
A bi je još jedan poznati splitski tovar...Radija je u poznatega spliskog vlasnika cimentara Betize. Taj bidan tovar vrtija je u krug ka jedno kolo o kamena koje je mlilo tupinu u cimenat. I tako cili svoj tovareći živit. Ukrug...bez pristanka..Od zore pa do mraka.
Judi bi mu se smijali i rugali mu se a dica bi ga štucigavala i gađala bovačićima u glavu.
A on bi bidan samo strignija i zamava ušima i nastavija strpljivo dalje, pognute glave - hodajući u tom beskonaćnom besciljnom krugu.
Brzo je on prista bit interesantan judima. Ni dugo bija atrakcija jerbo bi du dica i odrasli radije našli nikoga bidnega cotavog oli cunfastog čovika i učinili o njega ridikula, pa ga onda zajebavali - vengo se bavili Betizinim tovaron koji je muča, vuka svoj kamen i nije obadava divjake niti jin je pridava ikakvu pažnju. Ka niki pravi spliski Sizif oli mudrac.
Ali je u Splitu još uvik ostala izreka za nikoga čovika koji bi uvatija lipe godine o starosti: "Ola, ovi je star ka Betize tovar!"
A Betizin tovar davno je već partija "bogu za kurira" u niki puno bolji svit, u niki svoj raj o beštij di ga više nikor nije mučija....Bog mu da pokoj duši...Ma to judi nisu ni zamjetili.
Najgore od svega je to ča su tovare mučili i iživljavali se nad njima oni kojima ni samima nije bilo lako u životu, čiji je život bija samo rad i glad...služenje drugima i vična pokornost.
Pa sad, ko je tu lud ?
Evo i danas mi se pari kako su tovari daleko više vridni svakega rišpeta i našeg poštivanja vengo oni judi koji trpidu tlaku i nevoju bez riči - a švogaju se na slabijen o sebe joli na bidnin beštijama.
Beštija se makar dikod znala pobunit i učinit po svoju. Baš ka tovar. Ukopa se na mistu i ni makac. Pa tuka ga ti oli ne tuka. Ka da su izućili niku posebnu stoičku filozofiju. Neće pa neće naprid dok sam tako ne odluči. A ti čoviće mlati kad ti je sva pamet u batini !
A ča nan se danas dešava ?
Većina judi trpi, stenje, grinta, bogaje, riga vatru i krepaje pod tlakon koju su joj nametnuli i brimenu ča jin ga je na kosti natovarila Vlast i država. Ali nikako da stanu i kažedu: "Dosta nan je - ne more ovako više, nećemo dalje dok vas ne sakramentamo, dok vas ne zbacimo sa vlastitih kostiju i dok nan ne vratite sve ča ste nan pokreli, oteli i strpali u svoje žepe.
Pa da nije boje bit tovar vengo makako ?
Je, i to sto puti !
I ne govori za ništa uvik moja šjora File kako su čovik i tovar skupa pametniji vengo kad je čovik sam !
Pa kad smo već dogurali dovde di jesmo - naučimo i mi nešto, pa makar to bilo i od tovari !
|
