Cilo jutro mi zvrlji telefon i tandrče mobitel....Svi zovedu i pitadu da je li moguće kako se Sanader vraća u Sabor ?
A ča ja znan. Biće da je, kad tako javljadu - odgovaran. On jema prav na to i još uvik more radit ča ga je voja. Barem zasad !
Uto zazvoni na vratima o stana. Otvaran. A ono: Ko bi drugi i bija vengo Šjora File....sva prozebla i mokre glave.
Ajde ulizite, ne stojte tod na vratima ka nika stvar. Priladit će te mi se.A di smo onda ? Ma koji Vas je vrag nosija po ovakvom vrimenu da izlazite iz kuće ?
Eto san bila u spizu i malemu po marendu...Moran ja, kad nikor o mlajih neće. Ne denjadu se njanka dignit iz postelje....Deboto paridu ka da su svi prišli na niku novu viru koja jin zapovida da samo stojidu, ne mičedu se, grintaju, tražidu jist i linčare. Ka da su svi betežni ! A ča ću bidna. Tako uvik na kraju toka mene najstariju da gren najranije ujutro u butigu.....Nego, ča me tu stalno ništo zagovaraš - nisan došla zaraj tega...
A ča ste došli ?
Ma čekaj da se prvo raskomodin, reče šjora File i skine mokri mantel sa sebe...protrese glavom i svojon sidon koson, pa side za stol uzdišući.
A di Van je šudar...Ča ste izašli vanka gole glave i prez lumbrele ?
Eto, jerbo san se sva infotala....Dignedu mi doma tlak najranije na miljun pa san i šudar zaudobila vazest...a lumbrelu da i ne spominjen, raširi ona svoje košćate ruke ka dva krila o vitrenjače. Ma kobogda sad uvatila priladu pa zaleglai i ja u posteju...pa čedu onda vidit Boga svoga ! Ja ću onda lipo samo ležat, pit kamumilu i čaj su medon - a neka oni gredu svako jutro u spizu namisto mene, e....
Jemate prav šjora File ! Nego amo mi popit jedan bićerin da ne dobijate i puntu plauritu...da Vas pluća ne izdadu. Znaaaan ja ča Vama triba u ovi teški momena, rečen ja brižnot. Domaći prošek je najboja i dobro provirena likarija,
A bome i je. Aj daj jedan bićerin kad si već navalija !
I nalijen ja mojoj susidi ne jedan vengo dva bićerina - onako da pojačan tu našu domaću medicinu kontra upale pluć.
A je dobar, reče ona - i zaviri ispitivački u dno o bićerina ka da će tamo ovi ćas ugledat ništo jako važno. Baš mi je puno pomoga !
I onda ?
Ča i onda !? Je li istina oli nije istina ? Eno, doli dok smo čekali tepli kruv iz Biškića....svi pričadu da se Sanader vraća u Sabor - ka izgubjeno dite u skulu.
Je, a Luka Bebić će mu bit razrednik !
Ajde ne pričaj monade - vengo reci oče li se vratit meju zastupnike ili neće?
Ja mislin da oče ! A ča bi mu falilo ?
Ništa, ništa - ima on tega i prikoviše, ništa njemu ne fali...Vengo se mislin kako ste to lipo izumislili pa se šetate od Sabora pa do Vlade i natrag. Ka da ste na niko turistiško putovanje joli na niku ekskurziju !
Pa ča ja jeman s otin ?
Bože oslobodi, Marinko moj - nisan ja ništa rekla kontra tebe. Prin bi mi se jezik osušija vengo bi priko moji just prišla nika gruba rič o tebi - nasmije se ona lukavo. Vengo mislin se ovako ka jedna stara i neuka žena: A di bi se moga nabavit biljet za jedno takvo turistiško putovanje ? Bome san i ja ništo kun ušparala u ovemu svom životu, pa bi i za moga malega, za moga unuka rezervirala jedno takvo putovanje - ako more. Ma mu ne bi omar rekla. A ne, ne - vengo bi ga iznenadila kad uvati osmnajst godišć. Kad dite izađe iz puberteta i postane punolitno. To bi mu bija ka niki dar od babe oli, amo reč - od mene !
To Vi mene ka zajebajete ?
Bože me oslobodi...grubi li riči. Samo pitan !
Uto se Li-Lu razlaje i počme trčat po kužini.
Šjora File se izbeči prima pasu i vikne oštro: A ti da si kuco, jesi li me razumija !
A moja Li-Lu brže bolje uteče u kantun iza kauča i samo čirka i klepeče crnin očima, sa strane gledajući puna straja u moju susidu. Ma više je se ni bilo ćut a kamo li da bi zalajala .
Vengo, reci ti meni, dite moje a ča su te se ono jopet dovatili po fojima, an....?
Neš ti novosti...Uvik iste čunke, uvik ista stvari !
Ma isto me je iznenadija oni Jurica, kako ono - an...Pavičić. On ka da ne razumi ča i malo dite kapi....a da je glup, nije ! Pa mi ni kjaro...Eno ti na nos nabija i ča si bija u vižite Iranu i Teheranu....a da si ka spličanin triba ostat vezan lancima za Split u ovemu dramatišnem i priteškon momentu. Ma koja drama ? Koji saborski turizam ? Bože mi prosti, ka da se čovik najija ludi gljiv ! Da ne bi bidan opet falija ka ono onda kad je u Sanaderu bija vidija spas za Rvacku ? Još se sičan kako si beštima na take, kako se ono reče - an, spliske intelektualce ! Ča se tu sad jopet vaja iza brda, sinko moj ?
Ma to bidu oni mene vajali i to po blatu, šjora File moja !
Kada ja to ne znan, sinko moj...Vengo ča mu oče reč ono da si ka niki bonvivan ? Ja san čula za bovan !¨Bovan je stina oli facun...ali ča je to bonvivan ?
E to van je ka niki, ajmo reč - nabiguz, oni ča arči i banči...kojemu je najviše do spize i bibita a ne do pametni i ozbiljni stvari. Ka nika vrsta linčine i manjamuktaša !
Opla ga đilda ! Sad kapin ! Pa to su govorili i za Smoju !
Jesu, jesu...šesna moja šjora File...baš su za njega to špjegali...i puno mi je drago ča san na kraju doša dotle da me častidu istin ričima ka i mojega dobrega Smoju.
A jema je Smoje i Šarka a ti ovu kubansku kujicu Li-Lu !
Eto vidite kako smo slišni....Baš mi je drago ča Van to ni uteklo !
Bome san se baš išenpjala kad san vidila da ne znadu ni obišni abak pa da ne mogu pribrojit ni koliko ruku triba u Gradsko viće za sminit Kerumovu sestru.
Ma znadu oni to - vengo glumidu mone ! A neki baš i ne glumidu, vengo....
Ma da ste sve i jemali, ča niste, otih trinajst rukov - ma ja bi ti sama samcijata ruku bila osikla da si je diga za koalicjun su hadezejon, s otin lažljivcima lažljivin, s otin nabikesama...s otin....
Ma molajte, šjora File - pa i sami znadete da ja to nikad ne bi uradija. Da bi prin sam sebi osika ruku vengo s hadezejcima isti kruv misija ! Ne biste se Vi tribali mučit.
Pa ča te onda ne pustidu na miru ? Ča jin je ? Eto se oti Jurica poziva na svojega mesara i na svoje prijateje iz Jutarnjeg Lista. A ti se lipo pozivi na me ! Oli san ja manje vridna ?
Ma Vi vridite ka duzina Kuljiša !
Evo ti ga na - reče ona razdražljivo - i peta mi roge u oči ! Ne spominji mi onu ispuvanu mišinu ! Molin te dragin Bogon, samo mi njega ne spominji. A dat će mi sliku i oni šef mu Butković. Nima ni on pametnijeg posla vengo se bavit s unutarnjin neprijatejima esdepeja....A to bi triba bit ka ti ! Ola koja si ti važna faca ! Pari mi se ka da ji je Duje Marasović natanta da pišedu ote šporkarije o tebi !
Ne grišite dušu, jema i puno gorih od Duje, lipa moja šjora File !
Glavno da nisu naši !
Glavno !
Osin tega, Marinko moj, za jednega cukuna iz našega portuna kažedu da je glup ka bovan.
I ?
Pa boje ti je onda bit i bonvivan vengo bovan !
Ča je, je !!!
|
